.png)
.jpg)
.jpg)
រដ្ឋមន្រ្តីបរិស្ថាន ព្រមានបិទរោងចក្រកែច្នៃដំណាប់ស្វាយនៅប៉ៃលិន បើបន្តប្រព្រឹត្តល្មើសច្បាប់
- ថ្ងៃអង្គារ ទី១៨ ខែមីនា ឆ្នាំ២០២៥ ម៉ោង ៥:១៤ នាទី ល្ងាច
លោក អ៊ាង សុផល្លែត បានបញ្ជាឱ្យក្រុមហ៊ុនកាងស៊ីនឡុង ហ្វូត ដែលមានរោងចក្រកែច្នៃដំណាប់ស្វាយ នៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន បញ្ឈប់ការបង្ហូរសំណល់រាវ មិនត្រឹមត្រូវតាមស្តង់ដារបច្ចេកទេស ចូលប្រភពទឹកសាធារណៈ និងស្តារបរិស្ថានប្រព័ន្ធអូរក្បាលឡានឱ្យបានស្អាតឡើងវិញ។ នេះបើតាមការចុះផ្សាយនៅទំព័រហ្វេសប៊ុកក្រសួងបរិស្ថាន នៅថ្ងៃទី១៨ ខែមីនានេះ។
តាមទំព័រហ្វេសប៊ុកដដែល លោករដ្ឋមន្ត្រី ក៏តម្រូវឱ្យក្រុមហ៊ុន ផ្តល់សំណងការខូចខាតប៉ះពាល់ផ្ទាល់មកលើ គុណភាពទឹក គុណភាពដី ប្រព័ន្ធ អេកូឡូស៊ីនៃប្រព័ន្ធទឹកសាធារណៈផងដែរ។ លោក អ៊ាង សុផល្លែត ព្រមានបិតដំណើរការផលិតកម្មរបស់រោងចក្រនេះ ប្រសិនបើមិនអនុវត្តតាមច្បាប់របស់កម្ពុជាទេនោះ។ លោក អ៊ាង សុផល្លែត បញ្ជាក់ដូច្នេះ៖« ប្រសិនបើក្រុមហ៊ុនមិនអនុវត្តច្បាប់របស់ព្រះរាជាណាចក្រកម្ពុជា នោះ ក្រុមហ៊ុននឹងមិនអនុញ្ញាតឱ្យដំណើរការផលិតកម្មទៀតនោះទេ។»។
សូមជម្រាបថា បទបញ្ជារបស់រដ្ឋមន្ត្រីក្រសួងបរិស្ថាន ធ្វើឡើងនៅថ្ងៃទី១៨ ខែមីនា បន្ទាប់ពីអ្នកជំនាញនៃមន្ទីរបរិស្ថានខេត្តប៉ៃលិន ចុះពិនិត្យ និងបានរកឃើញថា រោងចក្រកែច្នៃដំណាប់ស្វាយនេះ បានបង្ហូរសំណល់រាវមិនត្រឹមត្រូវតាមច្បាប់ ប៉ះពាល់ដល់ប្រភពលូទឹកសាធារណៈ និងបង្កឱ្យត្រីងាប់ជាច្រើន ក្នុងអូរធម្មជាតិក្បាលឡាន នៅក្បែរតំបន់រោងចក្រនោះ។ មិនតែប៉ុណ្ណោះ សំណល់នេះ បានធ្វើឱ្យពលរដ្ឋ ៤៧គ្រួសារ ខ្វះទឹកប្រើប្រាស់។
ទាក់ទងនឹងការបញ្ចេញសំណល់រាវមានជាតិពុល ប៉ះពាល់ប្រភពទឹកសាធារណៈនេះ មន្រ្តីជំនាញនៃក្រសួងបរិស្ថាន បានរកឃើញរោងចក្រ និងសហគ្រាសចំនួន ៩ប្រព្រឹត្តទង្វើបែបនេះ ក្នុងនោះអ្នកទទួលខុសត្រូវរោងចក្រ និងសហគ្រាស ២កន្លែង ត្រូវបានបញ្ជូនទៅតុលាការ នៅក្នុងរយៈពេល២ខែចុងក្រោយនេះ។ នេះបើតាមលោក ខ្វៃអាទិត្យា អ្នកនាំពាក្យក្រសួងបរិស្ថាន។
នៅក្នុងក្រមបរិស្ថាននិងធនធានធម្មជាតិ ដែលបានអនុម័តឱ្យប្រើប្រាស់នៅឆ្នាំ២០២៣ ត្រង់មាត្រា៨២៤ តម្រូវឱ្យក្រុមហ៊ុនផ្អាកសកម្មភាពផលិតកម្មជាបណ្តោះអាសន្ន ដើម្បីជៀសវាងការបង្ហូរសំណល់រាវ ចេញពីទីតាំងក្រុមហ៊ុន បង្កឱ្យមានការបំពុលបរិស្ថានជាបន្តទៀត។ មាត្រា៨២៩ និងមាត្រា៨៤៥ បានកំណត់ទោសទណ្ឌ ដែលត្រូវអនុវត្តចំពោះការមិនបំពេញកាតព្វកិច្ច ក្នុងការគ្រប់គ្រងសំណល់រឹង រាវ ទឹកកខ្វក់ សារធាតុបំពុល ស្របតាមបទដ្ឋាន/ស្តង់ដារបញ្ចេញ។ វិធានការទាំងនោះរួមមាន ការពិន័យជាប្រាក់ និងទោសជាប់ពន្ធនាគារ។
អត្ថបទទាក់ទង
© រក្សាសិទ្ធិដោយ thmeythmey.com
Tag:
