សម្តេចនាយករដ្ឋមន្ត្រី ហ៊ុន​ ម៉ាណែត បានចុះហត្ថលេខា​លើ​អនុក្រឹត្យ​ស្តីពី​ការកែប្រែ និងដំឡើង​បៀវត្សប្រចាំខែ និងការឧបត្ថម្ភ​ផ្សេងៗ​សម្រាប់មន្ត្រីរាជការ និងបុគ្គលិក​បំពេញភារកិច្ច​តាម​ស្ថាន​តំណាងកម្ពុជា​នៅ​បរទេស។ ប្រភេទ​ចំណាត់ថ្នាក់​ប្រទេសដែលមាន​ស្ថាន​តំណាង​កម្ពុជា ក៏ត្រូវបាន​កែប្រែផងដែរ ដោយមាន​ត្រឹម​ប្រភេទប្រទេស «ក» និង «ខ» ប៉ុណ្ណោះ ខណៈអនុក្រឹត្យ​កាលពីឆ្នាំ២០១៧ និងអនុក្រឹត្យ​ឆ្នាំ២០២០ មាន​ដល់​ប្រទេសប្រភេទ «គ»។

ឧបនាយករដ្ឋមន្ត្រី៣រូប និងជា​រដ្ឋមន្ត្រី​នៃក្រសួងពាក់ព័ន្ធ រួមមាន លោក អូន ព័ន្ធមុនីរ័ត្ន នៃក្រសួងសេដ្ឋកិច្ច និងហិរញ្ញវត្ថុ, លោក ប្រាក់ សុខុន នៃក្រសួងការបរទេស និង​សហប្រតិបត្តិការអន្តរជាតិ និង​លោក ហ៊ុន ម៉ានី នៃក្រសួងមុខ​ងារសាធារណៈ បាន​ដាក់សំណើ​ទៅប្រមុខ​រដ្ឋាភិបាល ដើម្បីចុះហត្ថលេខា​លើអនុក្រឹត្យសំដៅ​ដល់ការកែប្រែ និងដំឡើងបៀវត្សប្រចាំខែ និងការឧបត្ថម្ភផ្សេងៗសម្រាប់មន្ត្រីរាជការ និងបុគ្គលិកបំពេញភារកិច្ចតាមស្ថានតំណាងកម្ពុជានៅបរទេស។

អនុក្រឹត្យ​ដែលចុះហត្ថលេខាកាលពីថ្ងៃទី​១ ខែមេសា បង្ហាញ​ថា ប្រភេទ​ចំណាត់ថ្នាក់​ប្រទេស «ក» ដែលមាន​ស្ថាន​តំណាងកម្ពុជា រួមមាន អូស្ត្រាលី និងនូវែលសេឡង់ (ក្រុងកង់បេរ៉ា), បែលហ្ស៊ិក (ក្រុងព្រុចសែល រួមទាំងបេសកកម្មអចិន្ត្រៃយ៍អមសហគមន៍អឺរ៉ុប), ប្រេស៊ីល (ក្រុងប្រាស៊ីលីយ៉ា), កាណាដា (ក្រុងអូតាវ៉ា), ចិន (នៅប៉េកាំង, អគ្គកុងស៊ុលនៅ​ហុងកុង និងម៉ាកាវ, សៀងហៃ), បារាំង (ក្រុងប៉ារីស រួមទាំង​ស្ថានគណៈប្រតិភូអចិន្ត្រៃយ៍ប្រចាំអង្គការយូណេស្កូ), អាល្លឺម៉ង់ (ប៊ែរឡាំង), ជប៉ុន (តូក្យូ), កូរ៉េខាងត្បូង (សេអ៊ូល), រុស្ស៊ី (ក្រុងមូស្គូ), ស្វីស (ស្ថានបេសកកម្ម​អចិន្ត្រៃយ៍​ប្រចាំអង្គការសហប្រជាជាតិ, អង្គការពាណិជ្ជកម្ម​ពិភពលោក និងអង្គការអន្តរជាតិនានានៅ​ហ្សឺណែវ), ចក្រភពអង់គ្លេស (ក្រុងឡុងដ៍), សហរដ្ឋអាម៉េរិក (ក្រុងវ៉ាស៊ីនតោន និង​ស្ថានបេសកកម្ម​អចិន្ត្រៃយ៍ប្រចាំ​អង្គការ​សហប្រជាជាតិ​នៅញូវយ៉ក), អេហ្ស៊ីប (ក្រុងគែរ), កូវ៉ែត, សិង្ហបុរី, ប៊ុលហ្គារី (ក្រុងសូហ្វីយ៉ា), ស៊ែប៊ី (ក្រុង​ប៊ែលក្រាត), តួកគី (ក្រុងអង់ការ៉ា), ឆែក (ក្រុង​ប្រាក), ហុងគ្រី (ក្រុងប៊ុយដាប៉ែស)។

រីឯ​ប្រភេទប្រទេស «ខ» មាន ឥណ្ឌា (ក្រុងញូវដែលី), ព្រុយណេ (ក្រុងបានដាស៊េរីបេហ្គាវ៉ាន់), គុយបា (ក្រុងឡាហាវ៉ាន), ឥណ្ឌូណេស៊ី (​ក្រុងហ្សាការតា រួមទាំង​ស្ថាន​តំណាងអចិន្ត្រៃយ៍អម​លេខាធិការដ្ឋាន​អាស៊ាន), ចិន (អគ្គ​កុងស៊ុល​ប្រចាំក្រុងឆុងឈីង, គុនមិញ, ណាននីង, ស៊ីអាន, ហៃគូ, ជីណាន, ក្វាងចូវ), កូរ៉េខាងជើង (ព្យុងយ៉ាង), ឡាវ (ក្រុងវៀងចន្ទន៍ និងស្ថានអគ្គ​កុងស៊ុល​ប្រចាំ​ក្រុងប៉ាក់សេ), ម៉ាឡេស៊ី (គូឡាឡាំពួ), មីយ៉ាន់ម៉ា (យ៉ាងហ្គូន), ទីម័រឡេស្តេ (ក្រុងឌីលី), ថៃ (ក្រុងបាងកក, ស្ថានអគ្គកុងស៊ុល​ប្រចាំខេត្ត​ស្រះកែវ និង​ក្រុងសុងក្លា), សេណេហ្គាល់ (​ក្រុងដាកា), វៀតណាម (ក្រុងហាណូយ និងស្ថានអគ្គ​កុងស៊ុល​ប្រចាំក្រុងហូជីមិញ), ហ្វីលីពីន (ម៉ានីល)។

ប្រៀបធៀបទៅនឹងអនុក្រឹត្យ​ចុះ​កាលពីថ្ងៃទី​៤ ខែមិនា ឆ្នាំ២០២០ ​មន្ត្រីរាជការ និងបុគ្គលិកបំពេញភារកិច្ចតាម​ស្ថាន​តំណាងកម្ពុជា​នៅ​ប្រទេស ទាំងអស់​សុទ្ធតែទទួលបាននូវការ​ដំឡើងបន្ថែមទៀតនៅ​ឆ្នាំ២០២៥នេះ។ មុខតំណែងជាឯកអគ្គ​រាជទូតវិសាមញ្ញ និងពេញសមត្ថភាពនៅ​ប្រទេស​ប្រភេទ «ក» ទទួលបាន ៣៨០០ដុល្លារក្នុង១ខែ រីឯប្រទេស​ប្រភេទ «ខ» បាន​៣២០០ដុល្លារ។

តំណាងអចិន្ត្រៃយ៍​រង (ឋានៈជាឯកអគ្គរាជ​ទូត) បាន​បៀវត្ស ៣៦០០ដុល្លារ (ប្រទេសប្រភទ «ក») និង​៣២០០ដុល្លារ (ប្រទេស​ប្រភេទ «ខ»)។ មុខ​តំណែងផ្សេងទៀតរួមមាន អគ្គរាជទូត («ក» ៣៣០០ដុល្លារ, «ខ» ២៨០០ដុល្លារ), អគ្គទីប្រឹក្សា  («ក» ៣៣០០ដុល្លារ, «ខ» ២៦០០ដុល្លារ), ទីប្រឹក្សា, អគ្គកុងស៊ុល («ក» ២៨០០ដុល្លារ, «ខ» ២៤០០ដុល្លារ)។

លេខាធិការទី១ និងអនុព័ន្ធជំនាញ («ក» ២៧០០ដុល្លារ, «ខ» ២២០០ដុល្លារ), លេខាធិការទី២, កុងស៊ុល, អនុព័ន្ធ​ជំនាញរង («ក» ២៥០០ដុល្លារ, «ខ» ២០០០ដុល្លារ), លេខាធិការទី៣, អនុព័ន្ធ, អនុកុងស៊ុល/ភ្នាក់ងារកុងស៊ុល («ក» ២៤០០ដុល្លារ, «ខ» ១៩០០ដុល្លារ)។

គណនេយ្យករ​, បុគ្គលិក​រដ្ឋបាល និងបច្ចេកទេស («ក» ១៨០០ដុល្លារ, «ខ» ១៥០០ដុល្លារ)។ ជាមួយគ្នានេះ បុគ្គលិក​សេវា ដែលរួមមាន អ្នក​បើកបរ និងអ្នក​ដាំស្ល ក៏បានឡើង​បៀវត្សដល់​១៦០០ដុល្លារសម្រាប់ប្រទេសប្រភេទ «ក» និង​ ១៣០០ដុល្លារ សម្រាប់ប្រទេសប្រភេទ «ខ» ផងដែរ។

ចំពោះប្រាក់ឈ្នួលផ្ទះ មន្ត្រី​មុខតំណែង​ចាប់ពីថ្នាក់​តំណាងអចិន្ត្រៃយ៍​រងដល់ថ្នាក់​លេខាធិការទី១ និងថ្នាក់​ប្រហាក់ប្រហែល ទទួល ១៩០០ដុល្លារ សម្រាប់ប្រទេសប្រភេទ «ក» និង​១៤០០ដុល្លារ សម្រាប់​ប្រទេស​ប្រភេទ «ខ»។ ចាប់ពីថ្នាក់​លេខាធិការ​ទី២ ដល់ថ្នាក់អនុព័ន្ធ និង​ថ្នាក់ប្រហាក់ប្រហែល «ក» បាន​១៦០០ដុល្លារ និង «ខ» បាន​១៣០០ដុល្លារ រីឯបុគ្គ​លិក​រដ្ឋបាល និង​បច្ចេកទេស និង​ថ្នាក់ប្រហាក់ប្រហែល បាន១៥០០ដុល្លារសម្រាប់ប្រភេទ «ក» និង​១២០០ដុល្លារសម្រាប់ «ខ»។ 

តាមអនុក្រឹត្យ ប្រាក់ឧបត្ថម្ភឈ្នួលផ្ទះ ត្រូវបាន​ផ្តល់ជូនចំពោះមន្ត្រី បុគ្គលិករដ្ឋបាល និងបច្ចេកទេស ដែលមិនមានអគារស្នាក់នៅ តែមិនអនុវត្ត​ចំពោះបុគ្គលិក​សេវាឡើយ។

អនុក្រឹត្យ​ដែលត្រូវអនុវត្តចាប់ពីថ្ងៃទី១ ខែមេសា តទៅនេះ ក៏មាន​ការ​ដំឡើងប្រាក់ឧបត្ថម្ភប្រចាំខែជូនសហព័ទ្ធ និងកូនក្នុងបន្ទុករបស់មន្ត្រី និងបុគ្គលិក ដែលបំពេញភារកិច្ច ផងដែរដោយលើកលែងបុគ្គលិកសេវា។ សហព័ទ្ធ ទទួលបាន​ប្រាក់ឧបត្ថម្ភ​៤០០ដុល្លារក្នុង១ខែ រីឯកូន​ក្នុងបន្ទុកអាយុក្រោម​១៨ឆ្នាំ ទទួលបាន​៣០០ដុល្លារក្នុង១ខែ។

ចំពោះ​សោហ៊ុយធ្វើដំណើរទៅកាន់តំណែងដំបូងនៅបរទេស និងត្រលប់ចូលប្រទេសពេលចប់អាណត្តិ សំបុត្រយន្តហោះថ្នាក់ជំនួញ (Business Class) នឹង​ត្រូវ​ជូនឯកអគ្គរាជទូត និងសហព័ទ្ធ ព្រមទាំងកូន ក្នុងបន្ទុកដែលមានអាយុក្រោម១៨ឆ្នាំ ខណៈ​មន្ត្រី និងបុគ្គលិក​ផ្សេងទៀត ទទួលបាន​សំបុត្រយន្តហោះថ្នាក់ធម្មតា (Economy Class)។

មន្ត្រីរាជការ និងបុគ្គលិករដ្ឋបាលនិងបច្ចេកទេស ដែលបំពេញការងារនៅតាមស្ថានតំណាងនៅបរទេស ត្រូវចាត់ចែងទិញសេវាធានារ៉ាប់រងថែទាំសុខភាព ដោយត្រូវជ្រើសរើសយកក្រុមហ៊ុនធានារ៉ាប់រងក្នុងប្រទេស ដែលខ្លួនតាំងនៅក្នុងរង្វង់ខែមករា រៀងរាល់ឆ្នាំ។ ប្រាក់ធានារ៉ាប់រងសុខភាពជូនមន្ត្រីរាជការ និងបុគ្គលិករដ្ឋបាលនិងបច្ចេកទេសត្រូវបានកំណត់ ដោយ​ប្រទេសប្រភេទ «ក» ទទួលបាន​៨០០ដុល្លារ និង «ខ» បាន​៧០០ដុល្លារ ក្នុង១នាក់ ក្នុង១ឆ្នាំ៕