.png)
រដ្ឋមន្ត្រីយុត្តិធម៌ បន្ទោសសាលាឧទ្ធរណ៍មួយចំនួន ដែលចេញសាលក្រម សាលដីកា គ្មាន សំអាងហេតុ
- ថ្ងៃព្រហស្បតិ៍ ទី១៣ ខែមីនា ឆ្នាំ២០២៥ ម៉ោង ៤:៤៩ នាទី រសៀល
លោក កើត រិទ្ធ រដ្ឋមន្ត្រីក្រសួងយុត្តិធម៌។ រូបពីក្រសួងយុត្តិធម៌
ភ្នំពេញ៖ លោក កើត រិទ្ធ រដ្ឋមន្ត្រីក្រសួងយុត្តិធម៌ ហួសចិត្តសាលាឧទ្ធរណ៍មួយចំនួន ចេញ សាលក្រម សាលដីកា ដោយមិនមានសំអាងហេតុផ្ទាល់ខ្លួន ក្នុងនាមជាតុលាការជាន់ទី ពីរ។ រដ្ឋមន្ត្រីលើកឡើងបែបនេះ ក្នុងពិធីបើកសន្និបាតបូកសរុបលទ្ធផលការងារវិស័យ យុត្តិធម៌ឆ្នាំ២០២៤ និងកំណត់ទិសដៅការងារជាអាទិភាពឆ្នាំ២០២៥ របស់ក្រសួងយុត្តិធម៌ កាលពីរសៀលថ្ងៃទី១២ ខែមីនា។
នៅចំពោះមុខអង្គសន្និបាតដែលមានអ្នកចូលប្រមាណ៤០០នាក់ លោក កើត រិទ្ធ អះអាងថា បានពិនិត្យមើលសាលក្រម សាលដីកាជាច្រើន ដោយកត់សម្គាល់ឃើញ ពីភាពអសកម្មរបស់ស្ថាប័នតុលាការ។
រដ្ឋមន្ត្រីហួសចិត្ត ដែលសាលាឧទ្ធរណ៍ ឬតុលាការជាន់ទីរ ចេញសាលដីកា ដោយគ្មានសំអាងហេតុ ខណៈសំអាងហេតុជាមូលដ្ឋានដ៏សំខាន់ ក្នុងដំណើរការសំណុំរឿង។ រដ្ឋមន្ត្រីសង្កត់ធ្ងន់បែបនេះ ៖«សាលដីកាមួយចំនួន អត់មានសំអាងហេតុទេ ដោយសារគាត់ថា គាត់ឯកភាពទាំងស្រុងតាមសំអាងហេតុរបស់សាលាដំបូង។ ជាតុលាការជាន់ទី២ ប៉ុន្តែគ្មានសំអាងហេតុផ្ទាល់ខ្លួន យើងគិតមើល! សាលដីកា(បែប)ហ្នឹងមាន។ អ៊ីចឹងយើងត្រូវផ្លាស់ប្តូរ ទាំងឥរិយាបថក្នុងការធ្វើការងាររបស់យើងផង ប៉ុន្តែយើងត្រូវបង្កើនភាពប្រុងប្រយ័ត្ន ភាពម៉ត់ចត់របស់យើង នៅក្នុងការសរសេរសេចក្តីសំអាងហេតុ។»។
បញ្ហានេះ លោក កើត រិទ្ធ ពិនិត្យឃើញ កើតមានច្រើននៅពេលលោកយកសាលក្រម និងសាលដីកាមកអាន។ យ៉ាងណាក៏ដោយ បច្ចុប្បន្នលោកពិនិត្យឃើញ ពុំសូវមានមានច្រើនឡើយ។លោក កើត រិទ្ធ ក៏បានព្រមានដែរ ថ្ងៃមុខបើមានការស្រាវជ្រាវ ឬស្ទង់មតិ អាចនឹងរកឃើញថា ការសម្រេចរបស់សាលាឧទ្ធរណ៍ ភាគច្រើនផ្អែកតាមសំអាងហេតុរបស់សាលាដំបូង។
ជាមួយគ្នាដែររដ្ឋមន្ត្រីក្រសួងយុត្តិធម៌ ក៏បានរំឭកពីស្មារតីនៃការបង្កើតសាលាឧទ្ធរណ៍ ដើម្បីស្រាវជ្រាវរកអង្គហេតុនៃសំណុំរឿង ដែលសាលាដំបូងបានសម្រេចឡើងវិញ។ ដូច្នេះ លោក បញ្ជាក់បន្ថែមថា នឹងរៀបចំឱ្យមានកិច្ចប្រជុំនៅពេលខាងមុខ ដើម្បីជជែកពី ការចេញសាលក្រម សាលដីកា រួមទាំងបញ្ហាជុំវិញករណីនេះ។
សូមស្ដាប់ប្រសាសន៍របស់ លោក កើត រិទ្ធ រដ្ឋមន្ត្រីក្រសួងយុត្តិធម៌៖
© រក្សាសិទ្ធិដោយ thmeythmey.com
Tag:
