.png)
កម្ពុជា-សិង្ហបុរី រំពឹងថាអាចបញ្ចប់កិច្ចព្រមព្រៀមឥណទានកាបូន នៅឆ្នាំនេះ
- ថ្ងៃពុធ ទី១២ ខែមីនា ឆ្នាំ២០២៥ ម៉ោង ១:៥៩ នាទី រសៀល
សម្តេច ហ៊ុន សែន ប្រមុខរដ្ឋស្តីទីកម្ពុជា(ស្តាំ) និងលោកស្រី Teo Lay Cheng ឯកអគ្គរដ្ឋទូតសិង្ហបុរីប្រចាំកម្ពុជា(ឆ្វេង)។ រូបភាព៖ ទំព័រហ្វេសប៊ុកសម្តេច ហ៊ុន សែន
កម្ពុជា និងសិង្ហបុរី រំពឹងថា នឹងអាចបញ្ចប់កិច្ចព្រមព្រៀង ទាក់ទងនឹងឥណទានកាបូន (Carbon Credit) នៅឆ្នាំ២០២៥នេះ ដែលជាខួបលើកទី៦០ឆ្នាំនៃទំនាក់ទំនងការទូតនៃ ប្រទេសទាំងពីរ។ ការរំពឹងបែបនេះរបស់ប្រទេសទាំងពីរ គឺធ្វើឡើងក្នុងពេលសម្តេច ហ៊ុន សែន ប្រមុខរដ្ឋស្តីទី បានទទួលជួប លោកស្រី Teo Lay Cheng ឯកអគ្គរដ្ឋទូតសិង្ហបុរីប្រចាំកម្ពុជា កាលពីថ្ងៃទី១១ ខែមីនា។
ទំព័រហ្វេសប៊ុកសម្តេច ហ៊ុន សែន បានផ្សាយថា នៅក្នុងជំនួបនោះ លោកស្រី Teo Lay Cheng បានបញ្ជាក់បន្ថែមថា ការបញ្ចប់កិច្ចព្រមព្រៀងនេះ គឺបង្ហាញពីការប្តេជ្ញារបស់កម្ពុជា និងសិង្ហបុរី ចំពោះការប្រែប្រួលអាកាសធាតុ ដែលជាបញ្ហាសកល។ ក្រៅពីនេះ ឯកអគ្គរដ្ឋទូតសិង្ហបុរី ក៏ប្តេជ្ញាជំរុញការធ្វើពាណិជ្ជកម្ម និងការវិនិយោគសិង្ហបុរីមកកាន់កម្ពុជាបន្ថែមទៀត ក្នុងអាណត្តិការទូតរបស់ខ្លួន និងនៅពេលខាងមុខ។
អ្នកការទូតរូបនេះ ក៏សង្ឃឹមដែរថា ក្រោមការដឹកនាំរបស់អ្នកបន្តវេន ដែលមានសម្ដេច ហ៊ុន ម៉ាណែត ជានាយករដ្ឋមន្ត្រី ខ្លួននឹងអាចឃើញពីការអភិវឌ្ឍ ក៏ដូចជាសមិទ្ធផលថ្មីៗជាច្រើនទៀតរបស់កម្ពុជា ដូចជាការសម្ពោធនៅព្រលានយន្តហោះភ្នំពេញថ្មីជាដើម។
ជាការឆ្លើយតប សម្តេច ហ៊ុន សែន បានស្វាគមន៍និងសង្ឃឹមដូចគ្នាថា កិច្ចព្រមព្រៀងឥណទានកាបូន នឹងអាចបញ្ចប់នៅឆ្នាំក្រោយ ជាមួយនឹងជំនឿថា កិច្ចសហប្រតិបត្តិការឥណទានកាបូនេះ អាចជាគំរូដ៏ល្អសម្រាប់ពិភពលោក។
បើតាមសម្ដេច ហ៊ុន សែន នៅចំពោះមុខបញ្ហាជាច្រើននៅក្នុងតំបន់ និងពិភពលោក ជាពិសេសបញ្ហាសង្គ្រាមពាណិជ្ជកម្មដែលកំពុងកើតឡើង ទាមទារឱ្យ កម្ពុជា និងសិង្ហបុរី ត្រូវពង្រឹងកិច្ចសហប្រតិបត្តិការបន្ថែមទៀតដែរ។
«កន្លងមក យើងច្រើនមើលទៅលើទីផ្សារឆ្ងាយ ឥឡូវយើងត្រូវសម្លឹងមើលទីផ្សារដែលនៅជិតនៅភូមិផងរបងជាមួយគ្នា ជាពិសេសប្រទេសក្នុងតំបន់អាស៊ាន និង RCEP ពីព្រោះក្នុងក្របខណ្ឌអាស៊ាន យើងមានប្រជាជនរហូតទៅដល់ ៦០០ លាននាក់ និង RCEP មានដល់ ២ ០០០ លាននាក់ ដែលនេះជាទីផ្សារមួយដ៏ធំមួយ គួរយើងត្រូវយកចិត្តទុកដាក់នូវអំណោយផលសម្រាប់ការធ្វើពាណិជ្ជកម្ម។»។ សម្តេច ហ៊ុន សែន បន្ថែមបែបនេះ ដោយបន្តថា សម្តេច ហ៊ុន សែន ក៏ចង់ឃើញការបង្កើនជើងហោះហើរត្រង់រវាងកម្ពុជា និងសិង្ហបុរី បន្ថែមទៀតដែរ ដើម្បីផ្សារភ្ជាប់ទំនាក់ទំនងកាន់តែជិតស្និទ្ធ។ ទន្ទឹមនឹងនេះ ប្រមុខរដ្ឋស្តីទី សង្ឃឹមថា ទំហំពាណិជ្ជកម្មរវាងប្រទេសទាំងពីរ នឹងត្រូវបានជំរុញបន្ថែមទៀត ស្របពេលខួបទី៦០ នៃទំនាក់ទំនងការទូត នឹងចូលមកដល់ ខណៈបច្ចុប្បន្ន ទំហំពាណិជ្ជកម្មទ្វេភាគី កម្ពុជា-សិង្ហបុរី មានជាង១ពាន់លានដុល្លារ។
សូមរំឭកថាគម្រោងបង្កើតកិច្ចព្រមព្រៀងឥណទានកាបូន រវាងកម្ពុជា និងសិង្ហបុរីនេះ ត្រូវបានធ្វើឡើង ក្នុងអំឡុងពេលទស្សនកិច្ចរបស់ សម្តេច ហ៊ុន ម៉ាណែត នាយករដ្ឋមន្ត្រីកម្ពុជា នៅប្រទេសសិង្ហបុរី កាលពីពាក់កណ្តាលឆ្នាំ២០២៤កន្លងទៅ។
សូមជម្រាបថា ក្នុងមួយឆ្នាំៗ កម្ពុជាអាចផលិតកាបូន បានលើ១០លានតោន។ ចាប់តាំងពីឆ្នាំ២០១៦ ដល់២០២០ កម្ពុជា លក់ឥណទានកាបូន ស្ថិតនៅដែនជម្រកសត្វព្រៃតាតៃ ក្នុងខេត្តកោះកុង និងដែនជម្រកសត្វព្រៃកែវសីមាក្នុងខេត្តមណ្ឌលគិរី បាន ១១,៦ លានដុល្លារ ក្នុងក្របខណ្ឌទីផ្សារស្ម័គ្រចិត្ត។ ថវិកា ដែលទទួលបានពីការលក់កាបូន គឺយកទៅអភិវឌ្ឍសហគមន៍ និងតំបន់អភិរក្សធនធានធម្មជាតិផ្សេងៗ។ នេះបើតាមក្រសួងបរិស្ថាន។
កម្ពុជា ក៏មានគម្រោងលក់ឥណទានកាបូព្រៃឡង់ទៅកាន់ទីផ្សារអន្តរជាតិដែរ។ ដោយឡែក ឥណទានកាបូនរបស់គម្រោង «រេដបូកតំបន់ជួរភ្នំក្រវាញខាងត្បូង» ដែលគ្រប់គ្រងដោយអង្គការសម្ព័ន្ធមិត្តសត្វព្រៃ (Wildlife Alliance) ក៏ត្រូវបានភ្នាក់ងារឥណទានកាបូន (VERRA) បើកឱ្យលក់វិញដែរ កាលពីអំឡុងខែកញ្ញា ឆ្នាំ២០២៤ ក្រោយភ្នាក់ងារនេះ បានផ្អាកជាង១ឆ្នាំ ដើម្បីស៊ើបអង្កេតពាក់ព័ន្ធនឹងរឿងបំពានសិទ្ធិមនុស្ស និងការគ្រប់គ្រងធនធានធម្មជាតិ។
អត្ថបទទាក់ទង
© រក្សាសិទ្ធិដោយ thmeythmey.com
