.jpg)
.jpg)
សត្វរនាលពណ៌ និងក្រសារប្រផេះប្រមាណ២៨០ក្បាល ក្នុងតំបន់ការពារទេសភាពបឹងព្រែកល្ពៅ បានញាស់ចេញពីសំបុក
- ថ្ងៃអាទិត្យ ទី៣០ ខែមីនា ឆ្នាំ២០២៥ ម៉ោង ៤:១០ នាទី រសៀល
ភ្នំពេញ៖ តំបន់ការពារទេសភាពបឹងព្រែកល្ពៅ ជាជម្រកសត្វស្លាប់រាប់ម៉ឺនក្បាលគួរជាទីគយគន់បំផុតនាខេត្តតាកែវ។ ចាប់តាំងពីឆ្នាំ២០០១ រហូតទល់ឆ្នាំ២០២៥នេះ ក្នុងតំបន់ការពារដីសើមនេះមានវត្តមានសត្វស្លាបជាច្រើនប្រភេទកំពុងរស់នៅ រួមមាន សត្វចង្កៀលខ្យង សត្វរនាលពណ៌ សត្វក្រសារប្រផេះ សត្វក្រសារធ្នង់ សត្វខ្វែក និងសត្វកុក។
តំបន់ការពារទេសភាព ត្រូវបានកត់សម្គាល់ថា ជាតំបន់ដែលសមស្រប និងអំណាយផលសម្រាប់ការរស់នៅ និងបន្តពូជរបស់សត្វស្លាប។ ជាមួយគ្នានេះ កូនសត្វរនាលពណ៌ប្រមាណ ១៥០ក្បាល និងសត្វក្រសារប្រផេះប្រមាណ១៣០សប្បុក បានញាស់ចេញពីសំបុក តែពុំទាន់អាចហើរបានឡើយ។
ទន្ទឹមនឹងនោះ សត្វក្រសារធ្នង់ សត្វខ្វែក សត្វកុក ក៏កំពុងក្រាបពង និងកាច់សប្បុកផងដែរ។ បន្ថែមពីនេះ តំបន់ការពារទេសភាពបឹងព្រែកល្ពៅ មានទីតាំងស្ថិតក្នុងភូមិសាស្ត្រស្រុកកោះអណ្ដែត និងស្រុកបូរីជលសារ ខេត្តតាកែវ តំបន់ការពារទេសភាពព្រែកល្ពៅ ជាតំបន់ដែលមានសត្វស្លាបជាច្រើនប្រភេទ កំពុងរស់នៅ។ ទីតាំងបឹងព្រែកល្ពៅ ជាតំបន់ដីសើម ដែលសម្បូរដោយប្រភពចំណី ជម្រកដ៏មានសុវត្ថិភាព សម្រាប់សត្វស្លាបទឹកពងកូន និងបន្តពូជនៅក្នុងប្រទេសកម្ពុជា។
សូមជម្រាបថា បច្ចុប្បន្នកម្ពុជា មានតំបន់ចំនួន៣ដែលត្រូវបានកត់សម្គាល់ថា ជាតំបន់ដែលសមស្រប និងអំណាយផលសម្រាប់ការរស់នៅ និងបន្តពូជរបស់សត្វស្លាប។ តំបន់ការពារធម្មជាតិ និងអភិរក្សដែលគេសង្កេតឃើញថា សម្បូរទៅដោយសត្វស្លាបរស់នៅច្រើននោះ មានដូចជាតំបន់ព្រែកទាល់ ស្ថិតក្នុងខេត្តបាត់ដំបង, តំបន់អភិរក្សសត្វស្លាបទួលព័ន្ធតាឡីបឹងស្នេហ៍ក្នុងខេត្តព្រៃវែង និងតំបន់ការពារទេសភាពបឹងព្រែកល្ពៅ ក្នុងខេត្តតាកែវ៕
© រក្សាសិទ្ធិដោយ thmeythmey.com
Tag:
.gif)