ករណីកំហុសអក្ខរាវិរុទ្ធខ្មែរ និងកំហុសឆ្គងអត្ថន័យនៅលើស្លាក​យីហោ ឬផ្ទាំងពាណិជ្ជកម្ម​ហាងអាជីវកម្មរបស់ជនជាតិចិន នៅក្នុងប្រទេសកម្ពុជាកំពុងបន្តកើតមានជា​បន្តបន្ទាប់​។ ជុំវិញករណីនេះ ក្រសួងព័ត៌មាន នឹង​ពង្រឹងលើផ្ទាំងផ្សព្វផ្សាយពាណិជ្ជកម្ម ដែល​បកប្រែភាសាចិន មកភាសាខ្មែរដោយចម្លងពីកម្មវិធីបកប្រែរបស់​ Google។

បញ្ហាកំហុសខុស​អក្ខរាវិរុទ្ធ និង​ឆ្គង​អត្ថន័យនៅលើ​ស្លាក​​យីហោ និង​ផ្ទាំងពាណិជ្ជកម្មនៅតែកើតមាន ជាពិសេស​ហាង ឬអាជីវកម្មរបស់ជនជាតិចិន។ លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានប្រាប់​សារព័ត៌មាន​ឌីជីថល​ថ្មីៗ​ថា ករណីស្លាក​យីហោ និង​ផ្ទាំងពាណិជ្ជកម្ម​ខុស​អក្ខរាវិរុទ្ធនេះ ក្រសួង និងស្ថាប័នពាក់ព័ន្ធ រួម​ទាំង​អាជ្ញាធរថ្នាក់ក្រោមជាតិ រដ្ឋបាលរាជធានី ខេត្តនីមួយៗ ខិតខំការយកចិត្តទុកយ៉ាងខ្លាំង។

បើតាមអ្នកនាំពាក្យរូបនេះ កន្លងទៅក្រសួងព័ត៌មាន និងក្រសួងវប្បធម៌ និងវិចិត្រសិល្បៈ បានចុះណែនាំដល់ម្ចាស់ហាង ឱ្យកែតម្រូវឡើងវិញចំពោះកំហុសឆ្គងទៅលើអក្ខរាវិរុទ្ធ និងសរសេរខុសខ្លឹមសារជាតិ។ អ្នកនាំពាក្យក្រសួងព័ត៌មានបន្តថា ខាងមន្ទីរព័ត៌មាន មន្ទីរវប្បធម៌ ទាំង២៥រាជធានី-ខេត្ត ក៏បានសហការជាមួយអាជ្ញាធរស្រុក ឃុំ ស្នើឱ្យមានការកែតម្រូវឡើងវិញ និងអនុញ្ញាតឱ្យបន្តអាជីវកម្មជាធម្មតាឡើងវិញ។

លោក ទេព អស្នារិទ្ធ លើក​ឡើង​បែបនេះ​៖ «កំហុសអក្ខរាវិរុទ្ធខ្មែរ និងខុសឆ្គងអត្ថន័យនៅលើស្លាកយីហោនេះ ជាកិច្ចការងារសំខាន់។ ក្រសួងបានយកចិត្តទុកដាក់គ្រប់គ្រងលើការផ្សព្វផ្សាយ នឹងរៀបចំលិខិតបទដ្ឋាន ដើម្បីធ្វើយ៉ាងណាគ្រប់គ្រងសណ្ដាប់​ធ្នាប់​លើការផ្សព្វផ្សាយ ទាំងការសរសេរ ខ្លឹមសារ អត្ថន័យ និងប្រើប្រាស់រូបភាព ដើម្បីធានាបាននូវការមិនរំលោភបំពានសិទ្ធិឯកជន និងសណ្ដាប់​ធ្នាប់សាធារណៈ»។

លើសពីនេះ ការលើកស្លាកយីហោ ឬប៉ាណូហាងអាជីវកម្ម លោក ទេព អស្នារិទ្ធ បានសង្កត់ធ្ងន់ៗថា ត្រូវ​ធ្វើយ៉ាងណាកុំឱ្យប៉ះពាល់ដល់សុខុមាលភាពសាធារណៈ។ លោក ទេព អស្នារិទ្ធ ស្នើ​ឱ្យ​មានការចូលរួមទាំងគ្នា ដើម្បីធានាឱ្យបាននូវ​ការផ្សព្វផ្សាយប្រកបដោយក្រមសីលធម៌ និងអនុវត្តនិយាម៕