នាយករដ្ឋមន្រ្តីកាណាដាថ្មី លោក Mark Carney នៅថ្ងៃទី២៣ ខែមីនា បានប្រកាសរៀបចំការបោះឆ្នោតមុនពេលកំណត់ ស្របពេលប្រឈមមុខសង្រ្គាមពាណិជ្ជកម្ម និងការគំរាមរបស់ លោក ដូណាល់ ត្រាំ ក្នុងការដាក់កាណាដាជារដ្ឋទី៥១ របស់អាម៉េរិក។ ក្នុងការបោះឆ្នោតនេះ លោក Carney ត្រូវប្រជែងជាមួយមេដឹកនាំបក្សអភិរក្ស លោក Pierre Poilievre ដែលកំពុងមានប្រជាប្រិយភាពប្រហាក់ប្រហែលគ្នា។

ចាប់តាំងពីឡើងកាន់តំណែង លោក ដូណាល់ ត្រាំ ប្រធានាធិបតីអាម៉េរិក បានប្រកាសមិនដាច់ពីមាត់ក្នុងការចង់បានកាណាដាជារដ្ឋទី៥១ របស់អាម៉េរិក ហើយបានដាក់ពន្ធ ដែលពន្យារពេលជាបន្តបន្ទាប់។ ស្របពេលរងសម្ពាធពីប្រទេសជិតខាង លោក Mark Carney នាយករដ្ឋមន្រ្តីកាណាដា បានប្រកាសរៀបចំការបោះឆ្នោតមុនពេលកំណត់ នៅថ្ងៃទី២៨ ខែមេសា។ «យើងកំពុងរងវិបត្តិដ៏ធ្ងន់ធ្ងរជាងពេលណាទាំងអស់ក្នុងជីវិតរបស់យើង ដោយសារសកម្មភាពពាណិជ្ជកម្មមិនត្រឹមត្រូវ និងការគំរាមកំហែងរបស់លោក ត្រាំ មកលើអធិបតេយ្យរបស់យើង»។ ប្រមុខរដ្ឋាភិបាលកាណាដាថ្មី បានសង្កត់ធ្ងន់បែបនេះ ក្រោយអ្នកតំណែងរបស់មហាក្សត្រអង់គ្លេស បានឯកភាពលើសំណើរៀបចំការបោះឆ្នោត។ 

ក្នុងកិច្ចសម្ភាសជាមួយអ្នកសារព័ត៌មាន លោក Carney មានភាពជឿជាក់ថា ដើម្បីឆ្លើយតបនឹងទង្វើរបស់លោក ត្រាំ កាណាដា ត្រូវតែមានសេដ្ឋកិច្ចរឹងមាំ ដ្បិតមេដឹកនាំប្រទេសជិតខាងរូបនេះ​ ព្យាយាមបំបែកកាណាដា ហើយដាក់ប្រទេសខ្លួនជារដ្ឋចំណុះ។ ត្រង់ចំណុចនេះ មេដឹកនាំកាណាដា បានប្តេជ្ញាមិនឱ្យអាម៉េរិកលេបយកកាណាដាជាដាច់ខាត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

ការប្រកាសជំហរបែបតតាំងរបស់លោក Carney បែបនេះ គឺខុសនឹងពេលលោកស្បថចូលកាន់តំណែង។ កាលនោះ នាយករដ្ឋមន្រ្តីកាណាដា បានសន្យាធ្វើការជាមួយអាម៉េរិក ដើម្បីបន្ធូរបន្ថយភាពតានតឹងផ្នែកពាណិជ្ជកម្មរវាងប្រទេសជិតខាងទាំងពីរ។ 

ក្នុងការបោះឆ្នោតកាណាដាអាណត្តិនេះ លោក Carney ចេញពីបក្សសេរីនិយម និងលោក Pierre Poilievre ចេញពីបក្សអភិរក្សនិយម ដែលជាបក្សប្រឆាំង មានប្រជាប្រិយភាពប្រហាក់ប្រហែលគ្នា។ 

កន្លងមក លោក Poilievre ដែលជាមេដឹកនាំបក្សប្រឆាំង បានរិះគន់បក្សសេរីនិយម ធ្វើឱ្យកាណាដាទន់ខ្សោយ ក្រោយការបិទខ្ទប់ការអភិវឌ្ឍធនធាន, បរាជ័យលើការផ្តល់ហិរញ្ញវត្ថុសម្រាប់យោធា, មិនអាចគ្រប់គ្រងជនអន្តោប្រវេសន៍ និងសេដ្ឋកិច្ចរបស់ប្រទេស។ 

តាមច្បាប់របស់កាណាដា ប្រជាជនត្រូវបោះឆ្នោតរើសសមាជិករដ្ឋសភា ឬ House of Commons មុនពេលសមាជិករដ្ឋសភារើសនាយករដ្ឋមន្រ្តី។ មេដឹកនាំបក្សនយោបាយ ដែលទទួលបានអាសនៈភាគច្រើនក្នុងសភា នឹងក្លាយជានាយករដ្ឋមន្រ្តី។ ក្នុងពេលបច្ចុប្បន្ន រដ្ឋសភាកាណាដាមានសមាជិកចំនួន ៣៣៨អាសនៈ ដោយតំណាងឱ្យតំបន់ផ្សេងៗក្នុងប្រទេស៕