.jpg)
.jpg)
គណបក្សភ្លើងទៀន និងបក្សឆន្ទៈខ្មែរ ចូលរួមពិធីបុណ្យសពបងប្រុស សម្ដេច ហ៊ុន សែន
- ថ្ងៃអាទិត្យ ទី៣០ ខែមីនា ឆ្នាំ២០២៥ ម៉ោង ៣:១០ នាទី រសៀល
ភ្នំពេញ៖ មន្រ្តីនៃគណបក្សភ្លើងទៀន និងគណបក្សឆន្ទៈខ្មែរ បានចូលរួមពិធីបុណ្យសពលោក ហ៊ុន សាន ដែលត្រូវជាបងប្រុសរបស់សម្ដេច ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា នៅថ្ងៃទី៣០ ខែមីនានេះ ។
លោក គង់ មុនីកា សមាជិកព្រឹទ្ធសភា មកពីគណបក្សឆន្ទៈខ្មែរ បានលើកឡើងថា ការចូលរួមគោរពវិញ្ញាណក្ខន្ធ បងប្រុសរបស់សម្ដេច ហ៊ុន សែន របស់គណបក្សប្រឆាំង គឺជាកាយវិការគោរព និងការលើកទឹកចិត្តគ្នាក្នុងគ្រាលំបាកក្នុងនាមជាពលរដ្ឋដោយមិនប្រកាន់ទិន្នាការនយោបាយ។
លោក គង់ មុនីកា បញ្ជាក់ដូច្នេះ៖ «ក្នុងនាមជាអ្នកនយោបាយទោះបីជាយើងមានទិន្នាការផ្សេងគ្នាក៏ដោយ គណបក្សភ្លើងទៀន និងគណបក្សឆន្ទៈខ្មែរ មិនបានយកខ្មែរណាជាសត្រូវទេ។ យើងប្រកួតប្រជែងគ្នាតាមបែបប្រជាធិបតេយ្យសេរីពិតប្រាកដ ដូច្នេះហើយការជួបទុក្ខលំបាក របស់អ្នកនយោបាយបើទោះបីជាដៃគូប្រជែងយ៉ាងណាក៏ដោយ ក៏យើងតែងតែបង្ហាញនូវសមាចិត្ត ក្នុងការគោរព និងផ្ដល់តម្លៃឱ្យគ្នាទៅវិញទៅមក»។
សូមជម្រាបថា លោក ហ៊ុន សាន ដែលជាបងប្រុសច្បងរបស់សម្តេច ហ៊ុន សែន ប្រធានព្រឹទ្ធសភា បានទទួលមរណភាព ក្នុងអាយុ៧៨ឆ្នាំ ដោយរោគាពាធ នាវេលាម៉ោង២ និង២៧នាទី ព្រឹកឈានចូលថ្ងៃទី២៨ ខែមីនា ឆ្នាំ២០២៥៕
អត្ថបទទាក់ទង
© រក្សាសិទ្ធិដោយ thmeythmey.com
