.png)
.jpg)
.jpg)
ជនជាតិចិន និងខ្មែរសរុប១៩នាក់ ដែលបង្កអនាធិបតេយ្យនៅព្រលានយន្តហោះភ្នំពេញ ត្រូវបានសមត្ថកិច្ចបង្ក្រាប
- ថ្ងៃសុក្រ ទី១៤ ខែមីនា ឆ្នាំ២០២៥ ម៉ោង ៦:៥៩ នាទី ល្ងាច
ក្រុមជនសង្ឃ័យដែលត្រូវបានសមត្ថកិច្ចបង្ក្រាប ក្រោយពួកគេបង្កចលាចលប៉ះពាល់ដល់សន្តិសុខជាតិ និងភ្ញៀវទេសចរនៅព្រលានយន្តហោះអន្តរជាតិភ្នំពេញ។ រូបភាព៖ ហ្វេសប៊ុកក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ
សមត្ថកិច្ចជំនាញ បង្រ្កាបបានជនសង្ស័យជនជាតិចិន និងខ្មែរ សរុប១៩នាក់ ដែលពួកគេ បានប្រព្រឹត្តទង្វើដែលធ្វើឱ្យប៉ះពាល់សន្តិសុខសណ្តាប់ធ្នាប់ និងបង្កភ្ញាក់ផ្អើលដល់ភ្ញៀវទេសចរ នៅចំណុចអាកាសយានដ្ឋានអន្តរជាតិភ្នំពេញ ផ្លូវសហព័ន្ធរុស្សី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។ នេះបើយោងតាមផ្សាយរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ។
បើតាមប្រភពដដែល ប្រតិបត្តិការបង្រ្កាបក្រុមជនសង្ស័យទាំងនេះ ដឹកនាំដោយ លោក ប៊ុន សត្យា ស្នងការរងផែនការងារនគរបាលព្រហ្មទណ្ឌ ពីថ្ងៃទី៦ ដល់ថ្ងៃទី១០ ខែមីនា ក្រោមកិច្ចដែលមានការសហការ ពីនគរបាលខេត្តមណ្ឌលគិរី ស្វាយរៀង ព្រៃវែង និងខេត្តបន្ទាយមានជ័យ។
វត្ថុតាងដែលសមត្ថកិច្ចដកហូតបាន ក្នុងប្រតិបត្តិការបង្ក្រាប។ រូបភាព៖ ហ្វេសប៊ុកក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ
ក្នុងចំណោមជនសង្ស័យទាំ១៩នាក់ មានជនជាតិចិន២នាក់ និងជនជាតិខ្មែរ១៧នាក់ ហើយក្នុងប្រតិបត្តិការនេះ សមត្ថកិច្ចដកហូតបានរថយន្តចំនួន ៥ គ្រឿង និងអាវុធខ្លីចំនួន១ ដើម។
«បច្ចុប្បន្នជនសង្ស័យ និងវត្ថុតាង ស្នងការដ្ឋាននគរបាលរាជធានីភ្នំពេញ បានកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី។»។ នេះបើតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ដែលបានបញ្ជាក់ថា សមត្ថកិច្ច កំពុងស្រាវជ្រាវ បក្ខពួកជនសង្ស័យដែលនៅសេសសល់ ដើម្បីយកមកចាត់ការតាមច្បាប់៕
© រក្សាសិទ្ធិដោយ thmeythmey.com
