.png)
.png)
.jpg)
.jpg)
រដ្ឋមន្រ្តីបរិស្ថាន៖ ក្រសួងមិនបានបិទបាំងព័ត៌មានគុណភាពខ្យល់ទេ
- ថ្ងៃសុក្រ ទី២៨ ខែមីនា ឆ្នាំ២០២៥ ម៉ោង ១០:២៩ នាទី ព្រឹក
លោក អ៊ាង សុផល្លែត រដ្ឋមន្រ្តីក្រសួងបរិស្ថាន ថ្លែងក្នុងពិធីផ្សព្វផ្សាយផែនការសកម្មភាពនៃយុទ្ធនាការសម្អាតផ្លូវជាតិ «ផ្លូវជាតិគ្មានសំរាម សំណល់ប្លាស្ទិក» នៅថ្ងៃទី២៧ ខែមីនា។ រូបភាព៖ ក្រសួងបរិស្ថាន
ភ្នំពេញ៖ «ក្រសួងមិនបានបិទបាំងព័ត៌មានស្ដីពីគុណភាពខ្យល់នៅកម្ពុជាទេ ហើយក៏មិនអនុញ្ញាតឱ្យពលរដ្ឋណាម្នាក់គ្រោះថ្នាក់ដោយសារខ្យល់ពុលដែរ។»។ នេះជាការអះអាងរបស់ លោក អ៊ាង សុផល្លែត រដ្ឋមន្រ្តីក្រសួងបរិស្ថាន ដោយស្នើឱ្យពលរដ្ឋជឿជាក់លើព័ត៌មាន ដែលចេញពីក្រសួងបរិស្ថាន។
ក្នុងពិធីផ្សព្វផ្សាយផែនការសកម្មភាពនៃយុទ្ធនាការសម្អាតផ្លូវជាតិ «ផ្លូវជាតិគ្មានសំរាម សំណល់ប្លាស្ទិក» នៅថ្ងៃទី២៧ ខែមីនា លោក អ៊ាង សុផល្លែត បានផ្ដល់បទសម្ភាសជាមួយអ្នកសារព័ត៌មានថា បច្ចុប្បន្ន ការផ្សព្វផ្សាយព័ត៌មានអំពី «គុណភាពខ្យល់នៅកម្ពុជា» មានច្រើនប្រភព ហើយខ្លះទុកចិត្តបាន និងខ្លះមិនច្បាស់លាស់។
ដោយឡែក វេបសាយ IQAir ដែលផ្សព្វផ្សាយថា កម្ពុជាមានខ្យល់ពុល, ត្រូវបាន លោក អ៊ាង សុផល្លែត ចោទជាសំណួរថា តើ វេបសាយមួយនេះ មានឧបករណ៍តាមដានគុណភាពខ្យល់នៅកម្ពុជាប៉ុន្មានកន្លែង? បើគ្មានទេ លោកសូមឱ្យពលរដ្ឋជឿជាក់ព័ត៌មានចេញក្រសួងបរិស្ថានវិញ ដែលមានឧបករណ៍តាមដានគុណភាពខ្យល់គ្រប់ខេត្ត-ក្រុង ថែមទាំងបានចាក់ផ្សាយបន្តផ្ទាល់ ដោយគ្មានការលាក់បាំងអ្វីទាំងអស់។
រដ្ឋមន្រ្តី ថ្លែងយ៉ាងដូច្នេះថា៖«ព័ត៌មានទាក់ទងខ្យល់ពុល មានប្រភពច្រើន ហើយប្រភពខ្លះច្បាស់លាស់ និងខ្លះមិនច្បាស់។ ប្រភពចេញពី IQAir ដែលបានផ្សព្វផ្សាយថា នៅកម្ពុជាមានខ្យល់ពុល, ខ្ញុំសួរថា គាត់ (IQAir) មានឧបករណ៍តាមដានគុណភាពខ្យល់នៅកម្ពុជាប៉ុន្មានកន្លែង? បើគាត់មានគ្រប់ខេត្តទទួលស្គាល់ព័ត៌មានពីគាត់ចុះ ប៉ុន្តែបើគាត់មិនមានទេ សូមទទួលយកប្រភពពីក្រសួងបរិស្ថានវិញ ព្រោះយើងមានឧបករណ៍តាមដានគ្រប់ខេត្តក្រុង ហើយបានដាក់ផ្សាយបន្តផ្ទាល់ អត់មានលាក់បាំងទេ។»។
លោក អ៊ាង សុផល្លែត បានប្ដេជ្ញាមិនឱ្យពលរដ្ឋណាម្នាក់គ្រោះថ្នាក់ដោយសារខ្យល់ពុលនោះទេ។ ទន្ទឹមនេះ លោក ក៏មិនអនុញ្ញាតឱ្យព័ត៌មានណាមួយយករឿងនេះ ដើម្បីទាញផលចំណេញនោះដែរ។
លោក ថ្លែងដូច្នេះថា៖« មិនអនុញ្ញាតឱ្យពលរដ្ឋយើងគ្រោះថ្នាក់ដោយសារខ្យល់ពុលទេ។ ទន្ទឹមនឹង យើងក៏មិនអនុញ្ញាតឱ្យគេបំពុលបរិស្ថាននៃខ្យល់កម្ពុជា ដើម្បីទាញយកផលចំណេញដែរ។ យ៉ាងណា សុំតែផ្ដល់ព័ត៌មានពិតមក ព្រោះប្រជាជនត្រូវការព័ត៌មានពិត ដើម្បីទប់ស្កាត់កុំឱ្យប៉ះពាល់សុខភាពពួកគាត់។ ទាំងនេះហើយដែលក្រសួងបរិស្ថាន កំពុងតែផ្ដល់ជូនពលរដ្ឋ។»។
ក្រសួងបរិស្ថាន បានលើកទឹកចិត្តពលរដ្ឋទាំងអស់ តាមដានគុណភាពខ្យល់ប្រចាំថ្ងៃ តាមរយៈវេបសាយរបស់ក្រសួងបរិស្ថានគឺ www.airquality.moe.gov.kh និងប្រព័ន្ធ APPឈ្មោះ CGS SPA ដែលធ្វើបច្ចុប្បន្នភាពរៀងរាល់ ១ម៉ោងម្តង៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
.gif)