.jpg)
.jpg)
«កំពង់ស្ពឺសង្រ្កាន្ត» រៀបចំ៣ថ្ងៃនៅកណ្ដាលក្រុងច្បារមន
- ថ្ងៃសុក្រ ទី៤ ខែមេសា ឆ្នាំ២០២៥ ម៉ោង ៨:៥៩ នាទី យប់
រូបភាពពីរដ្ឋបាលខេត្តកំពង់ស្ពឺ។
រដ្ឋបាលខេត្តកំពង់ស្ពឺ នឹងរៀបចំព្រឹត្តិការណ៍«កំពង់ស្ពឺសង្រ្កាន្ត»រយៈពេល៣ថ្ងៃ ចាប់ពីថ្ងៃទី១៤-១៦ ខែមេសា នៅវិមានឯករាជ្យខេត្តកំពង់ស្ពឺ។ ព្រឹត្តិការណ៍នេះ មានការលេងល្បែងប្រជាប្រិយខ្មែរ ការតាំងពិព័រណ៌ផលិតផល ការប្រគំតន្រ្តី រួមទាំងការកម្សាន្តនៅតំបន់ត្រជាក់ចិត្ត។
ព្រឹត្តិការណ៍«កំពង់ស្ពឺសង្រ្កាន្ត» រៀបចំឡើងដើម្បីអបអរពិធីបុណ្យចូលឆ្នាំថ្មី ប្រពៃណីជាតិខ្មែរ និងបង្កបរិយាកាសសប្បាយរីករាយដល់ប្រជាពលរដ្ឋ និងភ្ញៀវទេសចរ។ «កំពង់ស្ពឺសង្រ្កាន្ត» នឹងរៀបចំចាប់ពីម៉ោង ១០ព្រឹកតទៅ ជារៀងរាល់ថ្ងៃ ចាប់ពីថ្ងៃទី១៤-១៥-១៦ ខែមេសា ដោយមានកម្មវិធីកម្សាន្តសប្បាយជា ច្រើនដូចជា កម្មវិធីលេងល្បែងប្រជាប្រិយ ការដាក់តាំងបង្ហាញផលិតផលនានា កម្មវិធីប្រគំតន្ត្រីខ្នាតធំ ការរាំលេងកម្សាន្ត រួមនឹងកម្មវិធីកម្សាន្តសប្បាយជាច្រើនផ្សេងទៀត។
ក្រៅពីនេះ ដើម្បីចូលរួមអបអរសាទរបុណ្យចូលឆ្នាំថ្មីឱ្យកាន់តែមានភាពអធិកអធម នៅតាមបណ្តាក្រុង ស្រុក ក៏មានរៀបចំកម្មវិធីសង្ក្រាន្តឆ្នាំថ្មីនៅតាមទីតាំងសំខាន់ៗ មួយចំនួនដូចជា រមណីយដ្ឋាន ទីប្រជុំជន និងវត្តអារាម តាមភូមិ សម្រាប់ប្រជាពលរដ្ឋចូលរួមលេងកម្សាន្តផងដែរ។ នេះបើតាមរដ្ឋបាលខេត្តកំពង់ស្ពឺ។
រដ្ឋបាលខេត្តកំពង់ស្ពឺ អំពាវនាវឱ្យពលរដ្ឋអញ្ជើញចូលរួមទស្សនា និងលេងកម្សាន្តឱ្យបានច្រើនកុះករ ដើម្បីញ៉ាំងឱ្យកម្មវិធី ប្រព្រឹត្តទៅប្រកបដោយភាពឱឡារិក មានសណ្តាប់ធ្នាប់សាធារណៈល្អប្រសើរ និងសប្បាយរីករាយ៕
© រក្សាសិទ្ធិដោយ thmeythmey.com
Tag:
.gif)