.png)
.jpg)
.jpg)
កម្ពុជាទទួលបានទុនវិនិយោគជាង៦ពាន់លានដុល្លារក្នុងឆ្នាំ២០២៤
- ថ្ងៃសៅរ៍ ទី១៥ ខែមីនា ឆ្នាំ២០២៥ ម៉ោង ៥:៥៩ នាទី ល្ងាច
រូបភាព STPM
ភ្នំពេញ៖ រយៈពេលពេញមួយឆ្នាំ២០២៤ កម្ពុជាទទួលបានគម្រោងវិនិយោគចំនួន៤១៤គម្រោង ដែលមានទំហំទឹកប្រាក់ជាង៦ពាន់លានដុល្លារអាម៉េរិក។ បើតាមសម្ដេច ហ៊ុន ម៉ាណែត ២០២៤ជាឆ្នាំដែលកម្ពុជាទទួលបានការវិនិយោគច្រើនជាងគេបំផុត។
«បើតាមទិន្នន័យ គឺជាឆ្នាំដែលច្រើនជាងគេមិនដែលមានឆ្នាំណាតាំងពីមុនមក ដែលក្នុងមួយឆ្នាំបានជាង៤០០គម្រោងនេះទេ បានន័យថា បំបែកឯកទគ្គកម្មក្នុង CDC»។ នេះជាការលើកឡើងរបស់សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា នាពិធីបិទសន្និបាតបូកសរុបការងាររបស់សមាគមឧកញ៉ាកម្ពុជា យប់ថ្ងៃទី១៤ ខែមីនា។
សម្ដេចបញ្ជាក់ថា ត្រឹមរយៈពេល២ខែដំបូងឆ្នាំ២០២៥នេះ CDC បានអនុម័តគម្រោងវិនិយោគចំនួន៤៤គម្រោង ស្មើនឹងទំហំទឹកប្រាក់៣២២ដុល្លារអាម៉េរិក។ សម្ដេចរំពឹងថា ពេញមួយឆ្នាំ២០២៥ គម្រោងវិនិយោគនៅកម្ពុជានឹងកើនឡើងបន្ថែមទៀត។
យ៉ាងណា សម្ដេចក៏បន្តជំរុញឱ្យក្រសួងជំនាញគ្រប់វិស័យ រួមទាំងវិស័យឯកជនបង្កើនភាពទាក់ទាញដល់អ្នកវិនិយោគឱ្យមកកម្ពុជា ជាពិសេសជំរុញច្រវ៉ាក់ផលិតកម្មក្នុងស្រុក ដើម្បីធានាទីផ្សារ សេដ្ឋកិច្ចកម្ពុជា និងបង្កើនការងារ ប្រាក់ចំណូលសម្រាប់ពលរដ្ឋ។
បើតាមទិន្នន័យពី CDC គម្រោងវិនិយោគភាគច្រើនមានដូចជា មជ្ឈមណ្ឌលពាណិជ្ជកម្ម,អាជីវកម្មសណ្ឋាគារផ្កាយ៥,គម្រោងសាងសង់វារីអគ្គិសនី,សាងសង់កំពង់ផែ,គម្រោងអាជីវកម្មមជ្ឈមណ្ឌលទិន្នន័យ,ការអភិវឌ្ឍស្ថានីយអគ្គិសនីដើរដោយថាមពលព្រះអាទិត្យ និងការសាងសង់សួនកម្សាន្តបែបទំនើបជាដើម។ ក្រៅពីនេះ មានគម្រោងស្ថិតក្នុងតំបន់សេដ្ឋកិច្ចពិសេស ដូចជា ការពង្រីកផលិតកម្មផលិតសម្បកកង់រថយន្ត,គម្រោងកែច្នៃអាលុយមីញ៉ូម និងគម្រោងបង្កើតតំបន់សេដ្ឋកិច្ចពិសេសនៅតាមបណ្ដាលខេត្តនានាផងដែរ។
កាលពីឆ្នាំ២០២៣ កម្ពុជាទទួលបានគម្រោងវិនិយោគចំនួន២៦៨គម្រោង ដែលមានទំហំទុនប្រមាណ៤,៩ លានដុល្លារអាម៉េរិកប៉ុណ្ណោះ៕
© រក្សាសិទ្ធិដោយ thmeythmey.com
