.png)
.jpg)
.jpg)
«កំពតសង្ក្រាន្តឆ្នាំ២០២៥» អបអរចូលឆ្នាំខ្មែរ និងសមិទ្ធផលថ្មីៗរបស់ខេត្តកំពត
- ថ្ងៃពុធ ទី២៦ ខែមីនា ឆ្នាំ២០២៥ ម៉ោង ៧:៥៩ នាទី ព្រឹក
រូបភាពពីរដ្ឋបាលខេត្តកំពត។
ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរ នៅថ្ងៃទី១៤-១៦ មេសាខាងមុខ រដ្ឋបាលខេត្តកំពត នឹងរៀបចំព្រឹត្តិការណ៍«កំពតសង្ក្រាន្តឆ្នាំ២០២៥»។ បើតាមរដ្ឋបាលខេត្តកំពត ក្នុងព្រឹត្តិការណ៍នេះ មានកម្មវិធីកម្សាន្តសប្បាយជាច្រើន រួមទាំងពិធីស្រង់ព្រះ។
ព្រឹត្តិការណ៍«កំពតសង្ក្រាន្តឆ្នាំ២០២៥» រៀបចំឡើងដើម្បីស្វាគមន៍ឆ្នាំថ្មី និងស្រូបទាញភ្ញៀវជាតិ និងអន្តរជាតិមកទស្សនាលេងកម្សាន្តខេត្តកំពត។ «កំពតសង្ក្រាន្តឆ្នាំ២០២៥» នឹងមានការលេងល្បែងប្រជាប្រិយ ការសម្តែងសិល្បៈ ការប្រគំតន្ត្រីខ្នាតធំ ពិធីស្រង់ព្រះ រួមនឹងការតុបតែងលម្អអគ្គិសនីបំភ្លឺតាមដងផ្លូវសាធារណៈសំខាន់ៗ។
បើតាមរដ្ឋបាលខេត្តកំពត ការរៀបចំព្រឹត្តិការណ៍នេះ ក៏ដើម្បីចូលរួមអបអរសាទរសមិទ្ធផលថ្មីៗ មានដូចជាសេះសមុទ្របាញ់ទឹក នាឡិកាយក្ស និងសួនបាញ់ទឹករាំតាមចង្វាក់ភ្លេង លម្អដោយភ្លើងពណ៌នៅព្រែកកំពង់បាយ។ ដើម្បីចូលរួមកម្សាន្តសប្បាយក្នុងព្រឹត្តិការណ៍ខាងលើ រដ្ឋបាលខេត្តកំពត អំពាវនាវដល់ប្រជាពលរដ្ឋ និងភ្ញៀវទេសចរជាតិ និងអន្តរជាតិ មកកម្សាន្តឱ្យបានច្រើនកុះករ៕
អត្ថបទទាក់ទង
© រក្សាសិទ្ធិដោយ thmeythmey.com
