.png)
.jpg)
.jpg)
លោក ហ៊ុន ម៉ានី ស្នើអភិបាលរាជធានី-ខេត្ត ផ្អាកផ្ទេរមន្ត្រីដែលកំពុងធ្វើការងារនៅមណ្ឌលសុខភាព
- ថ្ងៃពុធ ទី១២ ខែមីនា ឆ្នាំ២០២៥ ម៉ោង ១២:២៩ នាទី រសៀល
លោកឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ។ រូបភាពពីក្រសួងមុខងារសាធារណៈ
ភ្នំពេញ៖ តាមលិខិតមួយចុះថ្ងៃទី១០ មីនា លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានជម្រាបទៅកាន់អភិបាលរាជធានី-ខេត្ត ដោយស្នើសុំផ្អាកការផ្ទេរមន្ត្រីរាជការស៊ីវិលដែលកំពុងបំពេញការងារនៅតាមមណ្ឌលសុខភាព។ បើតាមលោក ហ៊ុន ម៉ានី ការផ្អាកនេះ ដើម្បីឱ្យការជ្រើសរើសមន្ត្រីសុខាភិបាលផ្អែកលើកិច្ចព្រមព្រៀងការងារប្រព្រឹត្តទៅស្របតាមគោលការណ៍កំណត់។
ក្រសួងមុខងារងារសាធារណៈ បានឱ្យដឹងថា នាពេលកន្លងមក ក្រសួងបានស្នើសុំកិច្ចសហការពីរដ្ឋបាលរាជធានី-ខេត្ត ក្នុងការធ្វើបច្ចុប្បន្នភាពការប្រើប្រាស់មន្ត្រីក្របខណ្ឌ មន្ត្រីជាប់កិច្ចសន្យា និងបុគ្គលិកស្ម័គ្រចិត្ត ដែលកំពុងបម្រើការងារនៅតាមមណ្ឌលសុខភាពគោលដៅ។ ក្រោយមកមណ្ឌលសុខភាពបានប្រកាស នឹងបញ្ជាក់ច្បាស់លាស់អំពីព័ត៌មាន ទិន្នន័យ និងតម្រូវការមន្ត្រីសុខាភិបាល ដែលនឹងត្រូវជ្រើសរើសផ្អែកលើកិច្ចព្រមព្រៀងការងារ។
បន្ទាប់ពីទទួលបានព័ត៌មាន និងទិន្នន័យច្បាស់លាស់ ក្រសួងមុខងារសាធារណៈ សម្រេចផ្អាកការផ្ទេរមន្រ្តីនៅតាមមណ្ឌលសុខភាព ដើម្បីអនុវត្តផែនការសកម្មភាពនៃវិធានការគន្លឹះក្នុងវិស័យសុខាភិបាលឆ្នាំ២០២៤-២០២៧ ដែលផ្តោតលើការពង្រឹងសមត្ថភាពមណ្ឌលសុខភាព ក្នុងការផ្តល់សេវាថែទាំសុខភាពជូនពលរដ្ឋប្រកបដោយគុណភាព រួមទាំងការអនុវត្តវិធានការគន្លឹះទី១។
លើសពីនេះ ការផ្អាកនេះ ក៏ដើម្បីអនុវត្តតាមការជ្រើសរើសមន្ត្រីចូលបម្រើការងារប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព និងស្របតាមអភិក្រមរបស់ប្រមុខរាជរដ្ឋាភិបាល «រើសឱ្យចំ បំពេញឱ្យត្រូវ រក្សាឱ្យនៅ»។ ទន្ទឹមនឹងនេះ ក្រសួងមុខងារសាធារណៈ មានបំណងគ្រប់គ្រងឱ្យបានស្ថានភាពមន្ត្រីរាជការស៊ីវិលដែលកំពុងបំពេញការងារនៅតាមមណ្ឌលសុខភាព ឱ្យមានស្ថិរភាព និងប្រសិទ្ធភាព។
ក្រសួងមុខងារសាធារណៈ ស្នើសុំការចូលរួមសហការពីអភិបាលរាជធានី-ខេត្ត ក្នុងការផ្អាកការផ្ទេរមន្ត្រីរាជការស៊ីវិលដែលកំពុងបំពេញការងារនៅតាមមណ្ឌលសុខភាព ដើម្បីឱ្យការជ្រើសរើសមន្ត្រីសុខាភិបាលផ្អែកលើកិច្ចព្រមព្រៀងការងារប្រព្រឹត្តទៅស្របតាមគោលការណ៍កំណត់។ សូមបញ្ជាក់ថា ក្រសួងមុខងារសាធារណៈ ជាសេធិការបស់រដ្ឋាភិបាល ក្នុងការកែទម្រង់រដ្ឋបាលសាធារណៈ នៅក្នុងនីតិកាលទី៧នេះ៕
© រក្សាសិទ្ធិដោយ thmeythmey.com
Tag:
