.png)
.jpg)
.jpg)
សម្តេច ហ៊ុន ម៉ាណែត ថាការរៀបចំ«អង្គរសង្ក្រាន្ត» មិនមែនជាការចាយលុយឥតប្រយោជន៍ឡើយ
- ថ្ងៃអង្គារ ទី១១ ខែមីនា ឆ្នាំ២០២៥ ម៉ោង ១១:៤៤ នាទី ព្រឹក
ការរៀបចំព្រឹត្តិការណ៍«អង្គរសង្ក្រាន្ត» គឺជាផ្នែកមួយនៃការបង្កើតព្រឹត្តិការណ៍ទេសចរណ៍ មិនមែនជាការចំណាយលុយឥតប្រយោជន៍ ដូចការរិះគន់មួយចំនួនឡើយ។ ប្រមុខរាជរដ្ឋាភិបាលថ្លែងបែបនេះ នៅក្នុងពិធីប្រគល់សញ្ញាបត្រដល់និស្សិតនៃវិទ្យាស្ថានវ៉ាន់ដា នៅ ថ្ងៃទី១១ ខែមីនា។
សម្តេច ហ៊ុន ម៉ាណែត គូសបញ្ជាក់ថា «អង្គរសង្ក្រាន្ត» ជាការៀបចំដើម្បីទាក់ទាញភ្ញៀវទេសចរ លើកកម្ពស់ជីវភាពពលរដ្ឋ។ «ការរៀបចំនេះ គឺដើម្បីបង្កើតព្រឹត្តិការណ៍ទេសចរណ៍។ កាលយើងមិនសូវមាន គេវាយតម្លៃថារដ្ឋាភិបាល អត់មានគោលនយោបាយ បង្កើតព្រឹត្តិការណ៍ទេសចរណ៍ទាក់ទាញ(ទេសចរ)។ ឥឡូវយើងរៀបចំបែបនេះដើម្បីអ្វី? បើសិនជាអ្នកសៀមរាប គាត់មិនចង់បាន ប្រជាពលរដ្ឋនៅទីនោះ ជីវភាពរស់នៅ ដើម្បីលើកកម្ពស់ជីវភាពពួកគាត់។»។ សម្តេច នាយករដ្ឋមន្ត្រី លើកឡើងដូច្នេះ។
បើតាមសម្តេចនាយករដ្ឋមន្ត្រី ក្រៅពីអង្គរសង្ក្រាន្ត បណ្តារាជធានី-ខេត្តផ្សេងៗ ក៏នៅតែបន្តរៀបចំព្រឹត្តិការណ៍សង្ក្រាន្តតាមលទ្ធភាពដដែល ដើម្បីអបអរឆ្នាំថ្មី និងបង្កើតជាព្រឹត្តិការណ៍ទាក់ទាញទេសចរ។ ប្រមុខរាជរដ្ឋាភិបា ក៏ជំរុញឱ្យអាជ្ញាធររាជធានី-ខេត្ត និងស្ថាប័នពាក់ព័ន្ធ បង្កើតព្រឹត្តិការណ៍ទេសចរណ៍ឱ្យច្រើនបន្ថែមទៀត ដើម្បីទាក់ទាញភ្ញៀវទេសចរមកកម្សាន្តនៅកម្ពុជា ជាពិសេសនៅក្នុងអំឡុងខែភ្លៀវ ឬ Low season។ បើតាសម្តេច ហ៊ុន ម៉ាណែត កម្ពុជាកំពុងខិតខំបង្រួមគម្លាតភ្ញៀវទេសចរ រវាងខែ high season និង low season ឱ្យមកនៅចន្លោះ ពី១០-៣០ ភាគរយ ខណៈបច្ចុប្បន្ន អត្រានេះនៅមានគម្លាតខ្ពស់។ ការបង្រួមគម្លាតនេះ អាចធ្វើទៅបាន គឺការបង្កើនការរៀបចំព្រឹត្តិការណ៍ទេសចរណ៍ឱ្យបានច្រើននេះឯង។
ពីពិធីដដែល សម្តេច ហ៊ុន ម៉ាណែត ក៏ហួសចិត្តចំពោះអ្នកវិភាគ និងអ្នករិះគន់មួយចំនួនជុំវិញការរៀបចំព្រឹត្តិការណ៍ អង្គរសង្ក្រាន្តនេះដែល ដោយពួកគេលើកឡើងថា ការរៀបចំព្រឹត្តិការណ៍នេះ គឺដើម្បីពង្វក់យុវជនកុំឱ្យគិតពីរឿងសង្គម ឬដើម្បីបង្កើនប្រជាប្រិយភាពត្រកូលហ៊ុនជាដើមនោះ។ សម្តេចនាយករដ្ឋមន្ត្រី ក៏ចោទសួរវិញថា បើចូលឆ្នាំ មិនឱ្យរៀបចំព្រឹត្តិការណ៍អបអរ កម្សាន្តសប្បាយ ឱ្យធ្វើអីវិញ?
