.png)
.jpg)
.jpg)
កម្មករ ១ម៉ឺន៥ពាន់នាក់ មមាញឹកសាងសង់ព្រលានយន្តហោះថ្មី ដើម្បីដាក់ឱ្យប្រើប្រាស់នៅខែកក្កដា
- ថ្ងៃចន្ទ ទី២៤ ខែមីនា ឆ្នាំ២០២៥ ម៉ោង ៩:៥៩ នាទី យប់
បច្ចុប្បន្ននេះ កម្មករចំនួន ១ម៉ឺន៥ពាន់នាក់ កំពុងសាងសង់អាកាសយានដ្ឋានអន្តរជាតិតេជោ។ គិតមកដល់ពេលនេះ អាកាសយានដ្ឋាននេះ សាងសង់បាន ៩៥ភាគរយ ដែលមានវិស្វករខ្មែរចំនួន ២០០នាក់ និងកម្មករជាពលរដ្ឋរស់នៅតំបន់ជិតអាកាសយានដ្ឋាន។ បើតាម លោក ឆារស៍ វ៉ាន់ អភិបាលនៃគម្រោងសាងសង់អាកាសយានដ្ឋានអន្តរជាតិតេជោ អាកាសយានដ្ឋាននេះ គ្រោងដាក់ដំណើរការនៅខែកក្កដាខាងមុខ។
សូមអញ្ជើញទស្សនាវីដេអូខាងក្រោមដូចតទៅ៖
គម្រោងសាងសង់អាកាសយានដ្ឋានអន្តរជាតិតេជោ ដែលបើកការដ្ឋានកាលពីឆ្នាំ២០១៨ គ្រោងបញ្ចប់ការសាងសង់ដំណាក់កាលទី១ និងបើកដំណើរការនៅខែកក្កដា ឆ្នាំ២០២៥នេះ។ អាកាសយានដ្ឋានអន្តរជាតិតេជោនេះ សាងសង់លើផ្ទៃដី ២៦០០ហិកតា និងជាអាកាសយានដ្ឋានធំជាងគេនៅកម្ពុជា។
មិនត្រឹមបម្រើវិស័យអាកាសចរណ៍នោះទេ អាកាសយានដ្ឋានអន្តរជាតិតេជោ នឹងក្លាយជាមជ្ឈមណ្ឌលទទួលទេសចរ សម្រាប់ដំណើរកម្សាន្ត ជាពិសេសជាកន្លែងផ្លាស់ប្ដូរជើងហោះហើរដ៏ធំមួយ។ នេះជាការលើកឡើងរបស់លោក ឆារស៍ វ៉ាន់ អភិបាលនៃគម្រោងសាងសង់អាកាសយានដ្ឋានអន្តរជាតិតេជោ។
ជាមួយគ្នានេះ ក្នុងបរិវេណអាកាសយានដ្ឋានអន្តរជាតិតេជោ ក្រុមហ៊ុនសាងសង់នឹងរៀបចំភូមិវប្បធម៌សម្រាប់ទេសចរទស្សនាផងដែរ។ ក្រៅពីនេះ ក្នុងអាកាសយានដ្ឋាននេះ ក៏មានចម្លាក់បដិមាប្រមាណ ២០០ ដែលបង្ហាញពីអត្តសញ្ញាណរបស់កម្ពុជា៕
© រក្សាសិទ្ធិដោយ thmeythmey.com
Tag:
