.png)
.jpg)
.jpg)
លោក ស្រ៊ុន ពៅ ចង់ឱ្យរដ្ឋទប់ស្កាត់ការនាំចូលសាច់បង្កកល្មើសច្បាប់តាមព្រំដែន
- ថ្ងៃចន្ទ ទី១៧ ខែមីនា ឆ្នាំ២០២៥ ម៉ោង ៧:២៩ នាទី ល្ងាច
សាច់បង្កកខុសច្បាប់ ដែលអាជ្ញាធរកម្ពុជា បង្រ្កាបបាន។ រូបភាព៖ គយ
ភ្នំពេញ៖ កម្ពុជា បានបើកឱ្យនាំចូលទំនិញគ្រឿងក្នុង និងបំណែកសាច់បង្កកឡើងវិញ ក្រោយហាមឃាត់បណ្ដោះអាសន្ន អស់រយៈពេល១២ខែរួចមក។ជុំវិញរឿងនេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា យល់ថា ការបិទឬបើកឱ្យនាំចូលសាច់បង្កក និងគ្រឿងក្នុងសត្វ នៅពេលនេះ មិនប៉ះពាល់ធំដុំដល់ចរន្តទីផ្សារសាច់ក្នុងស្រុកនោះទេ។
ប៉ុន្តែអ្វីដែលជាបញ្ហាពិតប្រាកដ ហើយទាមទារឱ្យដោះស្រាយនោះ គឺបទល្មើសនាំចូលខុសច្បាប់ តាមច្រករបៀងព្រំដែន ដែល លោក ស្រ៊ុន ពៅ អះអាងថា កំពុងកើតឡើងជារៀងរាល់ថ្ងៃ។ ករណីនេះ មិនគ្រាន់តែធ្វើឱ្យប៉ះពាល់វិស័យចិញ្ចឹមសត្វក្នុងស្រុកនោះទេ តែក៏គំរាមកំហែងដល់សុខភាពអ្នកបរិភោគផងដែរ។
លោក ស្រ៊ុន ពៅ ប្រាប់សារព័ត៌មានឌីជីថលថ្មីៗ នៅថ្ងៃទី១៧ មីនា ដូច្នេះថា៖ «ការបិទ ឬបើកឱ្យនាំចូលគ្រឿងក្នុង និងសាច់បង្កក នឹងមិនមែនជាបញ្ហានោះទេ បើសិនយើងគ្រប់គ្រងបានល្អ។ អ្វីដែលខ្ញុំសុំនោះ គឺកុំឱ្យមានការនាំចូលខុសច្បាប់ ព្រោះថា សព្វថ្ងៃនេះ ខ្ញុំឃើញនៅមានការនាំចូល ជាពិសេសនៅតាមច្រករបៀងព្រំដែនកម្ពុជា ជាមួយប្រទេសជិតខាង។»។
កម្ពុជាបានដាក់ឱ្យដំណើរអនុក្រឹត្យលេខ៣៧០ ជំនួសអនុក្រឹត្យ ១៧វិញ។ អនុក្រឹត្យនេះ កែសម្រួល និងដាក់ចេញច្បាប់ទម្លាប់ប្រសើរជាងមុន។ ដូច្នេះលោក ស្រ៊ុន ពៅ សង្ឃឹមថា ក្រសួងកសិកម្ម រុក្ខាប្រមាញ់ និងនេសាទ នឹងអនុវត្ត ឬគ្រប់គ្រងការនាំចូលឱ្យបានគត់មត់។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា។ រូបភាព៖ CLRA
អនុក្រឹត្យ៣៧០ ស្តីពី «ការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់» ត្រូវបានដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់តាមតារាងពន្ធគយកម្ពុជា ឆ្នាំ២០២២ ជាធរមាន ដូចមានចែងក្នុងបញ្ជីឧបសម្ព័ន្ធនៃអនុក្រឹត្យនេះ។
