.png)
.jpg)
.jpg)
នាយករដ្ឋមន្រ្តី ចង់ឱ្យការប្រឡងចូលកងទ័ព និងនគរបាល មានសុក្រឹតភាពដូចប្រឡងមន្រ្តីរាជការស៊ីវិល
- ថ្ងៃព្រហស្បតិ៍ ទី២០ ខែមីនា ឆ្នាំ២០២៥ ម៉ោង ៦:៥៩ នាទី ល្ងាច
សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា។
ភ្នំពេញ៖ សម្ដេច ហ៊ុន ម៉ាណែត ចង់ឃើញការរៀបចំការប្រឡងជ្រើសរើសកងទ័ព និងនគរបាល មានសុក្រឹតភាពដូចការប្រឡងជ្រើសរើសមន្រ្តីរាជការស៊ីវិល។ក្នុងពិធីបិទសន្និបាតបូកសរុបការងាររបស់ក្រសួងមុខងារសាធារណៈ សម្ដេចនាយករដ្ឋមន្រ្តី ដាក់ក្ដីសង្ឃឹមដូច្នេះ បន្ទាប់ពីកំណែទម្រង់ការប្រឡងជ្រើសរើសមន្រ្តីរាជការស៊ីវិលរបស់ក្រសួងមុខងារសាធារណៈ ត្រូវបានរៀបចំដោយជោគជ័យ។
សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានកោតសរសើរចំពោះការដឹកនាំរៀបចំការប្រឡងជ្រើសរើសមន្រ្តីរាជការស៊ីវិលរបស់ក្រសួងមុខងារសាធារណៈ ដែលសហការជាមួយក្រសួងស្ថាប័ននានា។ តាមរយៈកំណែទម្រង់ការប្រឡងជ្រើសរើសមន្រ្តីនេះ សម្ដេច មានប្រសាសន៍ថា ការប្រឡងនេះ បានផ្តល់ក្តីសង្ឃឹមដល់យុវជនដែលគ្មានរបស់ក្រៅខ្លួន គ្មានឪពុកធ្វើធំ និងគ្មានលុយសូក។
ទាក់ទងនឹងកំណែទម្រង់ការប្រឡងជ្រើសរើសមន្រ្តីរាជការស៊ីវិលចូលបម្រើការងារនៅតាមក្រសួងស្ថាប័ននេះ សម្ដេច ហ៊ុន ម៉ាណែត បានដាក់ចេញពាក្យស្លោក«ជាប់ដោយមោទនៈ ធ្លាក់ដោយអស់ចិត្ត»។ ការប្រឡងដែលដឹកនាំដោយក្រសួងមុខងារសាធារណៈចំនួន ៤២ដង មានបេក្ខជនចូលរួមប្រឡងប្រមាណ ១២ម៉ឺននាក់ ខណៈអ្នកជាប់មានត្រឹម ៤០០០នាក់ប៉ុណ្ណោះ។
ត្រង់ចំណុចនេះ សម្ដេចនាយករដ្ឋមន្រ្តី លើកឡើងថា បេក្ខជនជាង១១ម៉ឺននាក់ គឺធ្លាក់ដោយអស់ចិត្ត គ្មាននរណាចេញមកតវ៉ា និងមិនអស់ចិត្តឡើយ។ សម្ដេច ហ៊ុន ម៉ាណែត បន្តថា សម្ដេចតែងតាមដានជាប់ជានិច្ចពីការប្រឡងដែលដឹកនាំដោយក្រសួងមុខងារសាធារណៈ ដែលធ្វើឱ្យបេក្ខជន និងអាណាព្យាបាលជឿទុកចិត្ត។
នាឱកាសនោះ សម្តេច ហ៊ុន ម៉ាណែត បានរំលឹកពីការសំណេះសំណាលជាមួយយុវជនមួយរូប ដែលបានប្រឡងជាប់នាយទាហាន នាអំឡុងពេលដែលសម្តេចកាន់តួនាទីជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកកម្ពុជា។ បើតាមសម្តេច យុវជនរូបនោះ បានទៅប្រឡងទាំងគ្មានសង្ឃឹម ខណៈអ្នកអង្គុយជិតខ្លួនរៀបរាប់ពីការចំណាយ និងមានឪពុកជាឧត្តមសេនីយ៍ ដែលអាចធានាថាជាប់។
ទីបំផុតយុវជនដែលគ្មានខ្សែរូបនោះ បានប្រឡងជាប់ ខណៈយុវជនដែលអាងខ្សែប្រឡងធ្លាក់។ ត្រង់នេះ សម្តេចនាយករដ្ឋមន្ត្រី លើកឡើងថា ការប្រឡងបានផ្តល់ក្តីសង្ឃឹមសម្រាប់យុវជនដែលពឹងលើសមត្ថភាពខ្លួនឯង ហើយក៏បានជះឥទ្ធិពលដល់អ្នកផ្សេងផងដែរ។ «នេះហើយជាអ្វីដែលយើងចង់បាន»។ សម្តេចគូសបញ្ជាក់យ៉ាងដូច្នេះ។
សម្ដេច ហ៊ុន ម៉ាណែត ជឿថាបើគ្មានភាពយុត្តិធម៌ បេក្ខជនជាង១១ម៉ឺននាក់ ដែលប្រឡងក្នុងសម័យកំណែទម្រង់នេះ នឹងមិននៅស្ងៀមឡើយ។ ទន្ទឹមនឹងនេះ សម្ដេចនាយករដ្ឋមន្រ្តី ដាក់ក្ដីសង្ឃឹមលើការប្រឡងចូលបម្រើកងទ័ព និងនគរបាល ឱ្យមានភាពសុក្រឹតដូចការប្រឡងមន្រ្តីរាជការស៊ីវិលដែរ។
«សុក្រឹត១០០ភាគរយនៅទូទាំងប្រទេស គឺមិនទាន់ទេ។ ប៉ុន្តែបន្តិចម្ដងៗ យើងនឹងប្ដូរទម្លាប់ និងប្ដូរផ្នត់គំនិត ហើយមានប្រជាពលរដ្ឋគាំទ្រ។ យើងនឹងឈានទៅដល់សុក្រឹតភាពនៅពេលណា»។ សម្ដេច មានប្រសាសន៍ដូច្នេះ ដោយបន្តថា៖« ខ្ញុំសូមឱ្យស្ថាប័នផ្សេងទៀត កែប្រឡង ព្រោះយើងប្រឡងតែមន្រ្តីរាជការស៊ីវិល ប្រឡងកងទ័ព ប្រឡងនគរបាល គឺខិតខំធ្វើយ៉ាងណាឱ្យមានសុក្រឹតភាព»។
សម្ដេច ក៏បានថ្លែងអំណរគុណដល់ឪពុកម្ដាយ និងបេក្ខជន ដែលខិតខំប្រឹងរៀនសូត្រ ដោយមិនរត់រកការអន្តរាគមន៍ ឬពឹងពាក់ខ្សែ ឬអ្នកធំណា។ សូមបញ្ជាក់ថា ត្រឹមរយៈពេល១៥ខែ ក្រសួងមុខងារសាធារណៈ បានរៀបចំការប្រឡងប្រជែងជ្រើសរើសមន្រ្តីរាជការឱ្យចូលបម្រើការនៅក្រសួងស្ថាប័ន ចំនួន ៨ក្រសួងស្ថាប័នដែលរៀបចំចំនួន ៤២លើក៕
© រក្សាសិទ្ធិដោយ thmeythmey.com
Tag:
