.png)
.jpg)
.jpg)
អ.ស.ប.ព្រមានពីផលប៉ះពាល់ជីវិតមនុស្សរាប់លាននាក់ ក្រោយអាមេរិកផ្តាច់ជំនួយ
- ថ្ងៃពុធ ទី១២ ខែមីនា ឆ្នាំ២០២៥ ម៉ោង ៩:២៩ នាទី យប់
អង្គការសហប្រជាប្រជាតិ ព្រមានពីផលប៉ះពាល់ដល់អាយុជីវិតមនុស្សរាប់លាននាក់ ក្រោយអាមេរិកផ្តាច់ជំនួយ។ REUTERS - Kent Nishimura
ដោយ៖ ហេង ឧត្តម (RFI ខេមរភាសា)
សហរដ្ឋអាមេរិកធ្លាប់តែជាប្រទេសម្ចាស់ជំនួយធំជាងគេក្នុងគម្រោងមនុស្សធម៌ពិភពលោក តែរដ្ឋាភិបាលក្រុងវ៉ាស៊ីនតោនក្រោមអំណាចរបស់លោក ដូណាល់ ត្រាំ បានប្រកាសរឹតត្បឹតកាត់បន្ថយចំណាយថវិកាជាតិ ដោយត្រូវផ្តាច់ជំនួយអន្តរជាតិ ជាង ៨០ %។ ស្ថាប័នអន្តរជាតិនិងអង្គការមនុស្សធម៌នានា ដែលធ្លាប់ទទួលជំនួយអាមេរិក បានចេញមុខដាស់តឿនអំពីគ្រោះថ្នាក់ ដោយបញ្ជាក់ថាការផ្តាច់ជំនួយមនុស្សធម៌អាមេរិក នឹងធ្វើឲ្យប៉ះពាល់ដល់អាយុជីវិតមនុស្សរាប់លាននាក់ នៅទូទាំងពិភពលោក។
រដ្ឋមន្ត្រីការបរទេសអាមេរិក លោក ម៉ារកូ រូប៊ីយ៉ូ ប្រកាសថា ក្រោយបានសិក្សានិងពិចារណា អស់រយៈ ៦ សប្តាហ៍រួចមក រដ្ឋាភិបាលអាមេរិកបានសម្រេចលុបចោល កិច្ចសន្យាផ្តល់ជំនួយ ៥ ២០០ ដែលត្រូវខាតបង់ថវិកាជាតិ រាប់សិបពាន់លានដុល្លារ និងដែលប្រើប្រាស់មិនត្រូវចំគោលដៅផលប្រយោជន៍របស់សហរដ្ឋអាមេរិក។ ប្រមុខទូតអាមេរិកបញ្ជាក់ទៀតថាទុកតែកម្មវិធីជំនួយ ប្រមាណ ១ ០០០ គម្រោងតែប៉ុណ្ណោះ។
ការកាត់បន្ថយចំណាយរបស់រដ្ឋាភិបាលទីក្រុងវ៉ាស៊ីនតោនពេលនេះ ជះឥទ្ធិពលប៉ះពាល់ដល់កម្មវិធីជំនួយមនុស្សធម៌និងជំនួយអភិវឌ្ឍន៍ ប្រមាណ ៨៣% របស់ទីភ្នាក់ងារអាមេរិកដើម្បីអភិវឌ្ឍអន្តរជាតិ ហៅកាត់ជាភាសាអង់គ្លេស U.S.A.I.D. ហើយដែលអាចស្មើនឹងទំហំទឹកប្រាក់ ៤២,៨ ពាន់លានដុល្លារ។
ជារួម ផលវិបាកបានជះឥទ្ធិពលខ្លាំងទៅលើកម្មវិធីសិទ្ធិមនុស្ស សិទ្ធិក្រុមជនជាតិដើមភាគតិច សិទ្ធិអ្នកស្រឡាញ់ភេទដូចគ្នានិងអ្នកកែភេទ បរិស្ថានអាកាសធាតុ កម្មវិធីព្យាបាលសុខភាព កម្មវិធីជំនួយថែទាំមាតានិងទារកស្បៀង ព្រមទាំងអាហារូបត្ថម្ភ ។ល។
ជាក់ស្តែង ក្នុងវិស័យសិទ្ធិមនុស្ស គម្រោងធំៗរបស់អង្គការសហប្រជាប្រជាតិ នឹងត្រូវកាត់ផ្តាច់ ឬត្រូវបង្ខំចិត្តកែសម្រួលបន្ថយសកម្មភាព។ នេះបើតាម លោកស្រី Ravina Shamdasani អ្នកនាំពាក្យឧត្តមស្នងការដ្ឋានសិទ្ធិមនុស្ស នៃអង្គការសហប្រជាប្រជាតិ ដែលបញ្ជាក់ទៀតថា កម្មវិធីសិទ្ធិមនុស្សនៅប្រទេសហ្គីណេ អ៊ីរ៉ាក់ អ៊ុយក្រែន កូឡុំប៊ី និងមូលនិធិសម្រាប់សិទ្ធិជនជាតិដើមភាគតិច ត្រូវប៉ះពាល់ជាខ្លាំង។
ចំពោះការប៉ះពាល់ដល់វិស័យវិទ្យាសាស្ត្រ សូមអានទីនេះ៖ «អ្នកវិទ្យាសាស្ត្រអាមេរិកបាតុកម្មប្រឆាំងនឹងនយោបាយបណ្តេញបុគ្គលិក»
រីឯ អង្គការសាមគ្គីភាពអន្តរជាតិ Solidarités International ដែលទទួលជំនួយ ៦០លានដុល្លារពី U.S.A.I.D. បានអះអាងថានឹងប៉ះពាល់ដល់គម្រោងការងាររបស់ខ្លួននៅអាហ្វហ្កានីស្ថាន ដែលជួយលើកកម្ពស់ជីវភាពស្ត្រីជាង ១ ម៉ឺននាក់ ក្នុងវិស័យកសិកម្ម។
កាលពីចុងខែកុម្ភៈ អង្គការមូលនិធិប្រជាជនរបស់អង្គការសហប្រជាជាតិ (UNFPA) ធ្លាប់បានបញ្ជាក់ ថា ជំនួយអាមេរិក ៣៧៧ លានដុល្លារ បានជួយជ្រោមជ្រែងយ៉ាងចម្បងដល់ការថែទាំសុខភាពម្តាយនិងទារក បង្ការអំពើហិង្សាលើស្ត្រី ជំនួយដល់រងគ្រោះព្រោះរំលោភសេពសន្ធវៈ និងព្យាបាលជំងឺធ្ងន់ធ្ងរផ្សេងៗនៅរាប់សិបប្រទេស។
ចំណែក លោកស្រី Anne Bideau អគ្គនាយិកាអង្គការ Plan International ប្រចាំប្រទេសបារាំងសង្កត់ធ្ងន់ដែរថា ការជួយស្ត្រីឲ្យទទួលបានសេវាកម្មសម្ភពព្យាបាល អាចនឹងលំបាកកាន់តែខ្លាំង ខណៈពេលដែល ការឆ្លងទន្លេប្រសូត្របុត្រ ជាមូលហេតុចម្បងនៃមរណភាពមាតា នៅក្នុងប្រទេសក្រីក្រ។
Plan International ទទួលជំនួយអាមេរិក ៤០លានដុល្លារសម្រាប់កម្មវិធីលើកកម្ពស់សមភាពប្រុស-ស្រី។ ការបិទខ្ទប់ជំនួយអាមេរិកគ្រានេះ ធ្វើឲ្យប៉ះពាល់ដល់គម្រោងធំៗយ៉ាងហោច ១៣ ដែលប្រជាជន ១ លាន ៥ សែននាក់ ទទួលផលនៅក្នុង១២ប្រទេស។ គម្រោងជួយប្រឆាំងនឹងការរៀបអាពាហ៍ពិពាហ៍របស់ក្មេងស្រី នៅបង់ក្លាដែស ច្បាស់ជាប៉ះពាល់ ហើយគម្រោងថែទាំម្តាយនិងទារកនៅអេត្យូពី ជាដើម ក៏ប៉ះពាល់ដែរ។ នេះបើតាមអង្គការ Plan International ។
អង្គការយូនីសេហ្វ ដែលធ្វើកិច្ចការទាក់ទងនឹងកុមារនិងក្មេងតូច បានដាស់តឿនថា បើគ្មានជំនួយថ្មីមកជំនួសជាបន្ទាន់នោះទេ កុមាររាប់លាននាក់ នឹងត្រូវរងគ្រោះព្រោះខ្វះអាហារូបត្ថម្ភ និងកាន់តែខ្វះឱកាសទទួលការរៀនសូត្រ។ មិនតែប៉ុណ្ណោះ ជំងឺតូចតាចខ្លះ ដែលអាចជៀសបានសោះ តែត្រូវធ្វើទុក្ខទោសនិងរីករាលដាល នាំឲ្យបង្កការលំបាកច្រើនឡើងៗ។ ទន្ទឹមនឹងគ្នានេះ អង្គការសុខភាពពិភពលោក ព្រមានថា បើគ្រាន់តែគិតត្រឹមតែអ្នកកើតជំងឺរបេង ការផ្តាច់ជំនួយអាមេរិក អាចនឹងធ្វើឲ្យមនុស្សរាប់លាននាក់ បាត់បង់ជីវិត៕
© រក្សាសិទ្ធិដោយ thmeythmey.com
