ភ្នំពេញ៖ «មន្ទីរពេទ្យ ប្រៀបដូចជារូបរាងកាយរបស់មនុស្ស ខណៈដែលលោកគ្រូ អ្នកគ្រូពេទ្យ មន្ត្រីរាជការ និងបុគ្គលិកទាំងអស់នៃវិស័យសុខាភិបាល គឺជាឆ្អឹងខ្នងដែលទ្រទ្រង់រូបរាងកាយនោះ»។ នេះ​ជាការ​លើក​ឡើង​របស់​លោក​ ហ៊ុន ម៉ានី នា​ពិធីបិទសិក្ខាសាលាពិគ្រោះយោបល់ និងប្រមូលធាតុចូលលើសេចក្តីព្រាងព្រះរាជក្រឹត្យស្តីពីលក្ខន្តិកៈដោយឡែកនៃអង្គសុខាភិបាល នៅថ្ងៃទី៧ ខែមេសា។

ក្រសួង​មុខងារសាធារណៈ និង​ក្រសួង​សុខាភិបាល បាន​សហការ​រៀបចំ​សិក្ខាសាលាពិគ្រោះយោបល់ និងប្រមូលធាតុចូលលើសេចក្តីព្រាងព្រះរាជក្រឹត្យស្តីពីលក្ខន្តិកៈដោយឡែកនៃអង្គសុខាភិបាល ដើម្បី​ពិភាក្សា កែលម្អ និងបំពេញបន្ថែមនូវចំណុចខ្វះខាត ក្នុង​ទិសដៅ​ធ្វើ​ឱ្យសេចក្តីព្រាងព្រះរាជក្រឹត្យ កាន់តែមានលក្ខណៈគ្រប់ជ្រុងជ្រោយ។​

ថ្លែង​ក្នុង​ពិធី​បិទ​សិក្ខា​សាលា​នេះ លោក ហ៊ុន ម៉ានី ឧបនាយក​រដ្ឋមន្រ្តី​ រដ្ឋមន្រ្តីក្រសួង​មុខងារសាធារណៈ​ ចាត់ទុក​មន្ទីរពេទ្យ ​គ្រូ​ពេទ្យ មន្រ្តីរាជការ និង​បុគ្គលិកសុខាភិបាល ជា​ដៃគូ​​ក្នុង​ការ​ជួយ​សង្រ្គោះ​ជីវិត​មនុស្ស។ ​លោក ហ៊ុន ម៉ានី បន្តថា ហេតុនេះ ការគ្រប់គ្រងធនធានមនុស្សក្នុងវិស័យសុខាភិបាល តាមអភិក្រម «រើសឱ្យចំ បំពេញឱ្យត្រូវ រក្សាឱ្យនៅ» តាមរយៈការគ្រប់គ្រង ការផ្ទេរមន្ត្រី ការលើកទឹកចិត្ត ការបណ្តុះបណ្តាល និងការអភិវឌ្ឍសមត្ថភាព ត្រូវតែគិតគូររៀបចំឱ្យបានច្បាស់លាស់។ ការធ្វើ​បែបនេះ នឹង​ធានាឱ្យប្រព័ន្ធសុខាភិបាលកម្ពុជា អាចពង្រឹងសមត្ថភាពឆ្លើយតបទៅនឹងតម្រូវការរបស់ប្រជាពលរដ្ឋនាពេលបច្ចុប្បន្ន និងជាពិសេសអាចគ្រប់គ្រងនូវវិបត្តិសុខភាពសាធារណៈ ជាយថាហេតុណាមួយ នាពេលអនាគត។ ទន្ទឹមនឹង​នេះ លោក​រដ្ឋមន្រ្តី ក៏​បាន​លើក​​ពាក់​ព័ន្ធ​នឹង​យុទ្ធ​សាស្រ្ត​បញ្ចកោណ​ ដែល​ប្រមុខ​រដ្ឋាភិបាល​បាន​ដាក់ចេញ ជាពិសេស​ចំពោះវិស័យសុខាភិបាល គឺ​អាទិភាពទី១ មុំទី២។

លោក ហ៊ុន ម៉ានី សង្កត់ធ្ងន់ថា​ ឈរលើមូលដ្ឋានទាំងអស់នេះ កន្លងមក ក្រសួងមុខងារសាធារណៈ និងក្រសួងសុខាភិបាល បានសហការគ្នាក្នុងក្របខណ្ឌនៃការគ្រប់គ្រងធនធានមនុស្ស, អភិវឌ្ឍសមត្ថភាពមន្ត្រី និងពង្រឹងសមត្ថភាព ក្នុងការផ្តល់សេវាសុខាភិបាលនៅមណ្ឌលសុខភាព និងមន្ទីរពេទ្យបង្អែកជាដើម។

ពាក់ព័ន្ធ​នឹង​ការរៀបចំ​សេចក្ដីព្រាង​​ព្រះរាជក្រឹត្យស្តីពីលក្ខន្តិកៈដោយឡែកនៃអង្គសុខាភិបាលនេះ លោក ហ៊ុន ម៉ានី មាន​ប្រសាសន៍ថា ការរៀបចំដោយជោគជ័យនៃព្រះរាជក្រឹត្យនេះ អាចនឹងផ្តល់ជាផលរំពឹងទុកមួយចំនួន គឺ​ចូលរួម​លើកកម្ពស់គុណតម្លៃបុគ្គលិកសុខាភិបាល តាមរយៈការពង្រឹង ការបណ្តុះបណ្តាល ការបន្តអភិវឌ្ឍសមត្ថភាពមន្ត្រី ដើម្បីធានាប្រសិទ្ធភាពក្នុងការអនុវត្តការងារ រួមជាមួយការលើកទឹកចិត្ត ឱកាស និងការវិវឌ្ឍអាជីពជាមន្ត្រីសុខាភិបាល។

លើសពីនេះ នឹង​ចូលរួម​ការអភិវឌ្ឍសមត្ថភាពស្ថាប័នសុខាភិបាលថ្នាក់ជាតិ និងថ្នាក់ក្រោមជាតិ ឱ្យកាន់តែល្អប្រសើរ ដើម្បីអាចពង្រឹងគុណភាពក្នុងការផ្ដល់សេវាសុខាភិបាល ឱ្យកាន់តែល្អ និងខិតជិតប្រជាពលរដ្ឋ ស្របតាមការវិវត្តថ្មីៗចំពោះមុខ។ ម៉្យាងវិញទៀត ក៏ជួយ​បង្កើនប្រសិទ្ធភាពនៃការគ្រប់គ្រងមន្ត្រីរាជការស៊ីវិលក្នុងវិស័យសុខាភិបាល ប្រកបដោយផលិតភាព វិន័យ និងសីលធម៌វិជ្ជាជីវៈ ដើម្បីធានាឱ្យបាននូវការបង្កើនទំនុកចិត្តរបស់ប្រជាពលរដ្ឋលើវិស័យសុខាភិបាលកម្ពុជា។

សូម​បញ្ជាក់ថា កន្លងមក ការគ្រប់គ្រងមន្ត្រីរាជការស៊ីវិលក្នុងវិស័យសុខាភិបាល អនុលោមតាមព្រះរាជក្រឹត្យចំនួន៣ ដែលកំពុងស្ថិតនៅជាធរមានរួមមាន ព្រះរាជក្រឹត្យស្តីពីលក្ខន្តិកៈដោយឡែកនៃក្របខណ្ឌមន្ត្រី សុខាភិបាលជាន់ខ្ពស់, ព្រះរាជក្រឹត្យស្តីពីលក្ខន្តិកៈដោយឡែកនៃក្របខណ្ឌមន្ដ្រីសុខាភិបាលមធ្យម និង ព្រះរាជក្រឹត្យស្តីពីលក្ខន្តិកៈដោយឡែកនៃក្របខណ្ឌមន្ត្រីសុខាភិបាលបឋម ដែលព្រះរាជក្រឹត្យទាំងនេះត្រូវបានដាក់ឱ្យអនុវត្តតាំងពីឆ្នាំ២០០១៕