ចំពោះមុខទំនិញចែងក្នុងបញ្ជីឧបសម្ព័ន្ធនៃអនុក្រឹត្យនេះដែលមានគោលដៅប្រើប្រាស់ពហុវិស័យ តម្រូវឱ្យចេញលិខិតអនុញ្ញាតនាំចេញ-នាំចូល តែពីក្រសួង-ស្ថាប័នមានសមត្ថកិច្ចណាមួយប៉ុណ្ណោះ ដែលមានចែងក្នុង ឧបសម្ព័ន្ធ ឬក្រសួង-ស្ថាប័នមានសមត្ថកិច្ចផ្សេងទៀត ស្របតាមគោលដៅនៃការប្រើប្រាស់ ឬកម្មវត្ថុអាជីវកម្ម។
រាល់ពេលមានការធ្វើបច្ចុប្បន្នភាពប្រព័ន្ធស៊ីចង្វាក់ (លេខកូដទំនិញ) របស់អង្គការគយពិភពលោក (WCO) និងការធ្វើបច្ចុប្បន្នភាពនាមវលីនៃតារាងពន្ធគយស៊ីចង្វាក់អាស៊ាន(AHTN) ក្រសួងសេដ្ឋកិច្ចនិងហិរញ្ញវត្ថុ អាចចេញប្រកាសដើម្បីធ្វើបច្ចុប្បន្នភាពលេខកូដទំនិញក្នុងបញ្ជីឧបសម្ព័ន្ធនៃអនុក្រឹត្យនេះ។
ការហាមឃាត់ ការតម្រូវឱ្យមានអាជ្ញាបណ្ណ លិខិតអនុញ្ញាត ឬលក្ខខណ្ឌនានា លើការនាំចេញ នាំចូល និងការដឹកជញ្ជូនឆ្លងកាត់ទំនិញ ត្រូវបានកំណត់ក្នុងបញ្ជីឧបសម្ព័ន្ធនៃអនុក្រឹត្យនេះ។ ក្នុងករណីមានតម្រូវការចាំបាច់ ក្រសួង-ស្ថាប័នពាក់ព័ន្ធអាចលើកសំណើសុំកែសម្រួល រួមមាន ការបញ្ចូលបន្ថែមឬការដកចេញនូវមុខទំនិញពីបញ្ជីនេះ និងការកែសម្រួលប្រព្រឹត្តកម្មលើទំនិញនាំចេញ នាំចូល និងដឹកជញ្ជូនឆ្លងកាត់ជាដើម ទៅគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុដើម្បីពិនិត្យ មុនដាក់សុំការសម្រេចពីរាជរដ្ឋាភិបាល។
ករណីមានហានិភ័យខ្ពស់ដែលតម្រូវឱ្យមានចំណាត់ការបន្ទាន់ជាយថាហេតុ ក្រសួងមានសមត្ថកិច្ច ពាក់ព័ន្ធអាចដាក់វិធានការជាបណ្តោះអាសន្ន ក្នុងការគ្រប់គ្រងការនាំចេញ-នាំចូល និងការដឹកជញ្ជូនឆ្លងកាត់ នៃមុខទំនិញដែលមានហានិភ័យខ្ពស់នោះ និងត្រូវជូនដំណឹងមកអគ្គនាយកដ្ឋានគយនិងរដ្ឋាករកម្ពុជា ក្រសួងសេដ្ឋកិច្ច និងហិរញ្ញវត្ថុ ដើម្បីអនុវត្ត។
ក្រសួងមានសមត្ថកិច្ចត្រូវចូលរួមអនុវត្តប្រព័ន្ធបញ្ជរតែមួយជាតិ (National Single Window) ឱ្យបានពេញលេញ ដោយត្រូវជំរុញការចេញអាជ្ញាបណ្ណ ឬលិខិតអនុញ្ញាតនាំចេញ-នាំចូល ឬដឹកជញ្ជូនឆ្លងកាត់ ជូនបុគ្គលស្នើសុំឱ្យបានក្នុងរង្វង់រយៈពេល ៣០ថ្ងៃ នៃថ្ងៃធ្វើការ គិតចាប់ពីពេលស្នើសុំ ប្រសិនបើសំណុំឯកសារ មានលក្ខណៈត្រឹមត្រូវ និងគ្រប់គ្រាន់៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
