ភ្នំពេញ៖ សម្តេច ឃួន សុដារី ប្រធានរដ្ឋសភា លើកទឹកចិត្តឱ្យស្រ្តីចាប់ជំនាញ «បច្ចេកវិទ្យាឌីជីថល» កាន់តែច្រើន ដើម្បីពួតដៃគ្នាដឹកនាំកម្ពុជាទៅជាប្រទេស ដែលមានប្រាក់ចំណូលមធ្យមកម្រិតខ្ពស់ឆ្នាំ ២០៣០ និងបន្តក្លាយជាប្រទេសចំណូលខ្ពស់ឆ្នាំ ២០៥០។

ក្នុងវេទិកាផ្សព្វផ្សាយស្ដីពី «វឌ្ឍនភាពវិស័យឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍» នៅវិមានរដ្ឋសភា នាថ្ងៃទី២៥ ខែមីនា សម្ដេច ឃួន សុដារី បានលើកឡើងថា បច្ចុប្បន្ន ស្រ្តីកម្ពុជាហាក់មានគម្លាតឆ្ងាយពីវិស័យបច្ចេកវិទ្យាឌីជីថល។ ការណ៍នេះ មិនទាន់បានបង្ហាញពីសមភាពយេនឌ័រនៅឡើយទេ។

សម្ដេច បានស្នើឱ្យ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជួយជ្រោមជ្រែងស្រ្តីឱ្យបានប្រឡូកក្នុងវិស័យបច្ចេកវិទ្យាឌីជីថលកាន់តែច្រើន ដើម្បីពួតដៃគ្នា​ឈានទៅសម្រេចគោលដៅប្រែក្លាយកម្ពុជាជាប្រទេសមានប្រាក់ចំណូលមធ្យមកម្រិតខ្ពស់ឆ្នាំ ២០៣០ និងបន្តក្លាយជាប្រទេសចំណូលខ្ពស់ឆ្នាំ ២០៥០។

សម្ដេច ឃួន សុដារី ថ្លែងដូច្នេះថា៖«ក្មេងស្រីៗ ត្រូវតែយកចិត្តទុកដាក់លើវិស័យបច្ចេកវិទ្យាឌីជីថល ដើម្បីជំរុញវិស័យនេះឱ្យកាន់តែលឿន ដោយខ្ញុំសង្ឃឹមថា ស្រ្តីមានលទ្ធភាពកាន់តែកៀកបច្ចេកវិទ្យាក្នុងយុគសម័យថ្មីនេះ។ ដូច្នេះ ខ្ញុំសូមឱ្យរដ្ឋមន្រ្តីក្រសួងឧស្សាហកម្ម (លោក ហែម វណ្ណី) ធ្វើយ៉ាងម៉េចជួយជំរុញឱ្យស្រ្តីបានប្រឡូកក្នុងវិស័យវិស័យនេះ ដើម្បីធ្វើយ៉ាងណារួមដៃជាមួយបុរសក៏ដូចស្រទាប់ប្រជាជន ដើម្បីសម្រេចគោលដៅកម្ពុជាឆ្នាំ២០៣០ និងឆ្នាំ២០៥០»។ 

រដ្ឋាភិបាល នីតិកាលទី៧ នៃរដ្ឋសភា បានដាក់ចេញ «យុទ្ធសាស្ត្របញ្ចកោណ-ដំណាក់កាលទី១» ដើម្បីជំរុញកំណើនការងារ, សមធម៌, ប្រសិទ្ធភាព និងចីរភាព ដោយបានកំណត់យកអាទិភាពគន្លឹះ ៥ គឺ «មនុស្ស ផ្លូវ ទឹក ភ្លើង ជាពិសេសគឺ បច្ចេកវិទ្យាឌីជីថល»។ ដើម្បីគាំទ្រយុទ្ធសាស្ត្រនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំ និងអនុវត្តផែនទីបង្ហាញផ្លូវ និងរបៀបវារៈស្រាវជ្រាវជាតិ, ការកសាងប្រព័ន្ធអេកូឡូស៊ី និងឯកសារសំខាន់ៗផ្សេងទៀត។ លើសពីនេះ ក៏មាន ការសិក្សាស្រាវជ្រាវ និងជំរុញការប្រើបច្ចេកវិទ្យាឌីជីថល និងនវានុវត្តន៍ ក្នុងគោលដៅបម្រើឱ្យអន្តរវិស័យ ជាពិសេសវិស័យឧស្សាហកម្ម ៤.០ និងឧស្សាហកម្មជំនាន់ក្រោយបន្តបន្ទាប់ទៀត៕