.png)
.jpg)
.jpg)
ក្រុមហ៊ុនជប៉ុន ចុះកិច្ចសន្យាទិញគ្រាប់ស្វាយចន្ទី៤០០តោន ពីសហគមន៍កសិកម្មទំនើបខេត្តកំពង់ធំ
- ថ្ងៃពុធ ទី២៦ ខែមីនា ឆ្នាំ២០២៥ ម៉ោង ៧:៥៩ នាទី ល្ងាច
ភ្នំពេញ៖ ក្រុមហ៊ុនជប៉ុន MIRARTH Agri Tech Co.,Ltd បានចុះកិច្ចសន្យាប្រមូលទិញគ្រាប់ស្វាយចន្ទី៤០០តោន ពីសហគមន៍កសិកម្មទំនើបប្រាសាទសំបូររុងរឿង, សហគមន៍កសិកម្មទំនើបសាលាវិស័យកំពង់ធំ និងសហគមន៍កសិកម្មទំនើបទំរីង ស្ថិតនៅខេត្តកំពង់ធំ។
កិច្ចសន្យានេះ មានទំហំគិតជាទឹកប្រាក់ប្រមាណ ៦៥ម៉ឺនដុល្លារ។ នេះគឺជាលើកទីមួយហើយ ដែលសហគមន៍កសិកម្មទំនើប សម្រាប់ដំណាំស្វាយចន្ទីទាំង៣ បានសហការគ្នាលក់គ្រាប់ស្វាយចន្ទី តាមរយៈការចុះកិច្ចសន្យាទុកជាមុន ក្នុងតម្លៃថេរមួយសម្រាប់រដូវកាលប្រមូលផលដំបូងរបស់ពួកគេ។ បរិមាណគ្រាប់ស្វាយចន្ទីដែលបានចុះកិច្ចសន្យានេះ មានចំនួនប្រហាក់ប្រហែលនឹង២០ភាគរយ នៃបរិមាណផលសរុបរបស់សហគមន៍ ទាំង៣គ្រោងនឹងផលិតបានក្នុងឆ្នាំ២០២៥នេះ។
ក្នុងពិធីចុះហត្ថលេខា នៅថ្ងៃទី២៦ ខែមីនា លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ការធ្វើផលិតកម្មកសិកម្មតាមកិច្ចសន្យាសម្រាប់សហគមន៍កសិកម្មទំនើប គឺដើម្បីការពារសមាជិកទាំងអស់ពីហានិភ័យទីផ្សារនៃការប្រែប្រួលថ្លៃលើសពីការរំពឹងទុក។
ជាមួយគ្នានេះ លោកបានណែនាំឱ្យនាយកដ្ឋានកសិឧស្សាហកម្ម និងសហគមន៍ផ្ទាល់ បន្តចុះកិច្ចសន្យាលក់គ្រាប់ស្វាយចន្ទីបន្ថែមទៀត រហូតដល់ចប់រដូវប្រមូលផល ព្រមទាំងពិចារណាស្តុកទុកក្នុងកម្រិតណាមួយ សម្រាប់ការលក់ជាគ្រាប់ស្ងួតផងដែរ។ សម្រាប់ រដូវកាលបន្ទាប់ សហគមន៍គួរត្រៀមធ្វើកិច្ចសន្យាជាមួយក្រុមហ៊ុនទទួលទិញពីដើមរដូវទុកឱ្យហើយ។
នៅឆ្នាំ២០២៤ កម្ពុជាបាននាំចេញគ្រាប់ស្វាយចន្ទីឆៅទៅកាន់ប្រទេសវៀតណាមចំនួន ៧៩៣ ៤៥៣តោន ដែលគិតជាទឹកប្រាក់ ១១ ៥០លានដុល្លារ។ នេះបើតាមសមាគមស្វាយចន្ទីកម្ពុជា៕
© រក្សាសិទ្ធិដោយ thmeythmey.com
Tag:
