.jpg)
.jpg)
ពន្ធគយទៅវិញទៅមករបស់លោក ត្រាំ ចូលជាធរមានហើយ
- ថ្ងៃពុធ ទី៩ ខែមេសា ឆ្នាំ២០២៥ ម៉ោង ១១:៤៩ នាទី ព្រឹក
លោកដូណាល់ ត្រាំ ប្រធានាធិបតីអាម៉េរិក នៅថ្ងៃទី៨ ខែមេសា។ រូបភាព សេតវិមាន
ការដាក់ពន្ធគយរបស់លោកប្រធានាធិបតី ដូណាល់ ត្រាំ លើប្រទេសជាច្រើន ដែលមានទំហំចាប់ពី១០ភាគរយ ដល់ ៥០ភាគរយ បានចូលជាធរមានហើយ នៅថ្ងៃទី៩ ខែមេសា។ ចាប់ពីពេលនេះ អាម៉េរិក ចាប់ផ្តើមយកពន្ធគយ ដូចការប្រកាសរបស់លោក ត្រាំ នៅថ្ងៃទី២ ខែមេសា។
អត្ថបទទាក់ទង
ប្រធានាធិបតីអាម៉េរិក នៅថ្ងៃទី២ ខែមេសា បានប្រកាសដាក់ពន្ធគយលើប្រទេសប្រមាណ ៩០ ដោយក្នុងនោះ កម្ពុជារងពន្ធគយចំនួន ៤៩ភាគរយ ខណៈចិន ត្រូវបានអាម៉េរិកដំឡើងដល់ ១០៤ភាគរយ។ ការដាក់ពន្ធគយទៅវិញទៅមក បានចូលជាធរមាននៅថ្ងៃទី៩ ខែមេសា (ម៉ោងនៅក្រុងវ៉ាស៊ីនតោន)។
ស្របពេលការដាក់ពន្ធគយរបស់លោកប្រធានាធិបតី ដូណាល់ ត្រាំ ចូលជាធរមាន ទីភ្នាក់ងារការពារព្រំដែន និងគយអាម៉េរិក បានត្រៀមខ្លួនជាស្រេច ក្នុងការអនុវត្តតាមចំណាត់ការរបស់លោក ត្រាំ។
«ទីភ្នាក់ងារការពារព្រំដែន និងគយអាម៉េរិក នឹងប្រមូលពន្ធបន្ថែមក្រោមច្បាប់សេដ្ឋកិច្ចអាសន្នអន្តរជាតិ (IEEPA) លើប្រទេសនីមួយៗ ដែលរងពន្ធគយពី១១ភាគរយ ដល់៥០ភាគរយ នឹងចូលជាធរមាននៅថ្ងៃទី៩ ខែមេសា»។ សេចក្តីថ្លែងការណ៍របស់ទីភ្នាក់ងារការពារព្រំដែន និងគយអាម៉េរិក បានបញ្ជាក់បែបនេះ នៅថ្ងៃទី៩ ខែមេសា។
តាមសំណើចរចារបស់ប្រមុខរដ្ឋាភិបាលកម្ពុជា សម្តេច ហ៊ុន ម៉ាណែត ទៅអាម៉េរិក កម្ពុជា បានប្តេជ្ញាបង្កើនការនាំចូលទំនិញពីអាម៉េរិក តាមរយៈការកាត់បន្ថយពន្ធគយភ្លាមៗលើទំនិញចំនួន ១៩ប្រភេទ ពី ៣៥ភាគរយ មកត្រឹម ៥ភាគរយ។ ទន្ទឹមនេះ កម្ពុជា នឹងបញ្ជូនឧបនាយករដ្ឋមន្ត្រី១រូប និងរដ្ឋមន្រ្តី ១រូប ដើម្បីធ្វើការជាមួយតំណាងពាណិជ្ជកម្មអាម៉េរិកផងដែរ។
ក្រៅពីកម្ពុជា បណ្តាប្រទេសអាស៊ានដូចជាថៃ វៀតណាម ម៉ាឡេស៊ី សិង្ហបុរី និងឥណ្ឌូណេស៊ី នឹងស្វះស្វែងរកការចរចាជាមួយរដ្ឋបាលលោក ត្រាំ ដើម្បីបន្ធូរបន្ថយពន្ធគយ ដែលមានចាប់ពី ១០ភាគរយ ដល់ ៤៩ភាគរយ។ ចំណែក ចិន បានប្រកាសតតាំងជាមួយអាម៉េរិក ដល់ទីបញ្ចប់ ដែលធ្វើឱ្យអាម៉េរិកបន្ថែមពន្ធកើនដល់ ១០៤ភាគរយឯណោះ។
នៅក្នុងសន្និសីទសារព័ត៌មានថ្ងៃទី៨ ខែមេសា អ្នកនាំពាក្យសេតវិមានអាម៉េរិក លោកស្រី Karoline Leavitt បានបង្ហាញទិន្នន័យប្រទេសចំនួន ៧០ ដែលបានប្រកាសចង់ចរចាជាមួយអាម៉េរិក ដើម្បីកាត់បន្ថយពន្ធគយ តាមរយៈការធ្វើសម្បទានដល់ខ្លួន៕
© រក្សាសិទ្ធិដោយ thmeythmey.com
Tag:
