.png)
.jpg)
.jpg)
កត្តាគោលនយោបាយ, ផ្ទៃក្នុង និងការចូលរួមពីគ្រប់ភាគី ជួយក្រសួងមុខងារសម្រេចសមិទ្ធផលជាច្រើន
- ថ្ងៃពុធ ទី១៩ ខែមីនា ឆ្នាំ២០២៥ ម៉ោង ៣:២៩ នាទី រសៀល
លោកឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ។
ភ្នំពេញ៖ ពីពិធីបើក «សន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ ការ ងារឆ្នាំ២០២៥ របស់ក្រសួងមុខងារសាធារណៈ» លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានបង្ហាញពីភាពជោគជ័យដែលក្រសួងសម្រេចបាន ដោយឈរលើកត្តាចំនួន៣។ បើតាមលោករដ្ឋមន្រ្តី កត្តាទាំង៣ រួមមាន កត្តាគោលនយោបាយ, កត្តាផ្ទៃក្នុងនៃក្រសួងមុខងារសាធារណៈ និងកត្តាក្រសួង ស្ថាប័ន រដ្ឋបាលថ្នាក់ក្រោមជាតិ ដៃគូអភិវឌ្ឍ និងភាគីពាក់ព័ន្ធទាំងអស់ ដែលចូលរួមសហការ។
លោកឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានចូលរួមក្នុងពិធីបើក «សន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងមុខងារសាធារណៈ» នៅថ្ងៃទី១៩ ខែមីនានេះ។ ថ្លែងក្នុងពិធីបើកនាពេលនេះ លោក ហ៊ុន ម៉ានី បានលើកឡើងអំពីសមិទ្ធផលជាច្រើន ដែលក្រសួងសម្រេចបានកន្លងមកនេះ។
រដ្ឋមន្ត្រីក្រសួងមុខងារសាធារណៈ បានលើកពីកត្តាគោលនយោបាយ និងយុទ្ធសាស្ត្រដ៏ត្រឹមត្រូវរបស់រាជរដ្ឋាភិបាល ជាពិសេសយុទ្ធសាស្ត្របញ្ចកោណ។ ទន្ទឹមនឹងនេះ កត្តាផ្ទៃក្នុងនៃក្រសួងមុខងារសាធារណៈ បានរួមចំណែកដល់ការអនុវត្តគោលនយោបាយរបស់រដ្ឋាភិបាល។ លោក ហ៊ុន ម៉ានី បញ្ជាក់បន្ថែមថា៖«ដោយសារតែយើងមានចក្ខុវិស័យ និងផែនការច្បាស់លាស់ មានរចនាសម្ព័ន្ធការងារត្រឹមត្រូវ មានប្រព័ន្ធការងារល្អ និងជាពិសេសមាន ថ្នាក់ដឹកនាំនិងមន្ត្រីគ្រប់កម្រិត ដែលមានជំនាញសមត្ថភាពខ្ពស់ និងមានទទួលខុសត្រូវ ខ្ពស់ទៅតាមជំនាញ និងភារកិច្ចរៀងៗខ្លួន»។
សមិទ្ធផលជាច្រើន ដែលក្រសួងមុខងារសាធារណៈ ទទួលបាន ក៏កើតចេញពីការចូលរួមរបស់ក្រសួង ស្ថាប័ន រដ្ឋបាលថ្នាក់ក្រោមជាតិ ដៃគូអភិវឌ្ឍ និងភាគីពាក់ព័ន្ធទាំងអស់ដែរ។ លោក ហ៊ុន ម៉ានី បន្តថា ការចូលរួមសហការ សម្របសម្រួល និងគាំទ្ររបស់ក្រសួងស្ថាប័ន ដោយឈរលើអភិក្រម «ជវភាពនៃប្រព័ន្ធតួអង្គតែមួយ» ឈានទៅសម្រេចសមិទ្ធផល ដែលជាគោលបំណងរួមគ្នា ក្នុងប្រយោជន៍ នៃការកសាងរដ្ឋបាលសាធារណៈទំនើបរបស់កម្ពុជា។
«ខ្ញុំពិតជាមានមោទនភាពណាស់ ចំពោះការបោះជំហានឆ្ពោះទៅមុខនៃវិស័យមុខងារសាធារណៈ និងការកែទម្រង់រដ្ឋបាលសាធារណៈ ដែលបាននិងកំពុងចូលរួមចំណែកដល់ការលើកកម្ពស់អភិបាលកិច្ច ក្នុងរដ្ឋបាលសាធារណៈ ដែលជាមូលដ្ឋានចាំបាច់ក្នុងការជំរុញល្បឿននៃការអភិវឌ្ឍសង្គមសេដ្ឋកិច្ចកម្ពុជា។»។ លោក ហ៊ុន ម៉ានី បន្តលើកឡើងដូច្នេះ។
សូមបញ្ជាក់ថា សម្ដេចនាយករដ្ឋមន្រ្តី ហ៊ុន ម៉ាណែត នឹងធ្វើអធិបតី ក្នុងពិធីបិទសន្និបាត ការងារក្រសួងមុខងារ ដែលនឹងប្រព្រឹត្តទៅ នៅព្រឹកថ្ងៃទី២០ មីនា៕
© រក្សាសិទ្ធិដោយ thmeythmey.com
Tag:
