.png)
មហាសេដ្ឋីអង់គ្លេស Ratcliffe មើលឃើញកីឡាករ Man Utd ខ្លះសមត្ថភាពមិនសមថ្លៃពលកម្ម
- ថ្ងៃអង្គារ ទី១១ ខែមីនា ឆ្នាំ២០២៥ ម៉ោង ១០:៥៩ នាទី យប់
ក្រោយពីមានបាតុកម្មរិះគន់ខ្លាំងពីសំណាក់អ្នកគាំទ្រកើតឡើង ទាក់ទងបញ្ហាក្រុមធ្លាក់ទម្រង់លេង លោក Sir Jim Ratcliffe សហម្ចាស់ក្លិប Manchester United បានចេញមុខរិះគន់ទៅកាន់កីឡាកររបស់ក្រុមបន្ថែមទៀត ដោយថាកីឡាករខ្លះមិនទាន់ល្អគ្រប់គ្រាន់ និងខ្លះមានថ្លៃពលកម្មខ្ពស់ហួសហេតុ។
ទោះបីជាក្រុមបានធ្លាក់ទម្រង់លេងខ្លាំង ក្នុងរដូវកាល ២០២៤-២៥ ក្រោមការដឹកនាំរបស់ លោក Ruben Amorim ប៉ុន្តែសហម្ចាស់ក្លិបជាមហាសេដ្ឋីអង់គ្លេស នៅតែគាំទ្រចំពោះការបំពេញការងាររបស់គ្រូបង្វឹកសញ្ជាតិព័រទុយហ្កាល់ ដែលកំពុងព្យាយាមអូសទាញក្រុម Man Utd ឱ្យវិលទៅកាន់ភាពល្អប្រសើរ។
Amorim ចូលមកជំនួសតំណែងលោក Erik ten Hag ដែលត្រូវបានបណ្តេញចេញតាំងពីខែវិច្ឆិកា ឆ្នាំ ២០២៤ ហើយចាប់តាំងពីការមកដឹកនាំក្រុមបិសាចក្រហម បុរសវ័យ ៤០ឆ្នាំ ដឹកនាំក្រុមឈ្នះតែ ៥ប្រកួតប៉ុណ្ណោះ ក្នុងលីគកំពូលអង់គ្លេស និងធ្លាក់ចេញពីពាន EFL Cup និង FA Cup។
ចាប់តាំងពីចូលមកដឹកនាំក្រុមមក លោក Amorim ជួបបញ្ហាទម្រង់លេងខ្លាំងប្រចាំលីគកំពូលអង់គ្លេស ខណៈក្រុមបន្តឈរនៅចំណាត់ថ្នាក់លេខ ១៤។ ធ្លាក់ទម្រង់លេងបែបនេះហើយ ធ្វើឱ្យអ្នកគាំទ្រជាង ១ពាន់នាក់ ចេញធ្វើបាតុកម្មក្រៅកីឡដ្ឋាន Old Trafford ប្រឆាំងទៅនឹងការដឹកនាំរបស់គ្រួសារ Glazers ជាម្ចាស់ក្លិប។
លោក Sir Jim Ratcliffe សហម្ចាស់ក្លិបដែលទិញភាគហ៊ុនក្លិប ២៥ភាគរយ បានចេញមុខបកស្រាយពីបញ្ហាបារម្ភចំពោះស្ថានភាពក្លិប កំពុងជួបប្រទះ នៅក្នុងកិច្ចសម្ភាសជាមួយទូរទស្សន៍ BBC ដូច្នេះថា៖«យើងបានទិញ Antony , Casemiro, Andre Onana, Rasmus Hojlund, Jadon Sancho។ បើទោះបីជាយើងពេញចិត្ត ឬក៏អត់ តែយើងទទួលបានរឿងនេះរួចទៅហើយ។ យើងមានតែពិនិត្យមើលរឿងនេះឡើងវិញ។ […] កីឡាករខ្លះគឺមិនទាន់ល្អគ្រប់គ្រាន់ឡើយ ហើយកីឡាករខ្លះមានថ្លៃពលកម្មថ្លៃពេក ប៉ុន្តែសម្រាប់យើង នេះគឺជាការបង្កើតក្រុមដែលពោរពេញដោយការទទួលខុសត្រូវ ហើយក៏ត្រូវការពេលវេលាដូចគ្នា។»។
មហាសេដ្ឋីអង់គ្លេស ជាម្ចាស់ក្រុមហ៊ុន INEOS ក៏បានសរសើរដល់ការដឹកនាំរបស់លោក Amorim ថាជាគ្រូបង្វឹកវ័យក្មេង និងមានសមត្ថភាពខ្លាំងក្នុងការងារ។ មហាសេដ្ឋីវ័យ ៧២ឆ្នាំ ថែមទាំងបានអះអាងទៀតថា លោកកំពុងសម្លឹងមើលការកសាងក្រុមតាមតម្រូវការរបស់អ្នកចាត់ការវ័យ ៤០ឆ្នាំ ដែលរឿងនេះនឹងធ្វើឱ្យការងាររបស់បុរសព័រទុយហ្កាល់កាន់តែល្អ សម្រាប់ការប្រកួតប្រជែង និងធ្វើការងារបានយូអង្វែង។
លើសពីនេះ លោក Jim Ratcliffe ក៏បកស្រាយទាក់ទងនឹងការកាត់ការងារនៅក្លិប Man Utd ក៏ព្រោះតែដើម្បីសន្សំសំចៃប្រាក់ ខណៈក្រុមកំពុងតែខាតបង់ប្រាក់ ហើយអាចប្រឈមអស់ប្រាក់នៅចុងបញ្ចប់ឆ្នាំ ទៅលើការងារគ្មានផលប្រយោជន៍ដល់ក្លិប៕
© រក្សាសិទ្ធិដោយ thmeythmey.com
Tag:
