អត្រាចុះឈ្មោះ​ចូលរៀន​របស់កុមារ​សម្រាប់សេវាអប់រំគ្រប់រូបភាព ទាំងមត្តេយ្យ​សិក្សា​រដ្ឋ ឯកជន និងសហគមន៍ មាន​៧១,៤ភាគរយ (ស្រី ៧១,៩ភាគរយ)។ នេះ​បើតាម​របាយការណ៍ស្តីពី​លទ្ធផល​សម្រេច​បានក្នុងឆ្នាំ​សិក្សា​២០២៤-២០២៥ ដែល​លោកស្រី គឹម សេដ្ឋានី រដ្ឋលេខាធិការ​ប្រចាំការ​ក្រសួងអប់រំ យុវជន និងកីឡា លើក​យកមក​បង្ហាញក្នុងបាឋកថាពិសេស​ស្តីពី ​«តួនាទី​នៃការ​អប់រំ​កុមារ​តូច​ក្នុងការ​លើកកម្ពស់​គុណភាព​អប់រំ នៅ​កម្ពុជា» កាលពីថ្ងៃទី​៩ ខែមីនា នាសាកលវិទ្យាល័យ​ភូមិន្ទភ្នំពេញ។

​រយៈពេល​១០​ឆ្នាំពី​ឆ្នាំ​២០១៣ ដល់ឆ្នាំ​២០២៣ បាន​បង្ហាញពី​វឌ្ឍនភាព​នៃ​ការ​ចុះឈ្មោះ​ចូលរៀន​របស់កុមារ ដោយ​កើនពី​៥៩,៩ភាគរយ ដល់៦៤,៨ភាគរយ បើទោះបីជាមាន​ការ​ធ្លាក់ចុះចន្លោះពី​ឆ្នាំ​២០១៩ ដល់​ឆ្នាំ២០២២ ដោយសារតែការរាលដាលកូវីដ-១៩​ក៏ដោយ។

ឈានដល់​ឆ្នាំ​សិក្សា​២០២៤-២០២៥ របាយការណ៍ក្នុងបាឋកថា​ពិសេស​ជិត​៦០ទំព័រ​របស់​លោកស្រី គឹម សេដ្ឋានី បង្ហាញថា សាលាមតេយ្យ​សិក្សាគ្រប់រូបភាព មាន​ ៩ ០៣៦សាលា/កន្លែង នៅទីតាំង​១ ១១៩ឃុំ-សង្កាត់។ ក្នុងចំណោមនោះ សាលាមត្តេយ្យសាធារណៈ មាន​ ៤ ៧២៥, ឯកជន មាន៩៦៣ និងសហគមន៍មាន​ ៣ ៣៥៨កន្លែង។ 

កុមារ​អាយុ​៥ មាន​ ២៣០ ១៨៤នាក់ (ស្រី ១១៣ ១៩១នាក់) ទទួលបាន​សេវាអប់រំគ្រប់រូបភាព ដែលស្មើ​ ៧១,៤ភាគរយ (ស្រី​៧១,៩ភាគរយ)។ ជាមួយគ្នានេះ ក្នុង​ឆ្នាំសិក្សា២០២៤-២០២៥ រាជធានី-ខេត្ត​ចំនួន១១ បាន​ផ្តល់​សេវាអប់រំកុមារតូចអាយុ​៥​ឆ្នាំ គ្រប់រូបភាព​ខ្ពស់​ជាង​ថ្នាក់ជាតិជាក់ស្តែង ពី​៧៣,៤ភាគរយ ទៅ៩៨,​៥ភាគរយ។ 

រាជធានី-ខេត្តដែល​បាន​ផ្តល់សេវាអប់រំ​កុមារតូចអាយុ​៥ឆ្នាំ ខ្ពស់ជាងថ្នាក់ជាតិ រួមមាន កោះកុង ព្រះសីហនុ សៀមរាប តាកែវ ពោធិ៍សាត់ កំពង់ចាម កែប ភ្នំពេញ កំពង់ឆ្នាំង កំពង់ស្ពឺ និង​បាត់ដំបង។ «ដោយសារ​មាតាបិតា អាណាព្យាបាល និងសហគមន៍ កាន់តែជឿជាក់ទុក​ចិត្ត ចូល​រួមគាំទ្រអភិបាលកិច្ច​សាលារៀន និង​យល់​កាន់តែ​ច្បាស់ពី​សារសំខាន់នៃការអប់រំកុមារតូច»។ នេះជាការអះអាង​របស់​លោកស្រីរដ្ឋលេខាធិការ​ប្រចាំការ។

ជាមួយគ្នា ក្រុង-ស្រុក-ខណ្ឌ ចំនួន១០០ ក៏មានភាគរយ​កុមារ​ចូលរៀនអាយុ​៥ឆ្នាំ ខ្ពស់ជាង​ថ្នាក់ជាតិជាក់ស្តែង (៧១,៤ភាគរយ) ផងដែរ ខណៈខេត្តស្ទឹងត្រែង មណ្ឌលគិរី និងព្រះវិហារ មានកម្រិតទាបជាងគេ ដោយស្ថិតក្នុងចន្លោះតែ​ពី​៣៥,២ភាគរយ ដល់​៤៧ភាគរយប៉ុណ្ណោះ។

ខេត្តប៉ៃលិន ឧត្តរមានជ័យ និង​ក្រចេះ មានអត្រាពី៤៧ភាគរយទៅ​៥៩ភាគរយ រីឯខេត្តបន្ទាយមានជ័យ រតនគិរី កំពង់ធំ ត្បូងឃ្មុំ កណ្តាល ព្រៃវែង ស្វាយ​រៀង និង​កំពត មានអត្រាកុមារអាយុ​៥ឆ្នាំ​ចូលរៀនពី​៥៩ភាគរយ ដល់​៧១,៤ភាគរយ។

សម្រាប់ឆ្នាំ​សិក្សា​២០២៤-២០២៥ ផងដែរ ភាគរយ​កុមារ​ចូល​រៀន​នៅបឋម​សិក្សា បាន​ឆ្លងកាត់​ការអប់រំ​កុមារ​មាន​ចំនួន​៧៩,៦ភាគរយ។ 

ក្នុង​បាឋកថាពិសេស​ស្តីពី «តួនាទី​នៃការអប់រំកុមារតូចក្នុងការ​លើកកម្ពស់​គុណភាពអប់រំនៅកម្ពុជា» លោកស្រី គឹម សេដ្ឋានី បាន​ធ្វើ​បទឧទ្ទេសនាម​ជាបីផ្នែក រួមមាន ការអប់រំកុមារតូច និង​បដិវត្តន៍ឧស្សាហកម្មទីបួន, ស្ថានភាព​នៃការគាំពារ​ និងអភិវឌ្ឍន៍កុមារតូចនៅកម្ពុជា និង​កំណែទម្រង់​ការគ្រប់គ្រង​មត្តេយ្យ​សិក្សា​សហគមន៍​ដើម្បី​លើកកម្ពស់​គុណភាព​អប់រំកុមារតូចនៅកម្ពុជា។

លោកស្រីរដ្ឋលេខាធិការក្រសួងអប់រំ បានគូសបញ្ជាក់ថា កម្ពុជាចាំបាច់ត្រូវតែវិនិយោគលើការគាំពារ និងអប់រំកុមារតូច ដើម្បីកសាងមូលធនមនុស្សដែលមានសារៈសំខាន់ក្នុងការជួយឱ្យ សម្រេចបាននូវចក្ខុវិស័យកម្ពុជា២០៥០ និងការដោះស្រាយនូវភាពក្រីក្រនិងបញ្ហាលំបាកផ្សេងៗ៕