ប្រមុខរាជរដ្ឋាភិបាល បញ្ជាក់ថា ប្រមាណ ១០ឆ្នាំហើយ ដែល ស.ស.យ.ក. រៀបចំព្រឹត្តិការណ៍«អង្គរសង្ក្រាន្ត»នេះ ហើយដែលមានការចូលរួមពីយុវជនស្ម័គ្រចិត្តរាប់ពាន់នាក់។ សម្តេច ហ៊ុន ម៉ាណែត បញ្ជាក់បន្ថែមថា៖ «(អង្គរសង្ក្រាន្ត)ធ្វើមិនមែនដើម្បីឱ្យបក្សណា ដើម្បីឱ្យអ្នកណានោះទេ តែធ្វើដើម្បីប្រជាជនយើងទាំងអស់។ ទី១ អ្នកដែលទទួលផលផ្ទាល់ គឺប្រជាពលរដ្ឋអ្នកខេត្តសៀមរាប។ បានមនុស្សច្រើន អូតែល restaurant(ភោជនីយដ្ឋាន)។ អ្នកនៅជុំវិញ(ទីរួមខេត្ត) អ្នកនៅកំពង់ភ្លុក ទេសចរណ៍ធម្មជាតិ នៅផ្សេងៗគាត់សប្បាយចិត្ត។ បានបំផុសទៅដល់វិស័យទេសចរណ៍ ខាង tour group គាត់អាចលក់ផលិតផលប្រាប់គេនៅអឺរ៉ុប ឱ្យគេមកឱ្យច្រើនមកខែហ្នឹង។ មកកម្ពុជា ព្រោះយើងមានរៀប(ព្រឹត្តិការណ៍អង្គរសង្ក្រាន, សង្ក្រាន្តតាមរាជធានី-ខេត្ត) ហ្នឹងល្អ។»។
សូមជម្រាបថា សហភាពសហព័ន្ធយុវជនកម្ពុជា នឹងដឹកនាំរៀបចំព្រឹត្តិការណ៍ «អង្គរសង្ក្រាន្ត» នឹងត្រូវរៀបចំនៅខេត្តសៀមរាប ចាប់ពីថ្ងៃទី១៤ ដល់ទី១៦ ខែមេសា ក្រោមប្រធានបទ «ញញឹម សាទរសង្ក្រាន្តឆ្នាំថ្មី»ជាមួយនឹងការរៀបចំធំជាងមុន និងកម្មវិធីពិសេសៗ មិនធ្លាប់មានពីមុនមក។ លោក សុខ សប្បាយណា ប្រធានក្រុមការងារប្រតិបត្តិ ព្រឹត្តិការណ៍អង្គរសង្ក្រាន្តបញ្ជាក់ថា ព្រឹត្តិការណ៍ «អង្គរសង្ក្រាន្ត» នៅឆ្នាំនេះ នឹងមានកម្មវិធីធំៗចំនួន៣៨ ដែលរួមកមានម្មវិធីកម្សាន្ត ប្រពៃណី វប្បធម៌ និងពិព័រណ៍ជាដើម។ កម្មវិធីទាំងនោះ នឹងរៀបចំឡើង នៅចំនួន ៦ទីតាំងខុសៗគ្នា គឺនៅបរិវេណមុខប្រាសាទអង្គរវត្ត, សួនច្បារព្រះរាជដំណាក់, ដងស្ទឹងសៀមរាប, បណ្ដោយផ្លូវ King’s Road, តំបន់ផាប់ស្ទ្រីត និងអង្គរឃ្យុងយូ។
ការរៀបចំព្រឹត្តិការណ៍អង្គរសង្ក្រាន្តនេះ ក៏ស្របពេលដែលកម្ពុជា កំពុងរៀបចំដាក់«មហាសង្ក្រាន្ត» នៅក្នុងបញ្ជីបេតិកភណ្ឌ របស់អង្គការយូណេស្កូផងដែរ៕
អត្ថបទទាក់ទង
: 144751
© រក្សាសិទ្ធិដោយ thmeythmey.com
