.png)
.jpg)
.jpg)
រដ្ឋមន្រ្តីអប់រំ ទទួលបានពាន«កិត្តិគុណ»ដំបូងគេ និងប្រសិទ្ធនាមថា«គរុវិជ្ជាចារ្យកវីនិពន្ធ»
- ថ្ងៃអង្គារ ទី១១ ខែមីនា ឆ្នាំ២០២៥ ម៉ោង ១២:០៩ នាទី រសៀល
ភ្នំពេញ៖ លោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ត្រូវបានសមាគមអ្នកនិពន្ធខ្មែរ ប្រគល់ជ័យលាភីពាន«កិត្តិគុណ» ដែលប្រសិទ្ធនាមថា «គរុវិជ្ជាចារ្យកវីនិពន្ធ»។ មកដល់បច្ចុប្បន្ន លោករដ្ឋមន្រ្តីអប់រំ បាននិពន្ធស្នាដៃចំនួន ៣៩ស្នាដៃ ដែលមានទាំងភាសាខ្មែរ អង់គ្លេស និងបារាំង។
ក្នុងពិធីអបអរសាទរ ទិវាជាតិអំណានលើកទី១០ នាថ្ងៃទី១១ មីនានេះ សម្ដេច ម៉ែន សំអន បានប្រគល់ជ័យលាភីពាន«កិត្តិគុណ»ដំបូងគេបង្អស់របស់សមាគមអ្នកនិពន្ធខ្មែរ ដល់លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។ រដ្ឋមន្រ្តីអប់រំ ក៏ទទួលបានឈ្មោះថា«គរុវិជ្ជាចារ្យកវីនិពន្ធ»។
ពាន«កិត្តិគុណ»នេះ ត្រូវបានបង្កើតដោយសម្ដេច ហ៊ុន សែន ប្រធានកិត្តិយសនៃសមាគមអ្នកនិពន្ធខ្មែរ ក្នុងគោលបំណងរំឭកនូវសេចក្ដីចងចាំអំពីការលះបង់ និងគុណបំណាច់ដ៏មហាថ្លៃថ្លារបស់បណ្ដាកវី អ្នកនិពន្ធគ្រប់ជំនាន់ជាប្រវត្តិសាស្រ្ត ក្នុងបុព្វហេតុនៃស្មារតីព្រលឹងជាតិខ្មែរ។
លើសពីនេះ ជាការរួមចំណែក លើកស្ទួយពីគុណតម្លៃនៃមនសិការកតញ្ញូ គោរពដឹងគុណ ចំពោះវីរភាពនៃកវី អ្នកនិពន្ធខ្មែរ ដែលបានបូជាកម្លាំងប្រាជ្ញា ស្មារតី ក្នុងវិស័យតែងនិពន្ធនៅកម្ពុជា។ ជាមួយគ្នានេះ ពាន«កិត្តិគុណ»នេះ ក៏បង្ហាញពីការទទួលស្គាល់គុណវឌ្ឍ និងគុណសម្បត្តិ នៃសុឆន្ទៈរបស់កវី អ្នកនិពន្ធខ្មែរ ក្នុងបុព្វហេតុនៃតម្លៃ ផ្នែកអក្សរសាស្រ្ត និងអក្សរសិល្ប៍ខ្មែរផងដែរ។
លោកឧបនាយករដ្ឋមន្រ្តី ហង់ជួន ណារ៉ុន បានតែងនិពន្ធស្នាដៃសរុប ៣៩ ស្នាដៃ ពាក់ព័ន្ធនឹងសេដ្ឋកិច្ច អក្សរសិល្ប៍ អក្សរសាស្រ្ត ច្បាប់ ទស្សនវិជ្ជា ប្រវត្តិវិទ្យា គណិតវិទ្យា និងកំណាព្យជាដើម ដែលមានភាសាខ្មែរ អង់គ្លេស និងបារាំង។ ស្នាដៃទី៣៩ របស់លោក ហង់ជួន ណារ៉ុន គឺជាសៀវភៅស្ដីពីនីតិអន្តរជាតិសមុទ្រ៕
សម្ដេច ម៉ែន សំអន បានប្រគល់ជ័យលាភីពាន«កិត្តិគុណ»ដំបូងគេបង្អស់របស់សមាគមអ្នកនិពន្ធខ្មែរ ដល់លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។ រូបភាពពីMoEYS
© រក្សាសិទ្ធិដោយ thmeythmey.com
Tag:
