.png)
នាយករដ្ឋមន្ត្រី ចាស្ទីន ទ្រូដូ កាន់កៅអីចេញពីសភាទាំងទឹកមុខកំប្លែង
- ថ្ងៃអង្គារ ទី១១ ខែមីនា ឆ្នាំ២០២៥ ម៉ោង ៣:២៩ នាទី រសៀល
រូបភាព ៖ Screenshot Reuters ។
នាយករដ្ឋមន្ត្រីកាណាដា លោក ចាស្ទីន ទ្រូដូ បានកាន់កៅអីដែលលោកធ្លាប់អង្គុយដោយទឹកមុខកំប្លែងចេញពីរដ្ឋសភា បន្ទាប់ពីបក្សកាន់អំណាចបានជ្រើសរើសមេដឹកនាំថ្មីដែលនឹងបន្តពីរូបលោកក្នុងសប្តាហ៍នេះ។
បន្ទាប់ពីកិច្ចប្រជុំនៅអគាររដ្ឋសភាកាណាដានៅថ្ងៃទី១០ ខែមីនា ជាមួយមេដឹកនាំគណបក្សសេរីនិយមថ្មីលោក Mark Carney, នាយករដ្ឋមន្ត្រី ចាស្ទីន ទ្រូដូ បានចាប់ផ្តើមដំណើរការផ្ទេរការងារជាផ្លូវការទៅកាន់អ្នកស្នងតំណែងរបស់លោក។
អ្នកថតរូបរបស់សារព័ត៌មាន Reuters បានថតជាប់លោក ទ្រូដូ កាន់កៅអីរបស់លោកចេញពីសាលសភាកាណាដា បន្ទាប់ពីកិច្ចប្រជុំជាមួយលោក Carney ដែលហាក់ដូចជានិមិត្តរូបនៃការបញ្ចប់ទសវត្សរ៍របស់លោកនៅក្នុងរដ្ឋាភិបាល។
រូបថតលោក ទ្រូដូ កាន់កៅអីហើយលៀនអណ្តាតចេញទៅរកអ្នកយកព័ត៌មាន ត្រូវបានគេចែកចាយយ៉ាងឆាប់រហ័សលើបណ្តាញសង្គម។ មនុស្សជាច្រើនបានសរសើរពីភាពកំប្លុកកំប្លែងរបស់លោក ប៉ុន្តែអ្នកខ្លះទៀតបានរិះគន់ថាជា «ទង្វើចុងក្រោយនៃការលួច» របស់អ្នកនយោបាយវ័យ ៥៣ឆ្នាំរូបេនេះ។
នៅក្រោមច្បាប់របស់សភាកាណាដា សមាជិកសភាដែលចាកចេញពីតំណែង មានសិទ្ធិបញ្ជាឱ្យយកកៅអីដែលពួកគេធ្លាប់ប្រើក្នុងសភា។ លោក ទ្រូដូ មិនបានពន្យល់ពីអ្វីជុំវិញរូបថតដែលលោកកំពុងកាន់កៅអី និងពីកន្លែងដែលលោកយកកៅអីនោះទេ។
លោក ទ្រូដូ នឹងបន្តកាន់តំណែងជានាយករដ្ឋមន្ត្រីរហូតដល់ថ្ងៃប្រគល់តំណែងឲ្យលោក Carney ដែលរំពឹងទុកនៅពាក់កណ្តាលសប្តាហ៍នេះ។ នេះបើយោងតាមមន្ត្រីគណបក្សសរីនិយម។
ក្នុងរយៈពេលជិត ១ទសវត្សនៃការកាន់អំណាច លោក ទ្រូដូ បានដឹកនាំកាណាដាឆ្លងកាត់វិបត្តិជំងឺរាតត្បាតកូវីដ-១៩ និងបានចរចាឡើងវិញនូវកិច្ចព្រមព្រៀងពាណិជ្ជកម្មដ៏សំខាន់ជាមួយអាម៉េរិក ព្រមទាំងដោះស្រាយអស្ថិរភាពភូមិសាស្ត្រនយោបាយដែលបណ្តាលមកពីសង្គ្រាមរុស្ស៊ី-អ៊ុយក្រែន។
ទោះជាយ៉ាងណា ការវាយតម្លៃរដ្ឋាភិបាលដឹកនាំក្រោមរដ្ឋបាលលោក ទ្រូដូ បានធ្លាក់ប្រជាប្រិយភាពយ៉ាងខ្លាំងនៅក្នុងពាក់កណ្តាលអាណត្តិទីពីរនៃឆ្នាំ២០២៤ ដោយសារបញ្ហាប្រឈមសេដ្ឋកិច្ចជាច្រើនដូចជា អតិផរណា និងវិបត្តិលំនៅដ្ឋាន ដែលប៉ះពាល់ដល់ជំហររបស់គណបក្សសេរី។
ការដាក់ពន្ធរបស់ប្រធានាធិបតីអាម៉េរិក លោក ដូណាល់ ត្រាំ ក៏បង្កើនសម្ពាធពន្ធលើកាណាដាខ្លាំងដែរ ជាផ្នែកមួយនៃការពន្លឿនដំណើរការចុះចេញពីតំណែងរបស់លោក ទ្រូដូ។ លោកបានប្រកាសលាលែងពីតំណែងជាមេដឹកនាំបក្សសេរីនៅថ្ងៃទី៦ មករា ដោយបើកផ្លូវឲ្យគណបក្សជ្រើសរើសអ្នកស្នងតំណែង។
លោក ទ្រូដូ មិនទាន់ធ្វើសេចក្តីប្រកាសណាមួយអំពីផែនការអនាគតរបស់លោកនៅឡើយទេបន្ទាប់ពីចាកចេញពីឆាកនយោបាយ។ លោកជាអ្នកនយោបាយកាណាដា ដែលបានកាន់តំណែងជានាយករដ្ឋមន្ត្រីកាណាដាទី២៣ ចាប់តាំងពីថ្ងៃទី៤ ខែវិច្ឆិកា ឆ្នាំ២០១៥។ លោកជាមេដឹកនាំគណបក្សសេរីនិយមកាណាដា ដែលលោកបានកាន់តំណែងនេះតាំងពីឆ្នាំ ២០១៣៕
© រក្សាសិទ្ធិដោយ thmeythmey.com
Tag:
