អង្គការអុកស្វាម សហការជាមួយក្រសួងបរិស្ថាន បានរៀបចំកម្មវិធីបោះជំរំយុវជន រយៈពេល២ថ្ងៃ ពី​ថ្ងៃ​ទី១៨-១៩ ខែមីនា នៅកោះហាន ខេត្តស្ទឹងត្រែង ដើម្បីប្រារព្ធទិវាអន្តរជាតិ​នៃ​សកម្មភាព​ដើម្បីទន្លេ ទិវានារី និងទឹក និងទិវាអន្តរជាតិនារី។ ព្រឹត្តិការណ៍នេះ មានគោលបំណងបង្កើនទំនាក់ទំនងកាន់តែ​ស៊ីជម្រៅ ជាមួយទន្លេ និង​ជំរុញសកម្មភាពរួមគ្នាដើម្បីការពារទន្លេមេគង្គ និងក្រោមវត្តមានអ្នកចូលរួមពីយុវជន ក្រសួង ស្ថាប័នពាក់ព័ន្ធ ប្រមាណ៦០នាក់។

​បើតាមសេចក្តីប្រកាសព័ត៌មានរបស់អង្គការអុកស្វាម កម្មវិធីនេះមានសកម្មភាពរួមសំខាន់ចំនួន៣ គឺ ការ​ជួប​ជុំបោះជំរំ​នៅកោះហាន ការពិភាក្សាតុមូល និងការធ្វើដំណើរតាមទូកដើម្បីមើលព្រៃលិចទឹកទន្លេមេគង្គ។ 

​ទន្លេ​មេគង្គ បានជួយដល់វិស័យកសិកម្ម ជលផល និងជីវចម្រុះ រួមចំណែកដល់ការកាត់បន្ថយការ​ប្រែ​ប្រួល​អា​កាសធាតុ និងមានសារៈសំខាន់ សម្រាប់ជីវភាពរស់នៅប្រចាំថ្ងៃរបស់ប្រជាពលរដ្ឋ ជាពិសេស​ជា​សក្តា​នុ​ពល​មួយដ៏សំខាន់ សម្រាប់វិស័យទេសចរណ៍ ផ្នែកវប្បធម៌ប្រពៃណី និងជាប្រវត្តិសាស្ត្រដ៏សំខាន់​សម្រាប់​សហគមន៍ នៃអាងទន្លេមេគង្គ ក៏ដូចសង្គមកម្ពុជា។ នេះបើតាមអង្គការអុកស្វាម។

លោក គល់ វឌ្ឍនា អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជា ដែលបានចូលរួម​បើក​កម្មវិធីបោះជំរំនេះ មាន​ប្រសាសន៍ថា ​នៅក្នុងអាងទន្លេមេគង្គក្រោម ការអភិវឌ្ឍន៍នៅភាគខាងលើ និង​ការប្រែប្រួលអាកាសធាតុ​កំពុងធ្វើឱ្យប្រែប្រួលដល់កម្រិតកម្ពស់ទឹក របប និងលំនាំនៃរំហូរទឹក ប្រព័ន្ធអេកូឡូស៊ី និងវិស័យកសិកម្ម ដែលធ្វើឱ្យប៉ះពាល់ដល់ជីវភាពរស់នៅរបស់ប្រជាជននៅក្នុងអាងទន្លេ។ ការការពារទន្លេត្រូវការកិច្ចសហការរវាងយុវជន សហគមន៍ អាជ្ញាធរ និងអ្នកបង្កើតគោលនយោបាយ។ លោក គល់ វឌ្ឍនា បញ្ជាក់ដូច្នេះ មុននឹងបន្ថែមថា៖ «កិច្ចសហការចូលរួមចំណែកធ្វើការងាររួមគ្នា នឹងចូលរួមចំណែកយ៉ាងសំខាន់ដល់ការធានាអនាគតនៃទន្លេមេគង្គ និងរក្សាបាននូវនិរន្តរភាពនៃប្រព័ន្ធអេកូឡូស៊ីទន្លេ។»។

លោក គល់ វឌ្ឍនា អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជា

លោកស្រី ភាណ សោភ័ណ  នាយិកាអង្គការអុកស្វាម យល់ថា សំឡេងរបស់ស្ត្រី ជនជាតិដើមភាគតិច ជនមាន​ពិការភាព និងក្រុមជនងាយរងគ្រោះដទៃទៀត គួរត្រូវបានផ្តល់អាទិភាពក្នុងការ រៀបចំ​​គោល​នយោបាយ និងផែនការធនធានទឹក  ដើម្បីធានាឱ្យបាននូនូវគោលនយោបាយ និងដំណោះស្រាយ​ដែលគិតគូរអំពីបញ្ហាប្រឈម ឆ្លើយតបនឹងតម្រូវការ និងប្រកបដោយបរិយាប័ន្ន។

លោកស្រី ងិន លីណា រដ្ឋលេខាធិការក្រសួងបរិស្ថាន និងជាប្រធានក្រុមការងារយេនឌ័រ នៃក្រសួងបរិស្ថាន​បានចាត់ទុកកម្មវិធីបោះជំរំនេះថា ជាជំហានដ៏សំខាន់មួយ ក្នុងការពង្រឹងសហគមន៍ ជាពិសេសយុវជន និង​ជំរុញការអនុវត្តបរិស្ថានប្រកបដោយនិរន្តរភាព។ លោកស្រី ងិន លីណា បន្ថែមថា៖ «ទឹក គឺជីវិត ហើយប្រធានបទនៃព្រឹត្តិការណ៍ “ទន្លេរបស់យើង អនាគតរបស់យើង” គូសបញ្ជាក់ពីតួនាទីសំខាន់នៃទន្លេ ដែលមានសុខភាពល្អ ក្នុងការផ្តល់ទឹកសាប គាំទ្រជីវៈចម្រុះ និងការអភិរក្សបេតិកភណ្ឌវប្បធម៌។»។ 

 លោកស្រី  ងិន លីណា  រដ្ឋលេខាធិការក្រសួងបរិស្ថាន និងជាប្រធានក្រុមការងារយេនឌ័រ នៃក្រសួងបរិស្ថាន

រដ្ឋលេខាធិការក្រសួងបរិស្ថាន បានអំពាវនាវឱ្យមានសកម្មភាពរួមគ្នាទាំងយុវជន ប្រជាសហគមន៍ និង​អាជ្ញាធរ​មូលដ្ឋាន ចូលរួមការពារទន្លេ និងធានានិរន្តរភាពរបស់ពួកគេសម្រាប់មនុស្សជំនាន់ក្រោយ។ 

តំណាងយុវជន កញ្ញា សួង ពេជ្រច័ន្ទបូរមី បានបង្ហាញការភ្ញាក់ផ្អើលដែលបាន​ឃើញព្រៃលិចទឹក​ទន្លេ​មេ​គង្គតែមួយគត់ និងការផ្សារភ្ជាប់រវាងទន្លេមេគង្គ និង​នឹងជីវភាពរស់នៅរបស់ពលរដ្ឋនៅក្នុងសហគមន៍។

​យុវតីរូបនេះ បញ្ជាក់ថា កម្មវិធីនេះពិតជាបានបញ្ជាក់ពីសារៈសំខាន់នៃការការពារប្រព័ន្ធអេកូឡូស៊ីទាំងនេះ។

បើតាមអង្គការអុកស្វាម ​នៅក្នុងកម្មវិធីនេះ អ្នកចូលរួម បានយល់ដឹងបន្ថែមទៀត អំពីបញ្ហាប្រឈមនៃបរិស្ថាន តម្រូវការបន្ទាន់សម្រាប់កិច្ចសហការដើម្បីអភិរក្សប្រព័ន្ធនៃព្រៃលិចទឹកមេគង្គ ដែលកំណត់ថា ជាតំបន់រ៉ាម​សារ។ កម្មវិធីនេះ ក៏បង្ហាញពីការប្តេជ្ញាចិត្តរួមគ្នាចំពោះទន្លេមេគង្គប្រកបដោយនិរន្តរភាព ដោយធានានូវ​ភាព​ចាំបាច់ក្នុងការថែទាំទន្លេសម្រាប់មនុស្សជំនាន់ក្រោយ។ 



នៅខេត្តស្ទឹងត្រែង អង្គការអុកស្វាម តាមរយៈគម្រោង បរិយាបន្នទឹកទន្លេមេគង្គ និងក្នុងភាពជាដៃគូជាមួយ​អង្គការភូមិខ្ញុំ និងអង្គការអភិរក្សវប្បធម៌ និងបរិស្ថាន បាននឹងកំពុងធ្វើការដើម្បីលើកកម្ពស់សិទ្ធិសហគមន៍ ជាពិសេសស្ត្រី ក្នុងការថែរក្សាធនធានទឹក។ អង្គការអុកស្វាម ក៏សហការជាមួយអង្គការសង្គមស៊ីវិលនានា ស្ថានប័នរដ្ឋាភិបាលពាក់ព័ន្ធ និងអង្គការអន្តររដ្ឋាភិបាល ដើម្បីពង្រឹងអភិបាលកិច្ចទឹក និងកសាងភាពធន់​របស់សហគមន៍ ដែលជួយឱ្យពួកគេ​សម្របខ្លួនទៅនឹងការប្រែប្រួល​ដែលបង្កឡើងដោយការអភិវឌ្ឍ​មិន​មាននិរន្តរភាពរបស់មនុស្ស និងការប្រែប្រួលអាកាសធាតុ៕