.jpg)
.jpg)
មានគម្រោងមកលេងសៀមរាប? ជិះឡានក្រុងដោយឥតគិតថ្លៃ នៅថ្ងៃទី១២ ដល់១៧មេសា
- ថ្ងៃព្រហស្បតិ៍ ទី៣ ខែមេសា ឆ្នាំ២០២៥ ម៉ោង ៩:៥៩ នាទី យប់
រូបភាព៖ រដ្ឋបាលខេត្តសៀមរាប
សៀមរាប៖ រដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ នឹងត្រៀមឡាន ១១២គ្រឿង ដើម្បីដឹកជញ្ជូនពលរដ្ឋេរវាងរាជធានីភ្នំពេញ និងខេត្តសៀមរាប ដោយឥតគិតថ្លៃ នាឱកាសចូលឆ្នាំប្រពៃណីខ្មែរខាងមុន។ បើតាមសេចក្ដីជូនដំណឹងពីរដ្ឋបាលខេត្តសៀមរាប សាធារណជនទាំងអស់អាចជិះរថយន្តទាំងនោះបាន ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៥។
ទីតាំងចេញធ្វើដំណើររបស់រថយន្តឥតគិតថ្លៃនេះ គឺនៅចំណតដីឡូតំបន់អូស៊ីអាយស៊ី (OCIC) ជ្រោយចង្វារ ត្រង់រង្វង់មូលទេពមច្ឆា រាជធានីភ្នំពេញ ចាប់ពីម៉ោង៦ និង៣០នាទីព្រឹកតទៅ។ សម្រាប់ឡានចេញពីទិសដៅពីរាជធានីភ្នំពេញ មកកាន់ខេត្តសៀមរាប នឹងឈប់ចំណតនៅមណ្ឌលរដ្ឋបាលមន្ទីរខេត្តសៀមរាប (បុរីរដ្ឋបាល) ដែលស្ថិតនៅបណ្ដោយវិថីសម្ដេចវិបុលបញ្ញា សុខ អាន (ផ្លូវ៦០ម៉ែត្រ) ក្រុងសៀមរាប។
ដោយឡែកសម្រាប់អ្នកដំណើរដែលមានទិសដៅចេញខេត្តពីសៀមរាប ទៅរាជធានីភ្នំពេញវិញ គឺត្រូវឡើងឡានចំណតនៅមណ្ឌលរដ្ឋបាលមន្ទីរខេត្តសៀមរាបខាងលើ និងគោលដៅចុះ នៅចំណតដីឡូតំបន់ OCIC ជ្រោយចង្វារដដែល។
ចំពោះកាលវិភាគចេញដំណើរវិញ សម្រាប់អ្នកដំណើរ ដែលធ្វើដំណើរនៅថ្ងៃទី១២ មេសា គឺឡាននឹងចេញនៅម៉ោង ២ និង៣០នាទីរសៀល។ ចំណែកអ្នកដំណើរចេញនៅថ្ងៃទី១៣ ដល់ទី១៧ ឡាននឹងចេញដំណើរនៅម៉ោង ៦កន្លះព្រឹក៕
© រក្សាសិទ្ធិដោយ thmeythmey.com
Tag:
