.png)
.png)
.jpg)
.jpg)
ក្រសួងអប់រំ នឹងផ្ដល់ប្រាក់ឧបត្ថម្ភសម្រាប់គាំទ្រការស្រាវជ្រាវប្រតិបត្តិខ្នាតតូច ដល់គ្រូបង្រៀន និងគ្រូឧទ្ទេស
- ថ្ងៃសៅរ៍ ទី២៩ ខែមីនា ឆ្នាំ២០២៥ ម៉ោង ៨:០០ នាទី ព្រឹក
លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។ រូបភាពពី MOEYS
ភ្នំពេញ៖ ក្រសួងអប់រំ យុវជន និងកីឡា នឹងផ្ដល់ប្រាក់ឧបត្ថម្ភចំនួន ៩០០ដុល្លារ សម្រាប់គាំទ្រការស្រាវជ្រាវប្រតិបត្តិខ្នាតតូច ដល់បុគ្គលិកអប់រំ គ្រូបង្រៀន និងគ្រូឧទ្ទេស។ បើតាមក្រសួងអប់រំ បុគ្គលិកអប់រំ គ្រូបង្រៀន និងគ្រូឧទ្ទេស អាចស្រាវជ្រាវជាបុគ្គល ឬជាក្រុម ដែលមានសមាជិក៤នាក់ ក្នុងមួយក្រុម។
ការផ្ដល់ប្រាក់ឧបត្ថម្ភសម្រាប់គាំទ្រការស្រាវជ្រាវប្រតិបត្តិខ្នាតតូច ធ្វើឡើងក្នុងគោលបំណងចូលរួមលើកស្ទួយវប្បធម៌ស្រាវជ្រាវ និងលើកកម្ពស់សមត្ថភាពរៀបចំ និងអនុវត្តការស្រាវជ្រាវប្រតិបត្តិ (Action Research) របស់គ្រូឧទ្ទេស និងបុគ្គលិកអប់រំ។ ក្រសួងអប់រំ យុវជន និងកីឡា បញ្ជាក់ថា ការផ្ដល់ប្រាក់ឧបត្ថម្ភសម្រាប់គាំទ្រការស្រាវជ្រាវប្រតិបត្តិខ្នាតតូចនេះ ជាគម្រោងរបស់កម្មវិធីពង្រឹងការអប់រំគ្រូបង្រៀននៅកម្ពុជា ដំណាក់កាលទី២ (STEPCam II)។
ក្រសួងអប់រំ នឹងផ្តល់ការឧបត្ថម្ភថវិកាសម្រាប់គាំទ្រការស្រាវជ្រាវប្រតិបត្តិខ្នាតតូច មានរយៈពេល ៣-៤ ខែ និងមានថវិកា ៩០០ ដុល្លារ។ បុគ្គលិកអប់រំ គ្រូបង្រៀន និងគ្រូឧទ្ទេស អាចដាក់ស្នើសុំថវិកាជាលក្ខណៈបុគ្គល ឬជាក្រុម ដែលមានសមាជិក ៤នាក់ ក្នុងមួយក្រុម។
ដោយឡែកប្រធានបទសម្រាប់ការស្រាវជ្រាវរួមមាន ភាពជាអ្នកដឹកនាំប្រកបដោយប្រសិទ្ធភាពនៅកម្រិតសាលារៀន, វិធីសាស្ត្របង្រៀនជួយលើកកម្ពស់ការសិក្សាសិស្ស, ការអប់រំឌីជីថល, ការអប់រំបរិយាបន្ន (សមធម៌ យេនឌ័រ ពិការភាព), ការអប់រំឬការបណ្តុះបណ្តាលគ្រូបង្រៀន និងការវាយតម្លៃការសិក្សារបស់សិស្សប្រកបដោយនវានុវត្តន៍។
សម្រាប់បុគ្គលិកអប់រំ គ្រូបង្រៀន និងគ្រូឧទ្ទេស ដាក់ស្នើមកនាយកដ្ឋានគោលនយោបាយនៃក្រសួងអប់រំ យុវជន និងកីឡា រហូតដល់ថ្ងៃទី១១ ខែមេសា ឆ្នាំ២០២៥ ឬអាចដាក់ផ្ញើសំណើ ស្រាវជ្រាវជាទម្រង់Soft copyតាមរយៈអ៊ីម៉ែល៖ [email protected] ឬលេខទូរស័ព្ទ ០១២ ៧២១ ០៩៣៕
© រក្សាសិទ្ធិដោយ thmeythmey.com
Tag:
