.png)
.jpg)
.jpg)
នៅអ.ស.ប. ពលរដ្ឋប៉ាឡេស្ទីន បកអាក្រាតអំពើហិង្សាផ្លូវភេទពីសំណាក់អុីស្រាអែល
- ថ្ងៃព្រហស្បតិ៍ ទី១៣ ខែមីនា ឆ្នាំ២០២៥ ម៉ោង ៩:២៩ នាទី យប់
លោក Chris Sidoti ជាសមាជិកគណៈកម្មការស៊ើបអង្កេតឯករាជ្យរបស់ ក្រុមប្រឹក្សាសិទ្ធិមនុស្សអង្គការសហប្រជាជាតិ ដែលស៊ើបអង្កេតស្តីអំពីស្ថានភាពសិទ្ធិពលរដ្ឋប៉ាឡេស្ទីន ក្នុងតំបន់ដែលអ៊ីស្រាអែលធ្វើអាណានិគមកិច្ច។ AP - Martial Trezzini
ដោយ៖ ហេង ឧត្តម (RFI ខេមរភាសា)
ប្រជាពលរដ្ឋប៉ាឡេស្ទីន បានផ្តល់សក្ខីកម្មដោយបកអាក្រាត ពីទារុណកម្មនិងអំពើហិង្សាផ្លូវភេទ ដែលបង្កឡើងពីសំណាក់ទាហាន អ្នកសួរចម្លើយ និងឆ្មាំពន្ធនាគារអ៊ីស្រាអែល។ ការចេញមុខរិះគន់សកម្មភាពអមនុស្សធម៌របស់អ៊ីស្រាអែលនៅពេលនេះ ឋិតក្នុងក្របខណ្ឌស៊ើបអង្កេតរបស់អង្គការសហប្រជាជាតិ ស្តីអំពីស្ថានភាពសិទ្ធិពលរដ្ឋប៉ាឡេស្ទីន ក្នុងតំបន់អាណានិគមកិច្ចត្រួតត្រាដោយអ៊ីស្រាអែល។
អ៊ីស្រាអែល បានប្រព្រឹត្តអំពើហិង្សា ធ្វើទារុណកម្មរាយកាយ និងវាយដំប្រដាប់ភេទ ទៅលើក្រុមអ្នកទោសប៉ាឡេស្ទីន ដែលជាប់ក្នុងពន្ធនាគារ អ៊ីស្រាអែល ហើយពលរដ្ឋប៉ាឡេស្ទីនក្នុងតំបន់អាណានិគមកិច្ចដែលអ៊ីស្រាអែលត្រួតត្រា ក៏ត្រូវទាហានអ៊ីស្រាអែលជាន់ឈ្លីដូចគ្នាដែរ។ នេះបើតាមសក្ខីកម្មរបស់ប្រជាពលរដ្ឋប៉ាឡេស្ទីន ដែលបានថ្លែងប្រាប់គណៈកម្មការស៊ើបអង្កេតឯករាជ្យមួយ របស់ ក្រុមប្រឹក្សាសិទ្ធិមនុស្សអង្គការសហប្រជាជាតិ។ ពីស្នាក់ការអង្គការសហប្រជាជាតិ នៅទីក្រុងហ្សឺណែវ ប្រទេសស្វីស លោក Chris Sidoti ជាសមាជិកគណៈកម្មការស៊ើបអង្កេតឯករាជ្យនេះ បានសង្កត់ធ្ងន់អំពីសារៈសំខាន់នៃសក្ខីកម្មរបស់ពលរដ្ឋប៉ាឡេស្ទីន និងថា ពាក្យសម្តីរបស់ក្រុមជនរងគ្រោះ គួរតែត្រូវគេយកចិត្តទុកដាក់ស្តាប់ និងជួយដឹងឮ។
ក្នុងសក្ខីកម្មតាមរយៈវីដេអូ ជនជាតិប៉ាឡេស្ទីន លោក Said Abdel Fattah បានរៀបរាប់ថា អ្នកសួរចម្លើយអ៊ីស្រាអែល បានវាយធ្វើបាបរូបគេជាទម្ងន់ ដែលធ្វើឲ្យចេញឈាមស្រោចខ្លួន ជាពិសេសអ្នកសួរចម្លើយអ៊ីស្រាអែលបានធ្វើទារុណកម្មវាយដំយ៉ាងចាស់ដៃ ទៅលើម្តុំប្រដាប់ភេទនិងគូទ ដែលបណ្តាលឲ្យចេញឈាម និងឈឺចុកចាប់ខ្លាំង ស្ទើរតែព្រលឹងរត់ចេញពីខ្លួន។ មានវ័យ២៨ឆ្នាំ លោក Said Abdel Fattah ជាគិលានុបដ្ឋាក ដែលបានត្រូវទាហានអ៊ីស្រាអែល ចាប់ខ្លួននៅម្តុំក្បែរនឹងមន្ទីរពេទ្យ al-Chifa នៅហ្កាហ្សា ក្នុងខែវិច្ឆិកា ឆ្នាំ២០២៣។ ក្រោយពីធ្វើទារុណកម្មនិងជំរិតសួរចម្លើយរួចហើយ ទាហានអ៊ីស្រាអែលបានដោះលែងអ្នកថែទាំជំងឺរូបនេះ ក្នុងខែដដែលនោះ។
ក្រុមអ្នកការពារសិទ្ធិមនុស្ស និងអ្នកជំនាញរបស់អង្គការសហប្រជាជាតិ ក៏កត់សម្គាល់ដែរ ថា តាំងពីផ្ទុះជម្លោះបង្ហូរឈាមគ្នារវាងអ៊ីស្រាអែលនិងក្រុមហាម៉ាស ជាង១៥ខែមក ការជាន់ឈ្លីហិង្សាផ្នែកផ្លូវភេទ បានកើតឡើងជាប្រចាំ និងជាប្រព័ន្ធតែម្តង។ ជាក់ស្តែង ឲ្យតែយោធាអ៊ីស្រាអែលចុះឆែកឆេរពលរដ្ឋប៉ាឡេស្ទីន សកម្មភាពបំពារបំពានលើផ្នែកអវយវៈភេទ តែងតែកើតមាន មិនដែលខានឡើយ។ ប្រជាជនប៉ាឡេស្ទីននៅហ្កាហ្សា ដែលត្រូវទាហានអ៊ីស្រាអែលត្រួតពិនិត្យឆែកឆេរ ត្រូវបង្ខំឲ្យស្រាតខោអាវទាំងអស់។
ចំណែកនៅពន្ធនាគារអ៊ីស្រាអែលវិញ ក្រៅពីឲ្យស្រាតននលគោក អ្នកទោសប៉ាឡេស្ទីនត្រូវសមត្ថកិច្ចអ៊ីស្រាអែលវាយដំនៅត្រង់ម្តុំកេរ្តិ៍ភេទថែមទៀត។ នេះបើតាមអ្នកស្រីមេធាវី Sahar Francis ដោយសង្កត់ធ្ងន់ថា អំពើហិង្សារបស់អ៊ីស្រាអែលយ៉ាងដូច្នេះ ទំនងក្លាយជាគោលនយោបាយមួយ ក្នុងបំណងជាន់ឈ្លីពលរដ្ឋប៉ាឡេស្ទីន។
ផ្ទុយទៅវិញ លោក Daniel Meron ឯកអគ្គរដ្ឋទូតអ៊ីស្រាអែលនៅអង្គការសហប្រជាជាតិ ប្រចាំទីក្រុងហ្សឺណែវ បានប្រតិកម្មតបតថា ប្រសិនបើមានករណីអំពើដូចបានចោទប្រកាន់មែននោះ ច្បាស់ជារដ្ឋាភិបាលអ៊ីស្រាអែលនឹងស៊ើបអង្កេតជាពុំខាន។
មិនតែប៉ុណ្ណោះ លោក Daniel Meron បានស្នើឲ្យគេប្រៀបធៀបការចោទប្រកាន់ទាំងឡាយទាំងពួងមកលើអ៊ីស្រាអែល ទៅនឹងការរំលោភបំពានសព្វបែបយ៉ាងដែលចំណាប់ខ្មាំងអ៊ីស្រាអែលទទួលរងគ្រោះពីសំណាក់ស្នាដៃរបស់ពួកប្រដាប់អាវុធហាម៉ាស តាំងពីថ្ងៃទី៧ ខែតុលា ឆ្នាំ២០២៣។ ឯកអគ្គរដ្ឋទូតអ៊ីស្រាអែល ក៏បានប្រាប់ទៅក្រុមអ្នកកាសែតពីក្រុងហ្សឺណែវ ដោយចាត់ទុកកិច្ចប្រជុំស៊ើបអង្កេតរបស់អង្គការសហប្រជាជាតិ នៅពេលនេះ ថាគ្មានបានប្រយោជន៍អ្វីទេ និងនាំឲ្យខាតបង់ពេលវេលា។
ក្នុងសប្តាហ៍នេះ ក្រៅពីគណៈកម្មការស៊ើបអង្កេតក្នុងបទល្មើសទារុណកម្មនិងហិង្សាផ្លូវភេទ អង្គការសហប្រជាជាតិនៅមានកិច្ចពិភាក្សាផ្សេងទៀតស្តីពីតួនាទីស្ត្រីប៉ាឡេស្ទីន នៅក្នុងដំណើរការកសាង និងស្តារតំបន់ហ្កាហ្សាឡើងវិញ៕
© រក្សាសិទ្ធិដោយ thmeythmey.com
