.png)
.jpg)
.jpg)
កូរ៉េខាងជើង ប្រកាសជោគជ័យលើការសាកល្បងប្រព័ន្ធមីស៊ីលប្រឆាំងយន្តហោះ
- ថ្ងៃសុក្រ ទី២១ ខែមីនា ឆ្នាំ២០២៥ ម៉ោង ៧:២៩ នាទី ល្ងាច
លោក គីម ជុងអ៊ុន មេដឹកនាំកូរ៉េខាងជើង។ រូបភាព KCNA
កូរ៉េខាងជើង នៅថ្ងៃទី២០ ខែមីនា បានប្រកាសទទួលជោគជ័យលើការបាញ់សាកល្បងប្រព័ន្ធមីស៊ីលប្រឆាំងយន្តហោះ ក្រោមការត្រួតពិនិត្យរបស់មេដឹកនាំ គីម ជុងអ៊ុន។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងជើង KCNA នៅថ្ងៃទី២១ ខែមីនា។
រដ្ឋបាលមីស៊ីលរបស់កូរ៉េខាងជើង នៅថ្ងៃទី២០ ខែមីនា បានបាញ់សាកល្បង ដើម្បីពិនិត្យលើសមត្ថភាពគ្រប់ជ្រុងជ្រោយនៃប្រព័ន្ធមីស៊ីល ដែលត្រូវដាក់ឱ្យផលិតទ្រង់ទ្រាយធំ។
ក្នុងការសាកល្បងនេះ លោក គីម ជុងអ៊ុន មេដឹកនាំដ៏មានអំណាចរបស់កូរ៉េខាងជើង បានចូលរួមពិនិត្យលើការបាញ់មីស៊ីលដោយផ្ទាល់។ បើតាមលោក គីម ការសាកល្បងប្រព័ន្ធមីស៊ីលប្រឆាំងយន្តហោះនេះ បានបង្ហាញពីសមត្ថភាពឆ្លើយតបដ៏រហ័ស និងអាចទុកចិត្តបាន។
តាមការចុះផ្សាយនោះ លោក គីម បានបង្ហាញស្នាមញញឹម ពេលមីស៊ីលវាយប្រហារត្រូវគោលដៅ និងផ្ទុះនៅលើទឹក។
ដ្បិតចាត់ទុកទទួលបានជោគជ័យ លោក គីម បានប្រកាសថា កងទ័ពកូរ៉េខាងជើង នឹងត្រូវបានបំពាក់ជាមួយប្រព័ន្ធអាវុធការពារដ៏សំខាន់ ជាមួយសមត្ថភាពដ៏ខ្លាំង។ លោក គីម ក៏មិនភ្លេចអរគុណដ៏ក្រុមស្រាវជ្រាវ និងអភិវឌ្ឍអាវុធផងដែរ ដែលបានចូលរួមចំណែកដល់ការពង្រឹងសមត្ថភាពការពារជាតិ៕
© រក្សាសិទ្ធិដោយ thmeythmey.com
Tag:
