.png)
.jpg)
.jpg)
នាវា២បុកគ្នាផ្ទុះឆេះ ធ្លាយប្រេងនិងសារធាតុពុល នៅសមុទ្រខាងជើង ភាគខាងកើតអង់គ្លេស
- ថ្ងៃពុធ ទី១២ ខែមីនា ឆ្នាំ២០២៥ ម៉ោង ១០:២៩ នាទី ព្រឹក
ភ្លើងកំពុងឆាបឆេះ នៅលើនាវាដឹកប្រេងសាំងយន្តហោះ បន្ទាប់ពីមានករណីបុកគ្នាជាមួយនាវាដឹកទំនិញមួយទៀត នៅសមុទ្រខាងជើង ភាគខាងកើងអង់គ្លេស ថ្ងៃទី១០មីនា២០២៥ AP - Bartek ÅmiaÅek
ដោយ៖ ម៉ម ពិសី (RFI ខេមរភាសា)
កាលពីថ្ងៃចន្ទទី១០មីនា មានករណីនាវា២គ្រឿងបុកគ្នាផ្ទុះឆេះ នៅក្នុងសមុទ្រខាងជើង ភាគខាងកើតប្រទេសអង់គ្លេស។ ផ្អែកតាមព័ត៌មានបឋម នាវាមួយជានាវាដឹកទំនិញ បានបើកបុកនាវាដឹកប្រេងដែលឈប់ចតនៅស្ងៀម បណ្តាលឲ្យផ្ទុះឆេះ។ ក្រុមសង្គ្រោះបានជួយរំដោះបានបុគ្គលិកលើនាវាទាំង២ ជាង៣០នាក់ តែមានម្នាក់បាត់ខ្លួន។ អង្គការបរិស្ថាននិងអាជ្ញាធរអង់គ្លេសមានការព្រួយបារម្ភជាខ្លាំង អំពីផលប៉ះពាល់បរិស្ថានបណ្តាលមកពីការបែកធ្លាយប្រេង និងសារធាតុពុលផ្សេងៗចូលទៅក្នុងសមុទ្រ។
ហេតុការណ៍នាវា២បុកគ្នា បានកើតឡើងនៅវេលាម៉ោងប្រមាណ៩និង៤០នាទីព្រឹកម៉ោងសកល ព្រឹកថ្ងៃចន្ទទី១០មីនា ក្នុងសមុទ្រខាងជើង នៅចម្ងាយប្រមាណ១៦គីឡូម៉ែត្រ ពីឆ្នេរតំបន់Yorkshire ភាគខាងកើតប្រទេសអង់គ្លេស។ នាវាទីមួយជាប្រទេសនាវាដឹកប្រេង ឈ្មោះ Stena Immaculate ប្រវែង១៨៣ម៉ែត្រ កម្មសិទ្ធិរបស់ក្រុមហ៊ុន Crowley ដឹកប្រេងសាំងកេរ៉ូសែន ឬសាំងយន្តហោះ ហើយដែលកងទ័ពអាមេរិកជាអ្នកប្រតិបត្តិការ។
ចំណែកនាវាទី២ គឺជានាវាដឹកទំនិញ ឈ្មោះ Solong ប្រវែង១៤០ម៉ែត្រ ដោតទង់ជាតិព័រទុយហ្កាល់ ហើយផ្អែកតាមគេហទំព័រ Lloyd’s List Interlligence គឺក្នុងពេលកើតហេតុនាវានេះមានដឹកអាល់កុល ព្រមទាំងសារធាតុ Cyanure de sodium ចំនួន១៥កុងទឺនឺ។
ផ្អែកតាមក្រុមហ៊ុន Crowley ក្នុងពេលកើតហេតុ គឺនាវាដឹកប្រេងសាំងយន្តហោះបោះយុថ្កាចតនៅស្ងៀម តែគឺនាវាដឹកនាំទំនិញ Solong ដែលបានបើកមកបុក។ ប្រភពដដែលនេះ បានឲ្យដឹងថាកម្លាំងបុក បានធ្វើឲ្យបែកប្រេះធុងស្តុកប្រេងសាំងយន្តហោះ និងបានបង្កឲ្យផ្ទុះឆាបឆេះមួយរំពេច។
ក្រោយហេតុការណ៍នេះ អាជ្ញាធរឆ្មាំសមុទ្រនិងក្រុមសង្គ្រោះអង់គ្លេស បានចេញប្រតិបត្តិការទៅរំដោះមនុស្សដែលនៅលើនាវាទាំង២។ មនុស្សចំនួន៣៦នាក់ ត្រូវបានសង្គ្រោះដឹកមកលើគោក តែខាងនាវាដឹកកុងទឺនឺ Solong គឺមានបាត់ខ្លួនបុគ្គលិកម្នាក់។ កងឆ្មាំសមុទ្រអង់គ្លេសបានឲ្យដឹងថា គេបានបិទបញ្ចប់ការរុករកអ្នកបាត់ខ្លួននេះហើយ នៅព្រឹកថ្ងៃអង្គារទី១១មីនា។
យោងតាមព័ត៌មានចុងក្រោយ គិតត្រឹមម៉ោង១១ព្រឹកថ្ងៃអង្គារ គឺអគ្គីភ័យនៅតែឆេះ មិនទាន់ពន្លត់បាននៅឡើយទេ។
គិតត្រឹមពេលនេះ នៅមិនទាន់មានតម្រុយអ្វីបញ្ជាក់អំពីមូលហេតុ ដែលបណ្តាលឲ្យនាវទាំង២នេះបុកគ្នាឡើយ។ នៅព្រឹកកើតហេតុ គេដឹងត្រឹមថាមានចុះអាប់ខ្លាំង ដែលអាចជាឧបសគ្គដល់ការធ្វើចរាចរណ៍ក្នុងសមុទ្រ។ លោក David McFarlane អ្នកជំនាញនៅ Maritime Risk and Safety Consultancy បានពន្យល់ថា ក្នុងមួយឆ្នាំមាននាវាបុកគ្នា ចន្លោះពី២០០ទៅ៣០០ករណី តែភាគច្រើនគ្រាន់ប៉ះទង្គិចកកិតបន្តិចបន្តួចប៉ុណ្ណោះ។
តាមច្បាប់កំណត់ គឺនាវាទាំងអស់ក្នុងពេលចរាចរក្នុងសមុទ្រ គឺត្រូវតែរក្សាទុកឲ្យមានមនុស្សយាមមើលផ្លូវជាប្រចាំ និងដោយត្រឹមត្រូវបំផុត។ តែអ្វីដែលគេអាចសន្និដ្ឋានបាន គឺការបុកគ្នានៅក្នុងករណីនេះ គឺប្រហែលជាមកពីគ្មានមនុស្សចាំយាមមើលផ្លូវ ទុកឲ្យពីឡុតអូតូម៉ាទិកជាអ្នកបញ្ជានាវាទាំងស្រុង។ យ៉ាងណាក៏ដោយ ក្រុមស៊ើបអង្កេតគ្រោះថ្នាក់ផ្លូវសមុទ្រ កំពុងរងចាំឲ្យភ្លើងរលត់ ដើម្បីចូលទៅយកទិន្នន័យប្រព័ន្ធរ៉ាដា និងរូបភាពថតដោយកាម៉េរ៉ាសុវត្ថិភាព យកមកពិនិត្យ។
ដោយឡែក ករណីនាវាបុកគ្នាផ្ទុះឆេះនេះ បានបង្កឲ្យមានការព្រួយបារម្ភជាខ្លាំង ទាក់ទិននឹងផលប៉ះពាល់បរិស្ថាន ដោយសារតែប្រេងសាំងកេរ៉ូសែន ព្រមទាំងសារធាតុពុលផ្សេងទៀត បានបែកធ្លាយចូលសមុទ្រ។ អង្គការ Greenpeace បានទាញសញ្ញាអាសន្ន ថាសារធាតុពុលទាំងនេះ នឹងទៅបំផ្លាញប្រព័ន្ធជីវចម្រុះ និងជីវិតសត្វក្នុងសមុទ្រ។
តែយ៉ាងណា លោកIvan Vince នាយកការិយាល័យ ASK Consultants បានអះអាងថា ប្រេងសាំងកេរ៉ូសែន ឬសាំងយន្តហោះស្រាល ងាយហើរណាស់។ ដូច្នេះ មួយផ្នែកធំនៃកេរ៉ូសែនដែលធ្លាយចូលសមុទ្រនឹងហើរអស់ មិនជាប់នៅក្នុងទឹកយូរឡើយ ហើយបើនៅជាប់ខ្លះ ក៏ប្រព័ន្ធមីក្រូសរីរាង្គសមុទ្រស៊ីបំផ្លាញអស់ដែរ។ យ៉ាងណាក៏ដោយ អ្នកនាំពាក្យខុទ្ទកាល័យនាយករដ្ឋមន្ត្រីអង់គ្លេស បានបញ្ជាក់ថាអាជ្ញាធរមានការព្រួយបារម្ភ មិនធ្វេសប្រហែសឡើយ ហើយនឹងធ្វើការវាយតម្លៃលម្អិត ដើម្បីចាត់វិធានការទប់ស្កាត់ផលប៉ះពាល់ណាមួយ មកលើបរិស្ថានធម្មជាតិ ឲ្យបានទាន់ពេលវេលា៕
© រក្សាសិទ្ធិដោយ thmeythmey.com
