.png)
.jpg)
.jpg)
ស្រូវប្រាំងជាង៩ម៉ឺនហិកតា នៅរាជធានី-ខេត្តចំនួន១៧ ត្រូវបានជួយសង្រ្គោះ
- ថ្ងៃចន្ទ ទី២៤ ខែមីនា ឆ្នាំ២០២៥ ម៉ោង ២:៥៩ នាទី រសៀល
រូបភាព៖ ក្រសួងធនធានទឹក និងឧតុនិយម
ភ្នំពេញ៖ ក្រសួងធនធានទឹក និងឧតុនិម ជួយបូមទឹកសង្រ្គោះស្រូវប្រាំងបានប្រមាណ៩៣ ១៣៣ហិកតា ។ កិច្ចអន្តរាគមន៍បានធ្វើឡើងចាប់ពីខែធ្នូ ឆ្នាំ២០២៤ ដល់ទី១៧ ខែមីនា ឆ្នាំ២០២៥។
ផែនការធ្វើស្រូវប្រាំងក្នុងក្របខ័ណទូទាំងប្រទេសសម្រាប់ឆ្នាំ២០២៥ ត្រូវបានកំណត់ត្រឹមតែ៥៣៥ ៦០០ហិកតាប៉ុណ្ណោះ ប៉ុន្តែ ប្រជាកសិករបានដាំដុះលើសផែនការកើនរហូតដល់៩០៧ ០៣៥ហិកតា។ ការណ៍នេះ ធ្វើឱ្យស្រូវប្រាំងមួយចំនួនជួបបញ្ហាខ្វះខាតទឹកស្រោចស្រព។
យ៉ាងណាវិញ ចាប់ពីខែធ្នូ ឆ្នាំ២០២៤ ដល់ទី១៧ ខែមីនា ឆ្នាំ២០២៥ ក្រសួងធនធានទឹក ជួយបូមទឹកសង្រ្គោះស្រូវប្រាំងបានចំនួន៩៣ ១៣៣ហិកតា ក្នុងខេត្តចំនួន១៧។ ស្រូវប្រាំងដែលត្រូវបានជួយសង្គ្រោះនោះ រួមមាន នៅខេត្តបន្ទាយមានជ័យ បាត់ដំបង កំពង់ចាម កំពង់ធំ កំពត កណ្តាល ក្រចេះ ព្រៃវែង ពោធិ៍សាត់ សៀមរាប ស្វាយរៀង តាកែវ ប៉ៃលិន ត្បូងឃ្មុំ កំពង់ឆ្នាំង ឧត្តរមានជ័យ និងរាជធានីភ្នំពេញ។ នេះយោងតាមរបាយការណ៍របស់ក្រសួងធនធានទឹក ចេញផ្សាយនាថ្ងៃទី២៣ ខែមីនា។
ក្រសួងធនធានទឹកបានបញ្ជាក់ថា ក្នុងកិច្ចការជួយសង្រ្គោះនោះ ក្រុមការងារអន្តរាគមន៍បានប្រើប្រាស់ម៉ាស៊ីនបូមទឹកសរុប ១៧៣គ្រឿង ។ ក្នុងនោះ មាន ម៉ាស៊ីនបូមទឹកចល័តកម្លាំង៦៥សេះ ចំនួន១៦៩គ្រឿង និងម៉ាស៊ីនស្ថានីយចំនួន ៤គ្រឿង ដោយបានប្រើប្រាស់ប្រេងឥន្ធនៈ៣៤៤៤៨០លីត្រ។ ចំណែក ផ្ទៃដីមួយចំនួនទៀត ទទួលបានការជួយអន្តរាគមន៍ពីស្ថានីយបូមទឹកប្រើថាមពលអគ្គិសនី និងការគាំទ្រពីសប្បុរសជនគ្រប់ទិសទី ព្រមទាំងក្រុមការងាររដ្ឋាភិបាលចុះមូលដ្ឋាននានា។
ជាមួយគ្នានេះ ក្រសួងធនធានទឹក ក្រើនរំលឹកដល់ក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ អាជ្ញាធរដែនដី និងសាធារណជន ប្រើប្រាស់ទឹកសន្សំសំចៃក្នុងកម្រិតខ្ពស់បំផុត ជាពិសេសនៅតំបន់ជនបទដាច់ស្រយាលដែលនៅឆ្ងាយពីប្រភពទឹក៕
© រក្សាសិទ្ធិដោយ thmeythmey.com
Tag:
