.jpg)
.jpg)
សម្តេច ហ៊ុន ម៉ាណែត លើកទឹកចិត្តយុវជន ចងក្រងគ្នាជា«ក្រុមជួយសង្គម» តែហាម បង្កើត«ក្រុមបងធំ»
- ថ្ងៃចន្ទ ទី៧ ខែមេសា ឆ្នាំ២០២៥ ម៉ោង ៨:៥៩ នាទី យប់
សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ ស្ពានអាកាស មរតកតេជោ នៅចំណុចប្រសព្វរវាងមហាវិថីសម្តេចតេជោ ហ៊ុន សែន, មហាវិថីកងយោធពលខេមរភូមិន្ទ និង មហាវិថីព្រះមុនីវង្ស ស្ថិតក្នុងមូលដ្ឋានខណ្ឌមានជ័យ និងខណ្ឌចំការមន នាថ្ងៃទី៧មេសា ឆ្នាំ២០២៥។ រូបពី STPM
ភ្នំពេញ៖ សម្ដេច ហ៊ុន ម៉ាណែត នាយករដ្ឋមន្ត្រី ជំរុញឱ្យយុវជន ចងក្រងគ្នាជាក្រុមជួយ កិច្ចការសង្គម មិនមែនចងគ្នាជាក្រុមបងធំ បង្កអសន្តិសុខឡើយ។ សម្តេចក៏ព្រមានឃាត់ខ្លួនក្រុមក្មេងទំនើង ដាក់ពន្ធនាគារដែរ ដើម្បីឱ្យពួកគេ ពិចារណាកែខ្លួនជាធនធានមនុស្សល្អប្រសើរក្នុងសង្គមឡើងវិញ។
ពិធីសម្ពោធដាក់ឱ្យប្រើប្រាស់ស្ពានអាកាសមរតកតេជោ តម្លៃជិត៣៧លានដុល្លារ នាព្រឹកថ្ងៃទី៧មេសា សម្ដេច ហ៊ុន ម៉ាណែត ណែនាំឱ្យសមត្ថកិច្ចបន្តបង្ក្រាបក្រុមក្មេងទំនើង ឱ្យដូចភ្លៀងរលឹម។ យ៉ាងណាក៏ដោយ នាយករដ្ឋមន្ត្រី ក៏បានឃើញពីកិច្ចខិតខំប្រឹងប្រែងរបស់កងកម្លាំងប៉ូលិសតាមរាជធានី-ខេត្ត រួមទាំងស្ថាប័នតុលាការ ដែលបង្ក្រាបក្រុមក្មេងទំនើងនាពេលកន្លងមកនេះ។
ទន្ទឹមនឹងនេះ សម្ដេច ហ៊ុន ម៉ាណែត សរសើរយុវជនមួយចំនួន ដែលបានចងក្រងគ្នាជាក្រុម ជួយកិច្ចការសង្គម ដូចជាការប្រមូលសំរាមចេញពីទន្លេ និងប្រឡាយទឹកស្អុយ។ ជុំវិញការជួយកិច្ចសង្គមនេះ សម្ដេច សង្កត់ធ្ងន់ថា៖ «ចងគ្នាជាក្រុមហ្នឹង(ជួយកិច្ចសង្គម) ខ្ញុំលើកទឹកចិត្ត ហើយយុវជនរបស់យើងចងជាក្រុមដោយស្ម័គ្រចិត្ត ដើម្បីជួយការងារសង្គម ជួយគ្រួសារ ឪពុកម្ដាយ ខ្ញុំសូមអរគុណណាស់! សូមសរសើរ! តែបើចងក្រងជាបងធំ កុំឱ្យសោះ»។
ទាក់ទិននឹងការបង្ក្រាបក្រុមក្មេងទំនើង សម្ដេចបានពន្យល់ពីចំណាត់ការយ៉ាងតឹងរ៉ឹងនេះ មិនមែនចាត់យុវជនជាសត្រូវឡើយ គ្រាន់តែកម្ចាត់សកម្មភាពមិនល្អរបស់យុវជនប៉ុណ្ណោះ។ លើសពីនេះ ការឃាត់ខ្លួន យុវជនដែលប្រព្រឹត្តបទល្មើស និងបង្កចលាចល ក្នុងសង្គម គឺដើម្បីឱ្យកែប្រែចិត្តគំនិតធ្វើជាមនុស្សល្អឡើងវិញ។ សម្ដេច ហ៊ុន ម៉ាណែត ជំរុញឱ្យរួមគ្នា ខិតខំកែលម្អសង្គម ហើយអាជ្ញាធរ ត្រូវបន្តយកចិត្តទុកដាក់លើគោលនយោបាយភូមិឃុំសុវត្ថិភាព ពិសេស ពាក់ព័ន្ធនឹងរឿងគ្រឿងញៀន និងក្មេងទំនើង។
ប្រមុខថ្នាក់ដឹកនាំ ចង្អុលបង្ហាញពីការរស់នៅដោយសេចក្ដីថ្លៃថ្នូរ គឺរស់នៅដោយគោរពគ្នា ប្រកាន់សីលធម៌ គុណធម៌ ទើបជាសង្គមស៊ីវីល័យ៕
© រក្សាសិទ្ធិដោយ thmeythmey.com
Tag:
