.png)
.jpg)
.jpg)
ហ្កាហ្សា៖ មនុស្សយ៉ាងតិច ៣០០នាក់ ស្លាប់ក្នុងការវាយប្រហារចាស់ដៃរបស់អុីស្រាអែល
- ថ្ងៃពុធ ទី១៩ ខែមីនា ឆ្នាំ២០២៥ ម៉ោង ១០:៤៩ នាទី ព្រឹក
សាកសពប្រជាជនប៉ាឡេស្ទីននៅក្រោយហ្កាហ្សារងការវាយប្រហារសាជាថ្មីរបស់អ៊ីស្រាអែល AP - Abdel Kareem Hana
ដោយ៖ឈាង បុប្ផា (RFI ខេមរភាសា)
ប្រជាជនប៉ាឡេស្ទីនយ៉ាងហោច ៣២០នាក់ ស្លាប់នៅក្នុងការវាយប្រហារយ៉ាងសន្ធប់របស់កងទ័ពអ៊ីស្រាអែល នៅយប់ថ្ងៃចន្ទ ឈានចូលថ្ងៃអង្គារទី ១៨មីនា។ នេះបើតាមការអះអាងរបស់ក្រសួងសុខាភិបាលហាម៉ាស ដែលបន្ថែមថា ការវាយប្រហារផ្លូវអាកាសរបស់កងទ័ពអ៊ីស្រាអែលសំដៅកន្លែងប្រមូលផ្តុំរស់នៅរបស់ប្រជាជនប៉ាឡេស្ទី នៅគ្រប់សង្កាត់នៃតំបន់ហ្កាហ្សា។ នៅក្នុងសេចក្តីប្រកាសព័ត៌មាននៅថ្ងៃនេះ ការិយាល័យនាយករដ្ឋមន្រ្តីអ៊ីស្រាអែលបានបញ្ជាក់ថា អំណើះតទៅ អ៊ីស្រាអែលនឹងដាក់សម្ពាធយោធាទៅលើក្រុមហាម៉ាសដែលមិនព្រមដោះលែងចំណាប់ខ្មាំងដែលនៅសេសសល់ តាមការចង់បានរបស់អ៊ីស្រាអែល និងអាមេរិក។
អ៊ីស្រាអែលប្តេជ្ញាដាក់សម្ពាធយោធាលើក្រុមហាម៉ាស ដើម្បីឲ្យក្រុមនេះ ដោះលែងចំណាប់ខ្មាំងដែលនៅសេសសល់ នៅហ្កាហ្សា។ នៅយប់ថ្ងៃចន្ទ ឈានចូលថ្ងៃអង្គារទី ១៨មីនានេះ ក្រោមបញ្ជារបស់ការិយាល័យនាយករដ្ឋមន្រ្តីបេនចាមីន នេតាន់យ៉ាហ៊ូ កងទ័ពអ៊ីស្រាអែលបានបើកការវាយប្រហារផ្លូវអាកាសទ្រង់ទ្រាយធំ ទៅលើភាគខាងត្បូងហ្កាហ្សា និងបានបញ្ជាឲ្យប្រជាជនប៉ាឡេស្ទីនចាកចេញជាបន្ទាន់ពីភាគខាងកើតតំបន់ហ្កាហ្សា។
យោងតាមក្រសួងសុខាភិបាលហាម៉ាស ការវាយប្រហារផ្លូវអាកាសរបស់អ៊ីស្រាអែល ទៅលើជំរកតង់ ក្បែរគំនរអគារបាក់បែកកាលពីយប់ថ្ងៃចន្ទ បានសម្លាប់ប្រជាជនប៉ាឡេស្ទីន ជាង៣០០នាក់ ដែលភាគច្រើនជាស្រ្តីនិងកុមារ។ មនុស្សរាប់រយនាក់ផ្សេងទៀត រងរបួស ប៉ុន្តែ គ្មានមន្ទីរពេទ្យដើម្បីជួយសង្រ្គោះបន្ទាន់។
កងទ័ពអ៊ីស្រាអែលវិញបានប្រកាសថា នឹងបន្តទម្លាក់គ្រាប់យូរតទៅទៀត បើសិនជាចាំបាច់។ ប្រតិបត្តិការយោធាលើកនេះនឹងអាចរាប់បញ្ចូលអន្តរាគមន៍យោធាជើងគោកចូលហ្កាហ្សាសាជាថ្មី។
មានសមាជិកស៊ីវិល និងប្រដាប់អាវុធរបស់ខ្លួនចំនួន៥រូបស្លាប់នៅក្នុងការវាយប្រហាររបស់អ៊ីស្រាអែល ក្រុមហាម៉ាសបានប្រកាន់អ៊ីស្រាអែលថា កំពុងបំផ្លាញបទឈប់បាញ់ ថ្ងៃទី ១៩មករា ដែលបានបើកផ្លូវឲ្យមានការចរចា ដោះលែងចំណាប់ខ្មាំងអ៊ីស្រាអែល។
ក្រុមហាម៉ាសនៅបានព្រមានថា ការវាយប្រហាររបស់អ៊ីស្រាអែលនឹងញុះញង់ឲ្យមានផ្ទុះសង្រ្គាមប្រយុទ្ធគ្នាសាជាថ្មីនៅហ្កាហ្សា ពោលគឺមានន័យស្មើនឹងការដាក់ទោសប្រហារជីវិតចំណាប់ខ្មាំងអ៊ីស្រាអែល ដែលនៅសេសសល់ក្នុងដៃរបស់ក្រុមខ្លួន។
នៅក្រោយអ៊ីស្រាអែលបើកការវាយប្រហារធ្ងន់ធ្ងរទៅលើទឹកដីហ្កាហ្សា ក្រុមគ្រួសាររបស់ចំណាប់ខ្មាំងអ៊ីស្រាអែលបានប្រតិកម្មរិះគន់រដ្ឋាភិបាលអ៊ីស្រាអែលបានបោះបង់ចោលប្រជាជនអ៊ីស្រាអែលដែលកំពុងស្ថិតក្នុងកណ្តាប់ដៃរបស់ក្រុមហាម៉ាស។ អតីតចំណាប់ខ្មាំងម្នាក់ដែលក្រុមហាម៉ាសទើបដោះលែងឲ្យមានសេរីភាព នៅក្នុងក្របខ័ណ្ឌនៃការចរចាដោះដូរអ្នកទោសបានទទូចសុំឲ្យរដ្ឋាភិបាលអ៊ីស្រាអែលបញ្ឈប់ជាបន្ទាន់ ព្រោះថា ការដាក់សម្ពាធយោធាទៅលើក្រុមហាម៉ាស នឹងធ្វើឲ្យអាយុជីវិតរបស់ចំណាប់ខ្មាំងកាន់តែប្រឈមគ្រោះថ្នាក់ធំ។
អ៊ីស្រាអែលវាយតម្លៃថា នៅមានចំណាប់ខ្មាំងប្រមាណ ៥៩នាក់ កំពុងស្ថិតក្នុងដៃរបស់ក្រុមហាម៉ាស ប៉ុន្តែ ទំនងមានតែ ២៤នាក់ ដែលនៅរស់រានមានជីវិត។ អំណើះតទៅអ៊ីស្រាអែលនឹងប្រើកម្លាំងយោធា ដាក់សម្ពាធកាន់តែខ្លាំង ទៅលើក្រុមហាម៉ាស បន្ទាប់ពីក្រុមនេះបដិសេធមិនព្រមដោះលែងចំណាប់ខ្មាំង។ នេះ បើតាមសេចក្តីប្រកាសរបស់ការិយាល័យនាយករដ្ឋមន្រ្តីអ៊ីស្រាអែល។
ការវាយប្រហារសាជាថ្មីរបស់អ៊ីស្រាអែលទៅលើហ្កាហ្សា ដែលបានសម្លាប់ប្រជាជនស៊ីវិលប៉ាឡេស្ទីនក្នុងចំនួនដ៏ច្រើនបែបនេះ កើតមានឡើងនៅក្នុងកាលៈទេសៈដែលការចរចារវាងភាគីជម្លោះទាំងពីរនៅជាប់គាំង គ្មានច្រកចេញ។
ក្រុមហាម៉ាសបានបដិសេធមិនព្រមពន្យារបទឈប់បាញ់ដំណាក់កាលទី១ទៅតាមការចង់បានរបស់អ៊ីស្រាអែល។ ទៅតាមបទឈប់បាញ់ដំណាក់កាលទី១ដែលមានកាតា អេហ្ស៊ីប និងអាមេរិកក្រោមរដ្ឋបាលលោកចូ បៃដិន ជាអ្នកជួយសម្របសម្រួល ក្រុមហាម៉ាសត្រូវដោះលែង ចំណាប់ខ្មាំង៣៣នាក់ ជាថ្នូរនឹងការដោះលែងអ្នកទោសនយោបាយប៉ាឡេស្ទីនជាង១ពាន់នាក់។ ប៉ុន្តែ រដ្ឋាភិបាលស្តាំនិយមជ្រុលរបស់អ៊ីស្រាអែល ដែលបានទទួលការគាំទ្រកាន់តែខ្លាំងពីរដ្ឋបាលលោកត្រាំ បានទាមទារឲ្យក្រុមហាម៉ាសដោះលែងចំណាប់ខ្មាំងទាំងអស់ នៅក្នុងដំណាក់កាលទី១។
ចំពោះក្រុមហាម៉ាស ចំណាប់ខ្មាំងទាំងអស់នឹងត្រូវដោះលែងនៅក្នុងដំណាក់កាលទី២នៃបទឈប់បាញ់ ដែលមានចែងពីការធានាបិទបញ្ចប់សង្រ្គាម និងការដកទ័ពអ៊ីស្រាអែលចេញពីហ្កាហ្សា៕
© រក្សាសិទ្ធិដោយ thmeythmey.com
