.jpg)
.jpg)
ខេត្តព្រះសីហនុ ទទួលបានទេសចរជាង ១,៥លាននាក់ ក្នុងត្រីមាសទី១
- ថ្ងៃសៅរ៍ ទី៥ ខែមេសា ឆ្នាំ២០២៥ ម៉ោង ៤:០០ នាទី រសៀល
ព្រះសីហនុ ជាខេត្តដែលពោរពេញដោយតំបន់ទេសចរណ៍ និងតំបន់សេដ្ឋកិច្ច ទាក់ទាញទេសចរជាតិ-អន្តរជាតជាច្រើន ជារៀងរាល់ចុងសប្តាហ៍។ មករយៈពេល៣ខែមកនេះ ខេត្តជាប់មាត់សមុទ្រមួយនេះ ទទួលបានភ្ញៀវទេសចរចំនួន ១ ៥៣០ ០០០នាក់ កើនឡើង ៦,៦ភាគរយ បើធៀបទៅនឹងរយៈពេលដូចគ្នាឆ្នាំ២០២៤។
បើតាមលោក ឡុង ឌីម៉ង់ អភិបាលខេត្តរងព្រះសីហនុ ក្នុងចំណោមភ្ញៀវទេសចរទាំងជាង១,៥លានដុល្លារ ដែលមកលេងកម្សាន្តទឹកដីខេត្តព្រះសីហនុនៅក្នុងត្រីមាសទី១នេះ គឺមានភ្ញៀវទេចរបរទេស ជាង១៣ម៉ឺននាក់។ លោកបានបញ្ជាក់ប្រាប់ព័ត៌មានឌីជីថលថ្មីៗ (ThmeyThmey) ថា សេវាកម្មល្អ និងទេសភាពស្រស់ស្អាត ជាកត្តាដែលធ្វើឱ្យខេត្តជាប់ឆ្នេរសមុទ្រមួយនេះ មានភ្ញៀវទេសចរមកកម្សាន្តលេងជាច្រើន។
ជុំវិញនៃសក្តានុពលនៃវិស័យទេសចរណ៍នៅខេត្តព្រះសីហនុ នឹងជួយផ្សព្វផ្សាយពីវិស័យទេសចរណ៍ ជាពិសេសបានផ្លាស់ប្តូរមុខមាត់យ៉ាងខ្លាំង ដែលមានសកម្មភាពសេដ្ឋកិច្ចដ៏មមាញឹក ក្នុងការជំរុញកំណើនសេដ្ឋកិច្ចខេត្តដ៏មានសក្កានុពល។
ជាមួយគ្នានេះ តំបន់កោះតូច-ធំ ចំនួន៣២ ក៏មានសក្តានុពលក្នុងការអភិវឌ្ឍយ៉ាងខ្លាំងផងដែរ ដែលមានផ្ទៃក្រឡាជាង១៦២ គីឡូម៉ែត្រ។ ក្រៅពីកោះ តំបន់ទេសចរណ៍តាមឆ្នេរ និងកោះដែលមានអំណោយផលពីធម្មជាតិ កំពុងទាក់ទាញភ្ញៀវទេសចរជាតិ និងអន្តរជាតិយ៉ាងច្រើន។ ទាំងនោះរួមមាន៖ ឆ្នេរអូរឈើទាល ឆ្នេរឯករាជ្យ ឆ្នេរសុខា កោះរ៉ុង កោះរ៉ុងសន្លឹម កោះសង្សារ និងកោះពស់ជាដើម។ សូមបញ្ជាក់ដែរថា រដ្ឋបាលខេត្តព្រះសីហនុ បន្តពង្រឹងសន្តិសុខ សណ្ដាប់ធ្នាប់ អនាម័យ និងការពង្រឹងសេវាកម្មម្ហូបអាហារឱ្យកាន់តែមានភាពល្អប្រសើរ។
ខេត្តព្រះសីហនុសំបូរទៅដោយធនធានធម្មជាតិដ៏សម្បូរបែប គ្រប់ដណ្តប់លើផ្ទៃដី ២ ៦៥៩គីឡូម៉ែត្រក្រឡា ដែលមាន២ភាគ៣ ជាដីភ្នំនិងខ្ពង់រាប ដោយមាន១១១ ភូមិ៕
© រក្សាសិទ្ធិដោយ thmeythmey.com
Tag:
