.jpg)
.jpg)
ក្រុមហ៊ុន Smart Axiata ទទួលហិរញ្ញប្បទាន ៥០លានដុល្លារ លើកិច្ចសហការជាមួយ ធនាគារ ស៊ីអាយអិមប៊ី កម្ពុជា សម្រាប់ជំរុញវិសាលភាពសេវាទូរសព្ទ និងត្រៀមខ្លួនសម្រាប់ប្រព័ន្ធ 5G
- ថ្ងៃអង្គារ ទី៨ ខែមេសា ឆ្នាំ២០២៥ ម៉ោង ៤:២៥ នាទី រសៀល
ភ្នំពេញ៖ នាថ្ងៃទី៣១ ខែមីនា ឆ្នាំ២០២៥ ក្រុមហ៊ុន ស្មាត អាស្យាតា បានចុះហត្ថលេខាលើអនុស្សរណៈយោលយល់គ្នាជាមួយ ធនាគារ ស៊ីអាយអិមប៊ី ស្ដីពីភាពជាដៃគូជាផ្លូវការ។ កិច្ចសហការនេះ បានគូសបញ្ជាក់ពី ការបោះជំហានដ៏សំខាន់នៅក្នុងការអភិវឌ្ឍនៃប្រទេសកម្ពុជា ដោយផ្ដោតលើការពង្រឹងវិសាលភាពនៃការគ្រប់ដណ្ដប់សេវាអ៊ីនធឺណិតរបស់ក្រុមហ៊ុនស្មាតកាន់តែធំទូលាយ ស្របពេលដែលក្រុមហ៊ុនកំពុងត្រៀមខ្លួនសម្រាប់ប្រព័ន្ធ 5G នាពេលអនាគត។
ជាមួយនឹងកិច្ចសហការនេះដែរ ធនាគារ ស៊ីអាយអិមប៊ី បានសហការផ្ដល់ហិរញ្ញប្បទាន ទៅកាន់ក្រុមហ៊ុន ស្មាត ក្នុងចំនួនថិវកា ៥០លានដុល្លារអាម៉េរិក ដើម្បីពង្រឹងហេដ្ឋារចនាសម្ព័ន្ធនៃបណ្ដាញទូរគមនាគមន៍ និងត្រៀមខ្លួនសម្រាប់ការដាក់បញ្ចេញនូវ 5G នាពេលអនាគត ព្រមជាមួយនឹងភាពជាដៃគូក្នុងការផ្គត់ផ្គង់ការតភ្ជាប់សម្រាប់សហគ្រាសផងដែរ។
តាមរយៈហរិញ្ញប្បទានចំនួន ៥០លានដុល្លារអាម៉េរិក ពីធនាគារ ស៊ីអាយអិមប៊ី នេះ ក្រុមហ៊ុន ស្មាត នឹងមានហិរញ្ញវត្ថុកាន់តែប្រសើរសម្រាប់ពង្រឹងហេដ្ឋារចនាសម្ព័ន្ធតាមតម្រូវការ ដើម្បីជំរុញការអភិវឌ្ឍគុណភាពបណ្ដាញសេវាអ៊ីនធឺណិត និងភាពជឿនលឿននៃបច្ចេកវិទ្យារបស់ខ្លួន។ ភាពជាដៃគូរនេះ ជាសក្ខីភាពដែលបញ្ជាក់យ៉ាងច្បាស់អំពីទំនុកចិត្តរបស់ធនាគារ ស៊ីអាយអិមប៊ី ទៅកាន់ស្ថានភាពហិរញ្ញវត្ថុ និង ចក្ខុវិស័យដ៏រឹងមាំនៃក្រុមហ៊ុន ស្មាត អាស្យាតា។
ជាមួយគ្នានេះដែរ ក្រុមហ៊ុន ស្មាត អាស្យាតា ក៏នឹងក្លាយជាអ្នកផ្គត់ផ្គង់បណ្ដាញទូរគមនាគមន៍ និងសេវាកម្មឌីជីថលគោល សម្រាប់ធនាគារនេះផងដែរ ដើម្បីធានាបានថាប្រតិបត្តិការ និងការផ្ដល់សេវាកម្មឌីជីថលរបស់ធនាគារ អាចដំណើរការទៅដោយរលូន។
មិនតែប៉ុណ្ណោះ កិច្ចព្រមព្រៀងនេះបានកកើតឡើង នៅក្រោមកិច្ចសហការរយៈពេលជាង១០ឆ្នាំមកហើយ ដែលក្រុមហ៊ុនទាំងពីរ ស្ថិតក្រោមសម្ព័ន្ធរបស់ក្រុមហ៊ុនម៉ាឡេស៊ីដូចគ្នា។ កិច្ចសហការដ៏រឹងមាំរវាងក្រុមហ៊ុន ទូរគមនាគមន៍ និងធនាគារ បង្ហាញឱ្យឃើញពីសារៈសំខាន់នៃបច្ចេកវិទ្យាហិរញ្ញវត្ថុឌីជីថល និងនវានុវត្តន៍លើផ្នែកបច្ចេកវិទ្យា ខណៈដែលប្រទេសកម្ពុជាកំពុងធ្វើបរិវត្តកម្មឌីជីថលយ៉ាងឆាប់រហ័ស។
លោក Ziad Shatara នាយកប្រតិបត្តិនៃក្រុមហ៊ុន ស្មាត អាស្យាតា បានលើកឡើងថា៖ “កិច្ចសហការរបស់យើងជាមួយនឹងធនាគារ ស៊ីអាយអិមប៊ី ផ្ដល់ឱ្យក្រុមហ៊ុនស្មាតនូវ ធនធានហិរញ្ញវត្ថុសម្រាប់បត់បែនទៅតាមតម្រូវការ ដែលរួមមានការអភិវឌ្ឍបណ្ដាញសេវាអ៊ីនធឺណិត ដើម្បីសម្រួលបទពិសោធនៃការប្រើប្រាស់របស់អតិថិនឱ្យកាន់តែប្រសើរ ស្របពេលដែលយើងអាចវិនិយោគលើការអភិវឌ្ឍនៃបច្ចេកវិទ្យា និងការត្រៀមខ្លួមសម្រាប់ប្រព័ន្ធ 5G នាពេលអនាគត។ ភាពជាដៃគូនេះ នឹងជួយជ្រោមជ្រែងយើងឱ្យបន្តជំរុញការអភិវឌ្ឍនៃសង្គមឌីជីថលបានកាន់តែប្រសើរ។ ជាមួយគ្នានេះដែរ បច្ចេកវិទ្យាជឿនលឿនរបស់យើងក៏នឹងជួយជ្រោមជ្រែងធនាគារ សុីអាយអិមប៊ី ឱ្យធ្វើប្រតិបត្តិការប្រកបដោយសុវត្ថិភាព ប្រសិទ្ធភាព និងជំរុញការចាប់យកបច្ចេកវិទ្យានវានុវត្តន៍ដើម្បីពន្លឿនទំនើបកម្មរបស់ធនាគារទូទាំងផ្ទៃប្រទេស ថែមទៀតផង។”
លោក ប៊ុន យីន ប្រធាននាយកប្រតិបត្តិ នៃធនាគារ ស៊ីអាយអិមប៊ី ភីអិលស៊ី បានបន្ថែមថា៖ «ការផ្តល់ហិរញ្ញប្បទានជាយុទ្ធសាស្រ្តនេះ គូសបញ្ជាក់នូវការប្តេជ្ញាចិត្តខ្ពស់របស់ធនាគារ ស៊ីអាយអិមប៊ី ក្នុងការគាំទ្រដល់ការវិវឌ្ឍ ផ្នែកឌីជីថល ក្នុងប្រទេសកម្ពុជា។ តាមរយៈការជំរុញ ដល់ក្រុមហ៊ុន Smart Axiata ជាមួយនឹងធនធានហិរញ្ញវត្ថុដ៏ចាំបាច់ សម្រាប់ប្រព័ន្ធ 5G របស់ក្រុមហ៊ុន យើងមិនត្រឹមតែពង្រឹងភាពជាដៃគូយូរអង្វែងជាមួយគ្នាប៉ុណ្ណោះទេ តែថែមទាំងរួមចំណែក ដល់ការអភិវឌ្ឍ ផ្នែកបច្ចេកវិទ្យា ក្នុងប្រទេសផងដែរ។ កិច្ចសហប្រតិបត្តិការនេះ នឹងផ្តល់នូវផលជាវិជ្ជមាន ក្នុងការសម្រេចបានភាពច្នៃប្រឌិត និងការគាំទ្រ ផ្នែកហិរញ្ញវត្ថុ ជាមួយគ្នា»។
ស្របពេលដែលសេដ្ឋកិច្ចឌីជីថលរបស់ប្រទេសកម្ពុជាកំពុងតែមានការរីកចម្រើនឡើងនោះ កិច្ចសហការរវាងក្រុមហ៊ុនទូរគមនាគមន៍ ជាមួយនឹងស្ថាប័នហិរញ្ញវត្ថុបែបនេះពិតជាមានសារៈសំខាន់ខ្លាំងណាស់។ ភាពជាដៃគូរនេះ ដើរតួជាកម្លាំងចលករក្នុងការជំរុញវឌ្ឍនភាពនៃនុវានុត្តន៍បច្ចេកវិទ្យា ឱ្យកាន់តែសម្បូរបែបឡើង ស្របតាមតម្រូវការនៃវិស័យទាំងពីរនេះ។
ហេដ្ឋារចនាសម្ព័ន្ធនៃបណ្ដាញទូរគមនាគមន៍ និងការត្រៀមខ្លួមសម្រាប់ប្រព័ន្ធ 5G របស់ក្រុមហ៊ុន ស្មាត រួមនិងសេវាកម្មផ្នែកហិរញ្ញវត្ថុពីធនាគារ ស៊ីអាយអិមប៊ី នឹងជំរុញឱ្យមាននវានុវត្តន៍កាន់តែសម្បូរបែប និងការអភិវឌ្ឍប្រកបដោយចីរភាពសម្រាប់ប្រទេសកម្ពុជា៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
.gif)