ដោយ៖ម៉ម ពិសី (RFI ខេមរភាសា)

កាលពីព្រឹកថ្ងៃអង្គារ ទី​១៨​មីនា សមត្ថកិច្ចបារាំងបានចុះទៅបំបែក​ក្រុម​អន្តោប្រវេសន៍​ខុស​ច្បាប់ ជាច្រើនរយនាក់ ដែល​បានចូលទៅស្នាក់នៅដោយ​ខុសច្បាប់​ នៅមជ្ឈមមណ្ឌល​វប្បធម៌មួយកន្លែងកណ្តាលក្រុងប៉ារីស ប្រមាណ​៣ខែមកហើយ​។ លោករដ្ឋមន្ត្រីក្រសួងមហាផ្ទៃបារាំង បាន​អះអាងថានេះគឺជាប្រតិបត្តិការដ៏ចាំបាច់ ដើម្បី​ស្តារឡើងវិញនូវសណ្តាប់​ធ្នាប់​សាធារណៈ។ តែដោយឡែក ក្រុមសកម្មជន​និងអ្នកនយោបាយ​បក្សឆ្វេងនិយមបារាំង បានរិះគន់អំពី​ការប្រើធម៌ក្តៅជ្រុលហួសហេតុ ពីសំណាក់សមត្ថកិច្ចបារាំង។​

សមត្ថកិច្ចបារាំង បានប្រើកម្លាំង​វាយបំបែក ដោយ​បានប្រើ​គ្រាប់បែកផ្សែង ដំបងឆក់ ដើម្បីសំរុកចូលទៅ​ក្នុងអគារ និង​បណ្តេញ​ក្រុមជនអន្តោប្រវេសន៍ទាំងអស់ ឲ្យចេញមកខាងក្រៅ​។ យោងតាមលោក Laurent Nuñez ប្រធានអាជ្ញាធរនគរបាល​ប្រចាំទីក្រុងប៉ារីស សមត្ថកិច្ច​បានឃាត់ខ្លួនមនុស្ស​៤៦នាក់ ពីបទជេរប្រមាថ មិនសហការជាមួយ​កម្លាំង​​សមត្ថកិច្ច​ និងខ្លះទៀត គឺដើម្បី​ផ្ទៀតផ្ទាត់នីតិ​​រដ្ឋបាល​។

សាក្សីនិង​អ្នកកាសែតដែលបានឃើញហេតុការណ៍​ផ្ទាល់ បានអះអាងថា ប្រតិបត្តិការបំបែកនេះ បានបង្កឲ្យ​មានភាពចលាចល ភ័យជ្រួលច្របល់។ 

ប្រភពដដែលនេះ អះអាងថា ជនអន្តោប្រវេសន៍ និង​សកម្មជន​សិទ្ធិមនុស្សខ្លះ ត្រូវសមត្ថកិច្ចរុញច្រានដួលនឹងដី ហើយ​មានការរត់ជាន់គ្នាថែមទៀត។​ ដោយឡែក អាជ្ញាធរបារាំង អះអាងថា មានអ្នករបួសស្រាល​​៩នាក់។ លោក​ Laurent Nuñez បញ្ជាក់ថា ប្រតិបត្តិការបានចប់សព្វគ្រប់នៅវេលាម៉ោង​៨ ៣០នាទីព្រឹក តែសមត្ថកិច្ចនឹងរក្សា​កម្លាំងខ្លះ ដើម្បីបន្ត​យាម​សន្តិសុខ​នៅទីតាំងនេះ​។

ក្រុមសកម្មជន​ការពារ​ជនអន្តោប្រវេសន៍ និង​អ្នកនយោបាយបារាំង​​បក្សឆ្វេងនិយមជ្រុល បរិហារថា សមត្ថកិច្ចបារាំងបានប្រើវិធីធម៌ក្តៅយ៉ាងហិង្សាបំផុត​ ទៅលើក្រុម​អន្តោប្រវេសន៍ដែលភាគច្រើនសុទ្ធតែជាយុវជនក្មេងៗ ខ្លះ​ជាអនីតិជន​ផង​។ ដោយឡែក នៅលើបណ្តាញសង្គម​X លោក Bruno Retailleau រដ្ឋមន្ត្រីក្រសួងមហាផ្ទៃបារាំង បាន​អះអាងថារដ្ឋបារាំងបានចេញមុខទទួលខុសត្រូវ ចំពោះប្រតិបត្តិការនេះ ព្រោះថាស្ថានការណ៍​ដ៏​​អាណាធិបតេយ្យ​នេះ មិនអាច​បន្តទៀតបានទេ​។​

អ្នកយកព័ត៌មានបារាំង AFP បាន​អះអាងផងដែរ ថា​នៅក្នុងពេលចុះទៅ​បំបែក មន្ត្រីសង្គមកិច្ច​​ទទួលបន្ទុក​រកទីកន្លែងស្នាក់នៅបន្ទាន់ ក៏មាន​វត្តមានដែរ ដើម្បី​​ជួប​ជាមួយជនអន្តោប្រវេសន៍​ ដែលស្ម័គ្រចិត្ត​ចង់ទៅស្នាក់នៅទីកន្លែង ដែលរដ្ឋត្រៀមបំរុងទុក​។ តែ​ផ្អែកតាម​លោក​ Laurent Nuñez ក្នុងចំណោមអន្តោប្រវេសន៍ខុសច្បាប់ទាំងជាង​៤០០នាក់ គឺមានតែ​៦នាក់ទេ ដែលបានស្ម័គ្រទៅស្នាក់នៅទីជម្រកបណ្តោះអាសន្ន​របស់រដ្ឋ​។

សូមបញ្ជាក់ថា កាលពីថ្ងៃទី​១០ធ្នូ​២០២៤ ក្រុមអន្តោប្រវេសន៍ខុសច្បាប់ភាគច្រើនមកពីទ្វីបអាហ្រិក​​តំបន់ខាងត្បូង​សមុទ្រខ្សាច់សាហារ៉ា ប្រមាណ​៤៥០នាក់ វ័យក្មេងៗនិងខ្លះអះអាងថាជាអនិតិជន បានសំរុកចូលទៅ​តាំងទី​ស្នាក់នៅ​ក្នុងមជ្ឈមមណ្ឌល​វប្បធម៌ Gaîté Lyrique ដែល​ជាកម្មសិទ្ធិរបស់សាលាក្រុងប៉ារីស។ 

ប្រឈមនឹងបញ្ហាអាណាធិបតេយ្យ​​នេះ សាលាក្រុងប៉ារីស និង​អាជ្ញាធរនគរបាល​ក្រុងប៉ារីស បានរុញទម្លាក់កំហុសលើគ្នាទៅវិញទៅមក​។ នៅថ្ងៃទី​១៣កុម្ភៈ ​​តុលាការរដ្ឋបាលបានចេញ​ដីកា​ បង្គាប់ឲ្យ​បណ្តេញ​អន្តោប្រវេសន៍ខុសច្បាប់​ចេញពីទីតាំង ក្នុងរយៈពេលយ៉ាងយូរបំផុតមួយខែ។​​ ដោយ​សង្កេតឃើញសាលាក្រុង​មានការ​ស្ទើស្ទាក់ ក្នុងការធ្វើ​ចំណាត់ការបណ្តេញ អាជ្ញារនគរបាល​ប្រចាំក្រុងប៉ារីស បាន​សម្រេចបើកប្រតិបត្តិការបំបែក ដោយ​លើកពីមូលហេតុអាណាធិបតេយ្យ និង​​អសណ្ដាប់ធ្នាប់សាធារណៈ៕