.png)
.jpg)
.jpg)
ប៉ូលិស ឃាត់ខ្លួនក្រុមក្មេងទំនើងរហស្សនាម F4 និងក្រុម CCK បាន១០នាក់
- ថ្ងៃព្រហស្បតិ៍ ទី២០ ខែមីនា ឆ្នាំ២០២៥ ម៉ោង ៤:២៩ នាទី រសៀល
ក្រុមក្មេងទំនើង១០នាក់ ដែលសមត្ថកិច្ចឃាត់ខ្លួនបាន។ រូបពី នាយកដ្ឋាននគរបាលព្រហ្មទណ្ឌ
ភ្នំពេញ៖ ក្រុមក្មេងទំនើងចំនួន២ក្រុម ដែលមានគ្នា១០នាក់ ដែលមានរហស្សនាមថា ក្រុម F4 និងក្រុម CCK ត្រូវបានសមត្ថកិច្ចជំនាញបង្ក្រាបបាន បន្ទាប់ពីពួកគេវាយដំគ្នា។ ប្រតិបត្តិការបង្ក្រាបនេះ ធ្វើឡើងកាលពីថ្ងៃទី១៧មីនា ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
បើយោងតាមទំព័រហ្វេសប៊ុករបស់ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ ក្រុមជនសង្ស័យទាំងនេះ មានវ័យចន្លោះពី១៤ឆ្នាំ ទៅ២០ឆ្នាំប៉ុណ្ណោះ។ ក្រោយឃាត់ខ្លួន ជនសង្ស័យទាំង១០នាក់ ត្រូវបានសមត្ថកិច្ច កសាងសំណុំរឿង បញ្ជូនទៅអយ្យការអមសាលាដំបូង រាជធានីភ្នំពេញ។
ក្រៅពីឃាត់ខ្លួនក្រុមក្មេងទំនើងបាន១០នាក់ កម្លាំងការិយាល័យព្រហ្មណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ ក៏បានដកហូតវត្ថុតាងមួយចំនួនដែរ រួមមាន ម៉ូតូ៤គ្រឿង និងកាំបិតបុ័ងតោ កាំបិតផ្គាក់ ដាវ និងកណ្ដៀវ សរុប៥គ្រឿង។
សូមជម្រាបថា ករណីហិង្សានេះ បង្កឡើងដោយចេតនា មានទម្ងន់ទោសតាមមាត្រា២១៧ នៃច្បាប់ក្រមព្រហ្មទណ្ឌ ហើយក្រុមក្មេងទំនើងដែលត្រូវបានបង្ក្រាបនេះ ពួកគេក៏ជាប់ពាក់ព័ន្ធ ការបំផ្លាញទ្រព្យសម្បត្ដិរបស់អ្នកដទៃផងដែរ៕
© រក្សាសិទ្ធិដោយ thmeythmey.com
Tag:
