.png)
.jpg)
.jpg)
លោក ហ៊ុន ម៉ានី៖ ការវិភាគមុខងារ ជាការវាយតម្លៃពីស្ថានភាពសុខភាពរដ្ឋបាលសាធារណៈ
- ថ្ងៃព្រហស្បតិ៍ ទី២០ ខែមីនា ឆ្នាំ២០២៥ ម៉ោង ៧:៥៩ នាទី ល្ងាច
លោកឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ។ រូបភាពពីក្រសួងមុខងារសាធារណៈ។
ភ្នំពេញ៖ «ការវិភាគមុខងារ និងរចនាសម្ព័ន្ធ នឹងផ្ដល់ឱកាសឱ្យយើងវាយតម្លៃស្ថានភាពសុខភាពរដ្ឋបាលសាធារណៈ»។ នេះជាការលើកឡើងរបស់លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ ក្នុងពិធីបិទសន្និបាតការងាររបស់ក្រសួងមុខងារសាធារណៈ នៅថ្ងៃទី២០ មីនានេះ។
ក្នុងនីតិកាលទី៧ នៃរដ្ឋសភា រដ្ឋាភិបាលកម្ពុជា បានដាក់ចេញនូវវិធានការគន្លឹះចំនួន៣ គឺការកែលម្អប្រព័ន្ធជ្រើសរើសមន្ត្រីចូលបម្រើការងារក្នុងរដ្ឋបាលសាធារណៈ, ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារ និងការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្ម។
ពាក់ព័ន្ធនឹងការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានលើកឡើងពីការពិនិត្យឡើងវិញ និងការវិភាគមុខងារ និងរចនាសម្ព័ន្ធ ដែលក្រសួងកំពុងដឹកនាំកិច្ចការនេះ។ លោកឧបនាយករដ្ឋមន្រ្តី មានប្រសាសន៍ថា៖«ការវិភាគមុខងារ និងរចនាសម្ព័ន្ធ នឹងផ្ដល់ឱកាសឱ្យយើងវាយតម្លៃស្ថានភាពសុខភាពរដ្ឋបាលសាធារណៈជារួម។ ក្នុងនោះការស្វែងយល់ពីចំណុចខ្វះខាត, បញ្ហាប្រឈម, តម្រូវការ សំដៅឈានទៅកសាងភាពខ្លាំង ភាពធន់ សក្តានុពល និងថាមពល ដើម្បីឆ្ពោះទៅសម្រេចចក្ខុវិស័យឆ្នាំ២០៣០ និងឆ្នាំ២០៥០»។
លោក ហ៊ុន ម៉ានី បន្តថា ក្នុងបរិបទមិនច្បាស់លាស់នៃស្ថានភាពនយោបាយសកល ការវិភាគមុខងារ ជាមាគ៌ាមួយដល់ប្រព័ន្ធរដ្ឋបាលសាធារណៈកម្ពុជា អាចពង្រឹងខ្លួន ប្រឈមនឹងវិបត្តិនានា តាមរយៈការពង្រឹងសមត្ថភាពស្ថាប័ន ប្រសិទ្ធភាពការងារ ការសន្សំសំចៃ និងបង្កើនសមត្ថភាពប្រកួតប្រជែងក្នុងការការពារ និងទាញយកផលប្រយោជន៍បន្ថែមដល់កម្ពុជា។
«ប្រាកដណាស់ការដ្ឋានកែទម្រង់មុខងារសាធារណៈ ដែលក្រសួងមុខងារសាធារណៈ បានកំពុងសម្របសម្រួលសហការរៀបចំជាមួយក្រសួងស្ថាប័ន ទាមទារឱ្យយើងទាំងអស់គ្នា ធ្វើដំណើររួមគ្នា ជាជំហានៗ គិតគូរហ្មត់ចត់ ថ្លឹងថ្លែង ច្បាស់លាស់ ដោយឈរលើគោលការណ៍ ពង្រឹងជាជាងពង្រីក»។ លោក ហ៊ុន ម៉ានី ថ្លែងបែបនេះ ដោយបន្តថា ការធ្វើដូច្នេះដើម្បីឆ្ពោះទៅសម្រេចចក្ខុវិស័យវែងឆ្ងាយរបស់សម្ដេច ហ៊ុន ម៉ាណែត។
គិតមកដល់ខែមីនានេះ ក្រសួងមុខងារសាធារណៈ បានសហការរៀបចំសិក្ខាសាលាស្ដីពីការពិនិត្យឡើងវិញ និងការវិភាគមុខងារ និងរចនាសម្ព័ន្ធជាមួយក្រសួងស្ថាប័នចំនួន ២០រួចមកហើយ។ សូមបញ្ជាក់ថា ការពិនិត្យឡើងវិញ និងការវិភាគមុខងារ និងរចនាសម្ព័ន្ធ មិនមែនជារឿងថ្មីនោះទេ តែជាការបន្តអនុវត្តការងារក្នុងបរិបទការងារថ្មី ដែលក្រសួង ស្ថាប័ននីមួយៗ គឺជាម្ចាស់នៃការងារ សំដៅដល់ការសម្រេចគោលនយោបាយកែទម្រង់រដ្ឋបាលសាធារណៈ របស់រាជរដ្ឋាភិបាល៕
© រក្សាសិទ្ធិដោយ thmeythmey.com
Tag:
