នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ បានច្រានចោលការចោទប្រកាន់របស់បក្សប្រឆាំង ដែលថាលោកស្រីគេចវេសពីការបង់ពន្ធ លើការផ្ទេរទ្រព្យសម្បត្តិនៅក្នុងឆ្នាំ២០១៦។ ការបដិសេធនេះ ធ្វើឡើងនៅក្នុងសភាថៃ ជុំវិញការជជែកដេញដោលតាមដានការងាររដ្ឋាភិបាល នៅថ្ងៃទី២៤ ខែមីនា។

«ទោះបីខ្ញុំនៅក្មេងជាងអ្នក តែខ្ញុំច្បាស់ណាស់ថាបានបង់ពន្ធច្រើនជាងអ្នក»។ កាសែត Bangkok Post បានស្រង់សម្តីលោកស្រី ផែថងថាន ស៊ីណាវ៉ាត់ បានតបតទៅនឹងសមាជិកសភាបក្សប្រឆាំងដែលចោទលោកស្រីថាបានគេសវេសពន្ធ។ 

នាយករដ្ឋមន្រ្តីវ័យក្មេងរូបនេះបានបញ្ជាក់ជាថ្មីថា លោកស្រីបានបញ្ជូនបញ្ជីទ្រព្យសម្បត្តិខ្លួនទៅគណៈកម្មាធិការជាតិប្រឆាំងអំពើពុករលួយ (NACC) រួចរាល់ហើយ តាមតម្រូវការរបស់ច្បាប់ ដោយសង្កត់ធ្ងន់ថា «អ្នកស្រីមានតម្លាភាព និងគ្មានអ្វីត្រូវលាក់បាំងនោះទេ»។

សមាជិកសភាបក្សប្រជាជន លោក Wiroj Lakkhanaadisorn បានចោទប្រកាន់លោកស្រី ផែថងថាន ថាមិនបានបង់ពន្ធជាង ២១៨,៧លានបាត (៦,៤៣លានដុល្លារ) ដែលទាក់ទងនឹងភាគហ៊ុនដែលមានតម្លៃប្រហែល ៤,៤៤ពាន់លានបាត (១៣០លានដុល្លារ) ដែលត្រូវបានផ្ទេរទៅឲ្យលោកស្រីដោយសមាជិកគ្រួសារក្នុងឆ្នាំ ២០១៦។ នេះបើតាមការចុះផ្សាយរបស់សារព័ត៌មាន Thai PBS ។

អំឡុងពេលជជែកដេញដោលនៅសភា លោក Wiroj បានអះអាងថា នាយករដ្ឋមន្ត្រីបានចេញកិច្ចសន្យាចំនួន៩ ដល់បងប្អូនបង្កើតរបស់លោកស្រីរួមទាំង ម្តាយ ពូ និងមីង ដើម្បីជាថ្នូរនឹងការទទួលយកភាគហ៊ុន។

លោកស្រី ផែថងថាន បានតបតទៅវិញថា ដោយសារលោកស្រីមិនទាន់បានបង់ថ្លៃភាគហ៊ុននោះ ដូច្នេះលោកស្រីមិនតម្រូវឱ្យប្រកាសថាជាផ្នែកមួយនៃទ្រព្យសម្បត្តិរបស់ខ្លួននោះទេ។អ្នកនយោបាយស្រ្តីវ័យ៣៨ឆ្នាំរូបនេះ បានបន្ថែមថា នៅពេលធ្វើការទូទាត់ លោកស្រីនឹងបញ្ចូលវាទៅក្នុងបញ្ជីទ្រព្យសម្បត្តិហើយនឹងដាក់ជូនទៅ NACC។

ទាក់ទិននឹងការចោទប្រកាន់ថា ការទិញដីទំហំ ១៤៨ហិកតារបស់គ្រួសារលោកស្រីនៅក្នុងខេត្ត Pathum Thani គឺខុសច្បាប់នោះ នាយករដ្ឋមន្ត្រីរូបនេះបានបញ្ជាក់ថា គ្រួសាររបស់លោកស្រីបានទិញដីនោះកាលពីលោកស្រីនៅក្មេង។ លោកស្រីបន្ថែមថា នាយកដ្ឋាន​ដីធ្លីថៃ​ដែល​ចេញ​ប័ណ្ណ​កម្មសិទ្ធិនោះ ​បាន​អះអាង​ថា​មិន​មាន​អ្វី​ខុស​ច្បាប់​ចំពោះ​ការ​ទិញ​លក់​ដីនោះ​ទេ។

កាលពីថ្ងៃទី៣ ខែធ្នូ លោកស្រី ផែថងថាន ស៊ីណាវ៉ាត់ បានប្រកាសទ្រព្យជាង ៤០០លានដុល្លារ។ ឯកសារបង្ហាញនៅ NACC បានបង្ហាញថា ប្រាក់ចំណូលរបស់លោកស្រី ផែថងថាន មានប្រហែល ៧,៧លានដុល្លារក្នុងមួយឆ្នាំ​។ ក្នុងនោះប្រាក់ខែជានាយករដ្ឋមន្ត្រីទទួលបាន ៩៩ ០០០ដុល្លារក្នុងមួយឆ្នាំ ខណៈភាគលាភដែលទទួលបានពីអាជីវកម្មមានតម្លៃ ៧,៥៣លានដុល្លារ រួមទាំងឡានស៊េរីទំនើប នាឡិកា កាបូបព្រមទាំងមានទ្រព្យសម្បត្តិនៅទីក្រុងឡុងដ៍ និងប្រទេសជប៉ុនផងដែរ។ 

លោកស្រីក៏បានប្រកាសកិច្ចព្រមព្រៀងបំណុលចំនួន៦ ជាមួយសមាជិកគ្រួសារ ដែលសរុបជាទឹកប្រាក់ប្រមាណ ៨១,៣លានដុល្លារ រួមទាំងប្រាក់កម្ចីពីម្តាយ បងប្អូនបង្កើត និងពូជាដើម៕