.png)
.jpg)
.jpg)
អភិក្រម«ពង្រឹងជាជាងពង្រីក»ជាផ្នែកមួយធ្វើឱ្យចំនួនមន្ត្រីរាជការស៊ីវិលនៅកម្ពុជា ថយមកត្រឹម ២៣ម៉ឺននាក់
- ថ្ងៃព្រហស្បតិ៍ ទី២០ ខែមីនា ឆ្នាំ២០២៥ ម៉ោង ៧:៥៩ នាទី ព្រឹក
ភ្នំពេញ៖ គិតត្រឹមខែមករា ឆ្នាំ២០២៥ កម្ពុជា មានមន្រ្តីរាជការស៊ីវិលនៅទូទាំងប្រទេសចំនួន ២៣២ ០៣៤នាក់ ក្នុងនោះស្រ្តីមានចំនួន ៩៦ ៩៦៩នាក់។ ចំនួនមន្រ្តីរាជការស៊ីវិលនៅដើមឆ្នាំ២០២៥ មានការថយចុះ បើធៀបនឹងខែឧសភា ឆ្នាំ២០២៤។ លោក ហាស់ ប៊ុនថ្ថន អគ្គលេខាធិការនៃអគ្គលេខាធិការដ្ឋានក្រសួងមុខងារសាធារណៈ លើកឡើងដូច្នេះនៅក្នុងបទបង្ហាញស្តីពី«វឌ្ឍនភាពនៃការដឹកនាំ និងការគ្រប់គ្រងវិស័យមុខងារសាធារណៈ» នាសន្និបាតបូកសរុបការងារ។
នៅកម្ពុជា មានមន្រ្តីរាជការស៊ីវិលបម្រើការងារនៅថ្នាក់ជាតិ និងថ្នាក់ក្រោមជាតិ ចំនួន ២៣២ ០៣៤នាក់។ ក្នុងចំណោមមន្រ្តីរាជការស៊ីវិលជាង ២៣ម៉ឺននាក់នេះ មានមន្រ្តីនៅថ្នាក់ជាតិ ចំនួន ៥៤ ៥៨៥នាក់ និងថ្នាក់ក្រោមជាតិចំនួន ១៧៧ ៤៤៩នាក់។
បើតាមលោក ហាស់ ប៊ុនថ្ថន អគ្គលេខាធិការនៃអគ្គលេខាធិការដ្ឋានក្រសួងមុខងារសាធារណៈ ចំនួនមន្រ្តីរាជការស៊ីវិលនៅដើមឆ្នាំ២០២៥នេះ មានការថយចុះ បើធៀបនឹងខែឧសភា ឆ្នាំ២០២៤។ ក្នុងបទបង្ហាញនាសន្និបាតបូកសរុបការងារ លោក ហាស់ ប៊ុនថ្ថន បន្តថា ការថយចុះនៃចំនួនមន្ត្រីរាជការស៊ីវិលនេះ ជាផ្នែកមួយនៃការចូលរួមកែទម្រង់រដ្ឋបាលសាធារណៈ ស្របតាមអភិក្រម «ពង្រឹងជាជាងពង្រីក» ដែលជាផ្នែកមួយដ៏សំខាន់ ក្នុងការចូលរួមសន្សំសំចៃបន្ទុកបុគ្គលិករបស់រាជរដ្ឋាភិបាលផងដែរ។ នេះបើតាមខ្លឹមសាររបស់ក្រសួងមុខងារសាធារណៈ។
លោក ហាស់ ប៊ុនថ្ថន អគ្គលេខាធិការនៃអគ្គលេខាធិការដ្ឋានក្រសួងមុខងារសាធារណៈ។ រូបភាពពីក្រសួងមុខងារសាធារណៈ។
មន្រ្តីរាជការស៊ីវិលទាំងនោះ មានក្របខណ្ឌ ក, ខ, គ និងប្រភេទផ្សេងៗ។ បើតាមរបាយការណ៍របស់ក្រសួងមុខងារសាធារណៈ មន្រ្តីរាជការស៊ីវិលក្នុងក្របខណ្ឌ«ក» នៅថ្នាក់ជាតិ មានចំនួន ៣៣ ៤៣៧នាក់ និងថ្នាក់ក្រោមជាតិ ចំនួន ៣៨ ៩៦៩នាក់។ រីឯក្របខណ្ឌ «ខ» នៅថ្នាក់ជាតិ មានចំនួន ៨ ៤៦៧នាក់ និងថ្នាក់ក្រោមជាតិ មានចំនួន ៦៦ ៤៦៨នាក់។
ដោយឡែក មន្រ្តីរាជការស៊ីវិលក្នុងក្របខណ្ឌ «គ» នៅថ្នាក់ជាតិ មានចំនួន ៣ ៤៣១នាក់ និងថ្នាក់ក្រោមជាតិ មានចំនួន ៧១ ៩៨១នាក់ និងមន្រ្តីប្រភេទផ្សេង មានចំនួន ៩ ២៨១នាក់។ ចំនួនមន្រ្តីរាជការស៊ីវិលគិតជាភាគរយទាំងថ្នាក់ជាតិ និងថ្នាក់ក្រោមជាតិ សម្រាប់ក្របខណ្ឌ«ក» មាន៣១ភាគរយ, ក្របខណ្ឌ«ខ» ៣២ភាគរយ, ក្របខណ្ឌ«គ» មាន ៣៣ភាគរយ និងមន្រ្តីប្រភេទផ្សេងៗ មាន ៤ភាគរយ៕
© រក្សាសិទ្ធិដោយ thmeythmey.com
Tag:
