.png)
.jpg)
.jpg)
ល្ខោនយីកេ ប្រឡងបវរកញ្ញាវ័យចំណាស់ ស្រីស្រស់ប្រុសស្អាត គុនខ្មែរ នឹងមាននៅសង្ក្រាន្តព្រៃវែង
- ថ្ងៃពុធ ទី១៩ ខែមីនា ឆ្នាំ២០២៥ ម៉ោង ៨:៥៩ នាទី ព្រឹក
នៅឆ្នាំនេះ រដ្ឋបាលខេត្តព្រៃវែង សហការជាមួយសហភាពសហព័ន្ធយុវជនកម្ពុជាខេត្តព្រៃវែង នឹងរៀបចំព្រឹត្តិការណ៍ «សង្ក្រាន្តព្រៃវែង ២០២៥» រយៈពេល៥ថ្ងៃ ចាប់ពីថ្ងៃទី១២-១៦ ខែមេសា ឆ្នាំ២០២៥។ ក្នុងព្រឹត្តិការណ៍នេះ នឹងមានកម្មវិធីប្រពៃណី និងកម្មវិធីកម្សាន្តសប្បាយជាច្រើន ជាពិសេសការសម្តែងទស្សនីយភាពល្ខោន យីកេខ្នាតធំ «រឿងតេជោជ្រែកដី»។
ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ រដ្ឋបាលខេត្តព្រៃវែង និងសហភាពសហព័ន្ធយុវជនកម្ពុជាខេត្តព្រៃវែង នឹងរៀបចំព្រឹត្តិការណ៍សង្ក្រាន្តព្រៃវែង ដែលជាសាទរ និងរក្សាទំនៀមទម្លាប់ប្រពៃណីជាតិខ្មែរដ៏ល្អផូរផង់តាំងពីបុរាណកាលមក។ បើតាមរដ្ឋបាលខេត្តព្រៃវែង ព្រឹត្តិការណ៍នេះ នឹងមានការប្រគំតន្ត្រីសម័យ ការរាំលេងកម្សាន្ត ការតាំងពិព័រណ៍បង្ហាញផលិតផល ការបង្ហោះគោម បាញ់កាំជ្រួច និងលេងល្បែងប្រជាប្រិយខ្មែរ។
រូបភាពពីសង្រ្កាន្តព្រៃវែង។
ក្រៅពីនេះ ព្រឹត្តិការណ៍រយៈពេល ៥ថ្ងៃនេះ ក៏មានការសម្តែងក្បាច់គុនបុរាណខ្មែរ ពិសេសការប្រឡងចម្រៀង ប្រឡងបវរកញ្ញាស្រីស្រស់ប្រុសស្អាត និងបវរកញ្ញាវ័យចំណាស់ រួមទាំងការប្រកួតអុកចត្រង្គ។ ដោយនៅពេលរាត្រី រដ្ឋបាលខេត្ត ក៏រៀបចំការប្រដាល់ក្បាច់គុនបុរាណខ្មែរ ការសម្តែងក្បាច់គុនបុរាណខ្មែរយុទ្ធក្រមខម ការសម្តែងទស្សនីយភាពល្ខោន យីកេខ្នាតធំ «រឿងតេជោជ្រែកដី» និងកម្មវិធីឡើងសសរខ្លាញ់យករង្វាន់ម៉ូតូផងដែរ។
មិនខុសពីរាល់ឆ្នាំឡើយ សង្រ្កាន្តព្រៃវែង នឹងរៀបចំកម្មវិធីលេងកម្សាន្តនៅតំបន់ត្រជាក់ចិត្ត ដែលស្ថិតនៅសួនច្បារសម្តេច ជា ស៊ីម។ ដើម្បីចូលរួមអបអរ និងកម្សាន្តសប្បាយ រដ្ឋបាលខេត្តព្រៃវែង អំពាវនាវដល់សាធារណជន ភ្ញៀវទេសចរជាតិ និងអន្តរជាតិ រួមទាំងពលរដ្ឋក្នុងខេត្តព្រៃវែង មកកម្សាន្តក្នុងព្រឹត្តិការណ៍សង្រ្កាន្តព្រៃវែងឱ្យបានច្រើនកុះករ៕
រូបភាពពីសង្រ្កាន្តព្រៃវែង។
អត្ថបទទាក់ទង
© រក្សាសិទ្ធិដោយ thmeythmey.com
Tag:
