បើតាមសេចក្តីព្រាងច្បាប់ស្តីពីការរៀបចំរដ្ឋបាលមូលដ្ឋានដែលធ្វើវិសោធនកម្ម ចំនួនអង្គភាពរដ្ឋបាលថ្នាក់ខេត្តរបស់វៀតណាម នឹងត្រូវកាត់បន្ថយពីចំនួន ៦៣ខេត្ត នាពេលបច្ចុប្បន្នមកនៅជាង ៥០ភាគរយ ដើម្បីកាត់បន្ថយការចំណាយរបស់រដ្ឋ។ នេះបើតាមសារព័ត៌មាន VnExpress។

បើតាមក្រសួង​មហាផ្ទៃ​វៀតណាម សេចក្តី​ព្រាង​ច្បាប់ថ្មី​នេះ​មាន ៧ជំពូកនិង ៤៩មាត្រា ដែលស្នើឱ្យមានគំរូរដ្ឋាភិបាលថ្នាក់មូលក្រោមជាតិមាន ២កម្រិតប៉ុណ្ណោះ រួមមានថ្នាក់ខេត្ត និងថ្នាក់ឃុំ។

ដើម្បីធានាថា អាជ្ញាធរមូលដ្ឋានគ្រប់លំដាប់ថ្នាក់អនុវត្តការងារ និងអំណាចដែលបានប្រគល់ឱ្យប្រកបដោយប្រសិទ្ធភាព សេចក្តីព្រាងច្បាប់នេះបានធ្វើវិសោធនកម្ម និងបន្ថែមបទប្បញ្ញត្តិស្តីពីរចនាសម្ព័ន្ធរៀបចំរបស់អាជ្ញាធរមូលដ្ឋាននៅថ្នាក់ខេត្ត និងឃុំ។

កាលពីថ្ងៃទី២៨ ខែកុម្ភៈ ការិយាល័យនយោបាយវៀតណាមបានចេញសេចក្តីសម្រេចលេខ១២៧ ដោយប្រគល់ឱ្យគណៈកម្មាធិការបក្សរដ្ឋាភិបាលដឹកនាំការស្រាវជ្រាវ និងបង្កើតគម្រោង ហើយដាក់ជូនការិយាល័យនយោបាយ ស្តីពីការច្របាច់បញ្ចូលគ្នានៃអង្គភាពរដ្ឋបាលថ្នាក់ខេត្តមួយចំនួន លុបបំបាត់ការងាររដ្ឋបាលថ្នាក់ស្រុក និងបន្ត​ការងាររដ្ឋបាលថ្នាក់ស្រុកទៅ​ថ្នាក់​ឃុំ។

ក្រោយមក គណៈកម្មាធិការបក្សរដ្ឋាភិបាលវៀតណាម បានឯកភាពដាក់ជូនអាជ្ញាធរមានសមត្ថកិច្ចនូវផែនការបញ្ចូលគ្នា និងកាត់ចំនួន ៥០ភាគរយនៃអង្គភាពរដ្ឋបាលថ្នាក់ខេត្ត និងបន្ថយ ៦០-៧០ភាគរយនៃអង្គភាពថ្នាក់មូលដ្ឋាន បើប្រៀបធៀបនឹងបច្ចុប្បន្ន។ គេ​រំពឹង​ថា ការ​ច្របាច់​បញ្ចូល​គ្នា​នៃ​អង្គភាព​រដ្ឋបាល​ថ្នាក់​ខេត្ត​នៅ​ទូទាំង​ប្រទេស​ នឹង​ត្រូវ​បញ្ចប់​មុន​ថ្ងៃ​ទី​៣០ ខែ​សីហា ហើយ​ដាក់​ឱ្យ​ដំណើរការ​ចាប់ពី​ខែ​កញ្ញា។ អង្គភាពរដ្ឋបាលថ្នាក់ឃុំនឹងត្រូវបានបញ្ចូលគ្នាមុនថ្ងៃទី៣០ ខែមិថុនា ហើយឃុំ និងសង្កាត់ថ្មីនឹងដំណើរការចាប់ពីថ្ងៃទី ១ ខែកក្កដា។

អគ្គលេខាធិការបក្សកុម្មុយនីស្តវៀតណាម លោក តូ ឡិម  បានបញ្ជាក់ថា ការសម្រួលបរិក្ខារ និងការរៀបចំឡើងវិញនូវអង្គភាពរដ្ឋបាលនៅគ្រប់កម្រិត មិនមែនគ្រាន់តែជាបញ្ហានៃការកែសម្រួលព្រំដែនរដ្ឋបាលប៉ុណ្ណោះទេ ប៉ុន្តែថែមទាំងកែសម្រួលទំហំសេដ្ឋកិច្ចផងរួមទាំងការកែសម្រួលក្នុងការបែងចែកកម្លាំងពលកម្ម វិមជ្ឈការ ការកែសម្រួលការបែងចែក និងការរួមបញ្ចូលគ្នានៃធនធានសេដ្ឋកិច្ច។

បច្ចុប្បន្ន វៀតណាមមានអង្គភាពរដ្ឋបាលខេត្តចំនួន៦៣, ស្រុក ខណ្ឌ ៦៩៦ រួមទាំងឃុំ និងសង្កាត់ចំនួន ១០ ០៣៥។ យោងតាមបទប្បញ្ញត្តិរបស់គណៈកម្មាធិការអចិន្ត្រៃយ៍រដ្ឋសភា បច្ចុប្បន្នរដ្ឋធានី-ខេត្ត ត្រូវធានានូវលក្ខណៈវិនិច្ឆ័យចំនួនបី រួមមាន ទំហំប្រជាជន ផ្ទៃដី និងចំនួនអង្គភាពរដ្ឋបាលថ្នាក់ស្រុក។ ខេត្ត​ភ្នំ ​និង​ខ្ពង់រាប​ត្រូវ​មាន​ប្រជាជនពី ៩០០ ០០០ និង​ផ្ទៃ​ដី ៨០០០គីឡូម៉ែត្រការ៉េ។  ខេត្ត​នៅ​កន្លែង​ផ្សេង​ទៀត​មាន​ប្រជាជន​ពី ១,៤​លាន​នាក់ និង​ផ្ទៃដីយ៉ាងតិច ​៥០០០​គីឡូម៉ែត្រ​ការ៉េ។ 

ជាមួយគ្នានេះ ខេត្តត្រូវមានអង្គភាពរដ្ឋបាលថ្នាក់ស្រុកចំនួន៩ ក្នុងនោះមានយ៉ាងហោចណាស់ក្រុងមួយ ឬទីរួមខេត្តមួយ។ ចំណែកអង្គភាពរដ្ឋបាលស្រុក និងឃុំក៏មានស្តង់ដារពីចំនួនប្រជាជន និងផ្ទៃដីផងដែរ។  បើប្រៀបធៀបនឹងបទប្បញ្ញត្តិខាងលើ បច្ចុប្បន្ននេះ មានខេត្តចំនួន ១០ នៅទូទាំងប្រទេស ដែលមិនបានបំពេញតាមលក្ខណៈវិនិច្ឆ័យចំនួន៣ ។ ខេត្ត ក្រុង រាប់សិបមិនបំពេញតាមលក្ខណៈវិនិច្ឆ័យមួយ ឬពីរ លើផ្ទៃដី ចំនួនប្រជាជន និងចំនួនអង្គភាពរដ្ឋបាលថ្នាក់ស្រុក។

គិតត្រឹមឆ្នាំ២០២២ វៀតណាមមានមន្រ្តីជិត ២លាននាក់។ តាមការប្រកាសរបស់រដ្ឋាភិបាលវៀតណាម នៅក្នុងឆ្នាំនេះ មន្រ្តីប្រមាណ ១០ម៉ឺននាក់ អាចនឹងកាត់បន្ថយ ឬអនុញ្ញាតឱ្យចូលនិវត្តន៍មុនពេលកំណត់ ដែលជាផ្នែកនៃការធ្វើកំណែទម្រង់លើស្ថាប័នរដ្ឋ៕