.png)
.jpg)
.jpg)
កំណែទម្រង់៖ ក្រសួងមុខងារ រៀបចំប្រឡងរើសមន្រ្តី បាន៨ក្រសួងស្ថាប័ន និងមានមន្រ្តីជាប់ជាង ៤០០០នាក់
- ថ្ងៃព្រហស្បតិ៍ ទី២០ ខែមីនា ឆ្នាំ២០២៥ ម៉ោង ១២:០៩ នាទី រសៀល
លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ។ រូបភាពពីSTPM
ភ្នំពេញ៖ ត្រឹមរយៈពេល១៥ខែ ក្រសួងមុខងារសាធារណៈ បានរៀបចំការប្រឡងប្រជែងជ្រើសរើសមន្រ្តីរាជការឱ្យចូលបម្រើការនៅក្រសួងស្ថាប័ន ចំនួន ៨ក្រសួងស្ថាប័នដែលរៀបចំចំនួន ៤២លើក។ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ លើកឡើងដូច្នេះនៅក្នុងពិធីបិទសន្និបាត ដោយបន្តថា ការប្រឡងនេះ មានបេក្ខជនចូលរួមរហូតដល់១២ម៉ឺននាក់។
លោកឧបនាយករដ្ឋមន្រ្តី ហ៊ុន ម៉ានី បានឱ្យដឹងថា តាមរយៈកំណែទម្រង់ការប្រឡងជ្រើសរើសមន្រ្តីរាជការ ក្រសួងមុខងារ បានសហការជាមួយក្រសួងស្ថាប័នចំនួន៨ ក្នុងការរៀបចំការប្រឡង ដោយឈរលើគោលការណ៍ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ការប្រឡងទាំង៨ក្រសួងស្ថាប័ននេះ មានបេក្ខជនចូលរួមចំនួន ១២ម៉ឺននាក់ និងជ្រើសរើសបានមន្រ្តីរាជការក្របខណ្ឌចំនួន ៤ ៤៤៧នាក់។
ថ្លែងក្នុងពិធីបិទសន្និបាត លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ លើកឡើងពីការកើនឡើងបេក្ខជនចូលរួមប្រឡងយ៉ាងដូច្នេះ៖«ការដាក់ពាក្យរបស់បេក្ខជនសុំសិទ្ធប្រឡងប្រជែង បានបង្ហាញឱ្យឃើញពីកំណើននៃការជឿទុកចិត្តរបស់ប្រជាពលរដ្ឋទូទៅ ជាពិសេសយុវជន លើប្រព័ន្ធប្រឡងជ្រើសរើសមន្រ្តីបច្ចុប្បន្ន»។
ការប្រឡងដែលដឹកនាំរៀបចំដោយក្រសួងមុខងារសាធារណៈ មានការសហការពីអង្គភាពប្រឆាំងអំពើពុករលួយ និងអ្នកសង្កេតការណ៍សាធារណជន រួមទាំងតាមបណ្ដាសាកលវិទ្យាល័យ ដើម្បីធានាថាការប្រឡងប្រព្រឹត្តទៅដោយគ្មានការសូកប៉ាន់ តម្លាភាព និងយុត្តិធម៌។
ក្រសួងស្ថាប័នទាំង៨ រួមមាន ក្រសួងកសិកម្ម រុក្ខាប្រមាញ់ និងនេសាទ, ក្រសួងអប់រំ យុវជន និងកីឡា, អង្គភាពប្រឆាំងអំពើពុករលួយ, ក្រសួងសាធារណការ និងដឹកជញ្ជូន, ក្រសួងអភិវឌ្ឍន៍ជនបទ, ក្រសួងមុខងារសាធារណៈ, ក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល។
សូមបញ្ជាក់ថា «ជាប់ដោយមោទនៈ ធ្លាក់ដោយអស់ចិត្ត» ជាពាក្យស្លោកដែលដាក់ចេញដោយសម្ដេច ហ៊ុន ម៉ាណែត ក្នុងគោលបំណងលើកទឹកចិត្ត និងផ្ដល់ឱកាសដល់បេក្ខជនគ្រប់រូប អាចដាក់ពាក្យប្រឡងចូលបម្រើការងារជាមន្រ្តីរាជការដោយស្មើភាពគ្នា។ តាមរយៈការប្រឡងដែលរៀបចំដោយក្រសួងមុខងារសាធារណៈ លោក ហ៊ុន ម៉ានី លើកឡើងថា បានរួមចំណែកផ្លាស់ប្តូរទស្សនៈ ពីមានខ្សែ មានលុយ មកជាប់ដោយមោទនៈ និងធ្លាក់ដោយអស់ចិត្ត ដែលជាកត្តាផ្តល់ក្តីសង្ឃឹម និងការជឿជាក់ដល់យុវជនវ័យក្មេងកម្ពុជា៕
© រក្សាសិទ្ធិដោយ thmeythmey.com
Tag:
