.jpg)
.jpg)
លោក ថោ ជេដ្ឋា បញ្ជាឱ្យមន្ទីរធនធានទឹក ពិនិត្យមើលសំណង់អាងទឹក និងធារាសាស្ត្រក្រោយរញ្ជួយដីប្រទេសជិតខាង
- ថ្ងៃអាទិត្យ ទី៣០ ខែមីនា ឆ្នាំ២០២៥ ម៉ោង ៦:១០ នាទី ព្រឹក
រូបភាពពី៖ ក្រសួងធនធានទឹក និងឧតុនិយម
ភ្នំពេញ៖ រដ្ឋមន្ត្រីក្រសួងធនធានទឹក លោក ថោ ជេដ្ឋា បញ្ជាឱ្យមន្ទីរធនធានទឹករាជធានី-ខេត្ត ត្រួតពិនិត្យមើលផលប៉ះពាល់សំណង់អាងទឹក និងសំណង់ធារាសាស្ត្រធំៗទាំងអស់ រួចធ្វើរបាយការណ៍មកក្រសួង ក្រោយមានបាតុភូតរញ្ជួយដីនៅប្រទេសមីយ៉ាន់ម៉ា និងថៃ ។
នៅថ្ងៃ៣០ ខែមីនានេះ លោក ថោ ជេដ្ឋា រដ្ឋមន្ត្រីក្រសួងធនធានទឹក បានចុះពិនិត្យស្ថានភាពសំណង់អាងទឹកតាសាល ស្ថិតក្នុងឃុំតាសាល ស្រុកឱរាល់ ខេត្តកំពង់ស្ពឺ ក្រោយមានបាតុភូតរញ្ជួយដី នៅប្រទេសថៃ និងមីយ៉ាន់ម៉ា។ ក្នុងពេលនោះ លោកក៏បានណែនាំឱ្យមន្ទីររាជធានី-ខេត្ត ពិនិត្យមើលសំណង់អាងទឹក និងសំណង់ធារាសាស្ត្រធំៗ ដោយចាត់ក្រុមការងារបច្ចេកទេស ដើម្បីចុះត្រួតពិនិត្យផលប៉ះពាល់លើសំណង់ទាំងអស់ ហើយរបាយការណ៍មកក្រសួង។
គួរជម្រាបថា មីយ៉ាន់ម៉ា បានជួបគ្រោះរញ្ជួយដីកម្រិត ៧,៧រិចទ័រ ដោយមានជម្រៅ១០គីឡូម៉ែត្រ នៅក្នុងក្រុង Sagaing ដោយមានមនុស្សយ៉ាងហោចណាស់ ៦៩៤នាក់ បានបាត់បង់ជីវិត របួសជាច្រើននាក់ និងអ្នកស្លាប់អាចបន្តកើនឡើង។ រីឯប្រទេសថៃ បានរង រំញ័រកើតចេញពីគ្រោះរញ្ជួយដីនៅមីយ៉ាន់ម៉ាកម្រិត ៧,៧រិចទ័រ បានធ្វើឱ្យបាក់រលំអគារ៣០ជាន់ ដែលមានមនុស្សចំនួន ៨១នាក់ជាប់ក្នុងអគារ និងមកទល់ពេលនេះ មនុស្ស ១៧នាក់ បានបាត់បង់ជីវិត៕
© រក្សាសិទ្ធិដោយ thmeythmey.com
Tag:
.gif)