.png)
.jpg)
.jpg)
តើនរណា ជាអ្នកខ្លាំងអុកចត្រង្គទាំង ៨រូប ទៅប្រកួតក្នុងព្រឹត្តិការណ៍អង្គរសង្ក្រាន្ដ?
- ថ្ងៃសុក្រ ទី១៤ ខែមីនា ឆ្នាំ២០២៥ ម៉ោង ១:៥៩ នាទី រសៀល
ការប្រកួតអុកចត្រង្គអង្គរសង្ក្រាន្ដ ឆ្នាំ២០២៣
សហព័ន្ធកីឡាអុកចត្រង្គកម្ពុជា នឹងរៀបចំការប្រកួតអុកចត្រង្គ រកជើងខ្លាំងទាំង៨នាក់ ទៅអង្គរសង្ក្រាន្ដ ពីថ្ងៃទី២៩-៣១ ខែមីនា នៅពហុកីឡដ្ឋានជាតិអូឡាំពិក។ បច្ចុប្បន្ន សហព័ន្ធកីឡាអុកចត្រង្គកម្ពុជា កំពុងរៀបចំការប្រកួតពីតាមតំបន់ ដែលត្រូវបាន បែងចែកជា ៧តំបន់ធំៗ។
នៅតាមតំបន់នីមួយៗ នឹងប្រកួតចម្រាញ់យកជើងខ្លាំង ៣នាក់ ដើម្បីទៅតតាំងនឹង ជើងខ្លាំងមកពីតំបន់ផ្សេងទៀត។ ការប្រកួតនឹងជម្រុះយកបេក្ខជនតែ ៨នាក់ប៉ុណ្ណោះ ដើម្បីទៅប្រកួតនៅព្រឹត្តិការណ៍អង្គរសង្ក្រាន្ត នៅទឹកដីសៀមរាប ដែលនឹងចូលមកដល់នៅប្រមាណកន្លះខែទៀតនេះ។
ការចម្រាញ់យកជើងខ្លាំងតាមតំបន់ មកប្រកួតនៅភ្នំពេញ ត្រូវបានចែកចេញជា តំបន់ទី១ គឺជាខេត្តជាប់សមុទ្រ ដែលមាន ព្រះសីហនុ កំពត កែប និងកោះកុង។ តំបន់ទី២ មានខេត្តកំពង់ស្ពឺ កំពង់ឆ្នាំង កណ្ដាល និងតាកែវ។ តំបន់ទី៣ មានខេត្តស្ទឹងត្រែង ក្រចេះ រតនគិរី និងមណ្ឌលគិរី។
តំបន់ទី៤ មានខេត្តកំពង់ចាម ត្បូងឃ្មុំ ព្រៃវែង និងស្វាយរៀង។ តំបន់ទី៥ មានខេត្តសៀមរាប កំពង់ធំ ព្រះវិហា និងឧត្តរមានជ័យ។ តំបន់ទី៦ មានខេត្តបាត់ដំបង ពោធិ៍សាត់ ប៉ៃលិន និងបន្ទាយមានជ័យ។ និងតំបន់ទី៧ គឺរាជធានីភ្នំពេញ។
គិតត្រឹមថ្ងៃទី១៤ ខែមីនា សហព័ន្ធកីឡាអុកចត្រង្គកម្ពុជា រកឃើញជើងខ្លាំង ២តំបន់រួចហើយ គឺតំបន់ទី១ មានកីឡាករ កីឡាករ សាយ រដ្ធា, កីឡាករ ឆាយ សម្បត្តិវាសនា និងកីឡាករ ហ៊ុន ភិរុណរង្សី ដែលអ្នកទាំង៣ សុទ្ធតែមកពីខេត្តព្រះសីហនុ។
ចំណែកតំបន់ទី២ កីឡាករ ៣រូបនោះមាន៖ កីឡាករ ហេង សៅឌី មកពីខេត្តកណ្ដាល, កីឡាករ ស៊ីវ ស៊ីន មកពីខេត្តតាកែវ និងកីឡាករ រៀម វាសនា មកពីខេត្តកំពង់ស្ពឺ។ ការប្រកួតវគ្គជម្រុះតាមតំបន់ផ្សេងទៀត នឹងបន្ដធ្វើរហូតទៅដល់ថ្ងៃទី២៥ ខេមីនា។
សូមរំឭកថា ពានស្ដេចអុកចត្រង្គ ត្រូវបានធ្វើ៦លើក នៅទឹកដីសៀមរាប។ ៦លើកនោះ កីឡាករ ឈាវ បូរ៉ា ឈ្នះជាស្ដេចអុកអង្គរសង្ក្រាន្ដ ២ឆ្នាំជាប់គ្នា (ឆ្នាំ២០១៤-២០១៥), កីឡាករ ហូយ សូណា ឈ្នះជាស្ដេចអុក ១លើក (ឆ្នាំ២០១៦) និងកីឡាករ ហេង សៅឌី ឈ្នះ ១លើក (ឆ្នាំ២០១៧)។ ចំណែកកីឡាករ សុខ លឹមហេង ឈ្នះជាស្ដេចអុកអង្គរសង្ក្រាន្ដ ២លើក គឺឆ្នាំ២០១៨ និងឆ្នាំ២០២៣៕
© រក្សាសិទ្ធិដោយ thmeythmey.com
Tag:
