.png)
ប្រធានភ្នាក់ងារស៊ើបការណ៍អាមេរិក និង រុស្ស៊ី ជួបគ្នាតាមទូរសព្ទ ក្រោយដាច់ទំនាក់ទំនង៣ឆ្នាំ
- ថ្ងៃព្រហស្បតិ៍ ទី១៣ ខែមីនា ឆ្នាំ២០២៥ ម៉ោង ៥:១៩ នាទី ល្ងាច
ប្រធានភ្នាក់ងារចារកិច្ចអាមេរិកនិងរុស្ស៊ីជួបគ្នាតាមទូរសព្ទ ក្រោយដាច់ទំនាក់ទំនង៣ឆ្នាំ AP - Andrew Harnik
ដោយ៖កែវ ឆាយា (RFI ខេមរភាសា)
ថ្ងៃពុធទី ១២ ខែមីនា ទីភ្នាក់ងារព័ត៌មានផ្លូវការរុស្ស៊ី បានផ្សាយឲ្យដឹងថា ប្រធានស្ថាប័នស៊ើបការណ៍ក្រៅប្រទេសរបស់រុស្ស៊ី លោក Serguei Naryshkine បានជួបសន្ទនាតាមទូរសព្ទ ជាមួយប្រធានស្ថាប័នស៊ើបការណ៍អាមេរិក CIA លោក John Ratcliffe។ នេះជាកិច្ចសន្ទនាលើកទី១ រវាងថ្នាក់ដឹកនាំនៃស្ថាប័នទាំងពីរ គិតតាំងពីពេល ដែលរុស្ស៊ី បានវាយលុកចូលអ៊ុយក្រែន ក្នុងខែ កុម្ភៈឆ្នាំ ២០២២ កន្លងទៅ។
ក្នុងកិចុ្ចសន្ទនាគ្នានេះ លោក Naryshkine និង លោក Ratcliffe បានឯកភាពគ្នាលើការ រក្សាទំនាក់ទំនងរវាង ស្ថាប័ន SVR និង CIA ដើម្បីរួមគ្នាធានាស្ថិរភាព និងសន្តិសុខអន្តរជាតិ ព្រមទាំងបន្ធូរបន្ថយការប្រឈមមុខដាក់គ្នារវាង ក្រុងម៉ូស្គូ និងវ៉ាស៊ីនតោន។ នេះបើតាមសេចក្តីថ្លែងការណ៍ ដែលផ្សាយដោយទីភ្នាក់ងារព័ត៌មានរុស្ស៊ី TASS។
សេចក្តីប្រកាសអំពីកិច្ចសន្ទនាតាមទូរសព្ទខាងលើ បន្លឺឡើង ចំពេលដែល អ៊ុយក្រែន កាលពីថ្ងៃអង្គារទី១១ មីនា ថ្មីៗនេះ បានសុខចិត្តទទួលយកសំណើរបស់សហរដ្ឋអាមេរិក ឲ្យមានបទឈប់បាញ់រយៈពេល ៣០ថ្ងៃ ជាមួយភាគីរុស្ស៊ី។ អ៊ុយក្រែន អះអាងថា កំពុងត្រៀមខ្លួនជាស្រេច ដើម្បីស្វែងរកសន្តិភាព និងខណ្ឌបញ្ចប់សង្គ្រាមដែលអន្លាយមកអស់ជាង ៣ឆ្នាំ មកនេះ។
ជាការឆ្លើយតបនឹងគោលជំហរថ្មីរបស់អ៊ុយក្រែន អាមេរិកបានប្រកាសមួយរំពេចថា នឹងផ្តល់ជំនួយយោធា និងចែករំលែកព័ត៌មានសម្ងាត់ៗនានា ទៅឲ្យអ៊ុយក្រែនឡើងវិញ៕
© រក្សាសិទ្ធិដោយ thmeythmey.com
